Read Hatam NINGAT-HI-NGAT NYA 8 Bible Online

NINGAT-HI-NGAT NYA 8 - Hatam bible

NINGAT-HI-NGAT NYA 8

¹Tirigi Domba Pmot cug biei nggrai gi nimuhwindacan leu lene mpia mbum-bra ei gwamti mem jam niken.

²Gima ngwig leu lene dingat malaikati nya ibou muhwindacan di igya ei Allah Noho bei bikrau pun mbrei nika muhwindacan.

³ Malaikati gom kin bu krau bokor mas mem indig biei nggrai di ui-gwang kei eisi bikwei ya simiak nimbar hum ndok. Noni yai biei nggrai di ui-gwang kei mang bibor mem gima bikum ei Allah de limwa nya ide naditi bindig biei nggrai dima ei nimbar hum ndok di iba mas binggai di jo banggo mbrei nibiho.

⁴Biei nggrai di noni ndig nimmup brou srig Allah de limwa nya ide naditi bikui leu malaikati di ya ei Allah Noho bei nindati.

⁵ Gima ngwig leu lene malaikati dima yai nide bokor dima biket hum mbom leu nimbar hum ndok. Bokor dima ut leu api noni com hagom ug ei dihyeisi mu. Gima bindei ba, kru ba nisu di bong nindig bibor bicut leu api kigyei ninjeng srei ba, dihyei ugwa-kwei cem.

⁶Mpe dima lene malaikati ibou muhwindacan di ikrau pun mbrei nika muhwindacan itin ei mem imiep.

⁷ Tirigi malaikati gi nigom miep nide pun mbrei lene biget di mbras nok tig njep kin hum kin nggrom srig yamti cut ug ei dihyeisi mu biyem dihyei kin biei njem nya kin mintu-minta hagom nittou nsi gom noro nittou nsi can jo.

⁸Tirigi malaikati gi nican miep nide pun mbrei lene mun di nindig krop dem kep nungug ttou di ninjeng cig-cai cut ug ei muk ngeisi mu bibindei ba, muk ngeisi nittou nsi gom dem kep nggrom noro nittou nsi can jo.

⁹Mindhe-ndhe nya ei minyei jou nittou nsi gom mai noro nittou nsi can igyaijo. Kibar minyei nya di piar ei muk ngwa dip nittou nsi gom cem sar.

¹⁰ Tirigi malaikati gi niningai miep nide pun mbrei lene ham di nindig bibor di ninjeng cig-cai dem kep hyem njeng cut leu mpia-bbed him bikieng kep minyei nya kin minyei yaisi nya nittou nsi gom.

¹¹ (Ham dima ninyeng Mpo-Mpam) Gima bindei ba, minyei nya nittou nsi gom mpo-mpam. Tirigi tungwatu nya idut minyei dima lene imang bibor imai hak drek dip nimpo-mpamti.

¹² Tirigi malaikati gi nibitai miep nide pun mbrei lene mpia njap kin bed mmun kin ham nya injeng nittou nsi gom dindi lene nittou nsi can jo. Gima rino nidinditi nggai kep nipigati leu mpia njap kin bed mmun kin ham nya nittou nsi gom noro nittou nsi can jo.

¹³Leu api dingat lo, hacam krubri hi ko-ko nyen anai bibor ei mpia-bbed him bidimiap noni ba nihyet nindig bibor bahara “Ayo! Ayo! Notou mem tungwatu dihyeisi dini tirigi ariman malaikati ibou ningai bu imiep ide pun mbrei nya i?”