Read Hatam NINGAT-HI-NGAT NYA 9 Bible Online

NINGAT-HI-NGAT NYA 9 - Hatam bible

NINGAT-HI-NGAT NYA 9

¹Tirigi malaikati gi nimuhwi miep nide pun mbrei lene dingat ham ningat gom di cut ug ei dihyeisi mu bikrau kusin jui ninnei rom nya ide.[6]

² Ham dima kau dimbou leu jui dima leu api hum mmup brou dem kep hum mmup di brou kui leu komfor nindig bibor apino bindei ba, mpia njap kin mpia-bbed him dindi-kai.

³ Leu api hai ceng nya idimba juk leu hum mmup dima ug ei dihyeisi mu ba, ikrau nisindemti di dem kep amai nggre naham tungwatu nya nisindemti.

⁴ Noro Allah cuon ser hai ceng nya nhyema igyem mintu-minta kin biei njem kin njita kioi nindigsi nya au. Isindem mem gima yaham tungwatu nya di Allah tak buk ei ingwakti bi.

⁵Hai ceng nya ibon nisindemti mem gima ihwen tungwatu nya bimai bi noro igyai niwei biyok he mem bed nitindur muhwi. Niwei di igyai biyok dima bindei ba, inghuisi wei noyam kin amai nggre naham tungwatu nyati.

⁶ Yo dima inggok puig mem gima imai ei ninsi bed muhwi dima noro bit bon yuum pui nimai bi. Inggok tut mem mmun-njap noro nimai jo minu ting leu yok.

⁷ Hai ceng nya idem kep kuda di tungwatu nya itin ei yok mem ibikon pran. Ittin topi mas ba, yiimaisi dem kep tungwatu nya yiimaisi.

⁸ Ibou nta dem kep sop nya ibou nta ba, ikwai dem kep singa ikwai.

⁹ Ijuk sinsun pran di iba ngkimom nitu binap ser ingget ba, inyehei nibimbiti dem kep kroba pran di kuda nya ikri tut yo di ikon pran.

¹⁰Ipu bon nisindemti dem kep amai nggre naham tungwatu nyati ba, iba ipu baham tungwatu nya kikau mem bed nitindur muhwi.

¹¹Ibon ide nibou ndig di ninyeng tak kep yok ba, noni ne malaikati di ninyeng tak kep ninnei rom nya ide jui nsi ri. Mben Ibrani ijem ninyeng Abadon lo, mben Yunani ijem ninyeng Apolion. Nimbot kepti pai Nggek Kep Mun Cig.

¹²Mun di buhun bibor gi nigom ngwig leu su lene jo can kin bu di mikwei yo.

¹³ Tirigi malaikati gi nimuhwindagom miep nide pun mbrei lene dimiap nihyet di tibim kwei leu nimbar hum ndok di iba mas bibon nuhuisi bitai. Nimbar dini jo ei Allah Noho bei.

¹⁴Nihyet dima cuk malaikati gi nimuhwindagom “Ma akes malaikati ibou bitai di ingot yok simiak Minyei Efrat nyai hak ug!”

¹⁵Leu api noni kes malaikati ibou bitai di itin ei mem jam kin njap kin bed kin ari bingwam dima leu binhyepo ihwen tungwagom leu ibou ningai tungwagom leu ibou ningai lene bikwop nok ei dihyeisi dini.

¹⁶Hi mbot kep bida tut tentara nya di ibri kuda imangti bipia imangti ibou juta sratus can.

¹⁷Tirigi dingat ningat-hi-ngat dima lene dingat tentara di ibri kuda dima ba, ijuk sinsun ngkimom nitu ser ingget ba, hi ngwoi nok hum njeng lene hi nimmun nok tig permata nilam lene hi nipuk nok belerang. Kuda nya ibou dem kep singa nibou lene hum njeng kin hum mmup kin belerang ttau leu yuhui.

¹⁸Mun nyeng ningai di ttau leu kuda yuhui dima yem tungwatu dihyeisi dini tungwagom leu ibou ningai tungwagom leu ibou ningai lene bikwop nok.

¹⁹Lewo kuda nisindemti ntun him yuhui kin ipu. Ipu yenti dem kep wou nibou. Iba ipu dima biyai ninghuisi wei bak tungwatu nya.

²⁰ Noro tungwatu nindigsi nya di igyai nimai tug hon mun di buhun ninyeng ningai dima bi ikiek yok leu mun di ikuk yok bak bi. Ikuk yok bak ninnei rom nya kin kwar nya kikau. Kwar dima ne iba mas kin perak kin ngkimom-tembaga kin tig kin biei bibon ba, bit bon mun dima yok ingat mpia cem imiap nihyet cem imbut imig cem kan bi.

²¹Yo dini ittin ser ide sisar nihwen mun cem ninda dut cem nicut tut yam cem inok ninggimang kep mun cig cem leu ba, ikiek ndam Allah bi.