Read Hatam RUT 2 Bible Online

RUT 2 - Hatam bible

RUT 2

¹Naomi bon nide bat Boas. No dini ninyeng jei ba, nyeng tut mun nyeng mang bibor cem ba, tig mbier tut Elimelekh di Naomi nijjep po mai pima cem.

² Njap gom lene Rut pai bak Naomi “Gino ace tut lene duug ei beisi bidimbus gandum di awak nya di igyai kikep midyai dima iba igyai ngat ei di iba inda mbres ei nya. Dingon ngkiem tut bipia awak gom misindui sut gima dimbus gandum nikenti bram noni.” Lene Naomi buhup “Kei! Ambut ug.”

³Gima rino Rut ug ei beisi bibram awak nya di ikos gandum nya ba, mbus gi hi di yoni iba igyai ngat ei nya he. Noni ug ei nikos gandumti ei beisi gom di niceu rino Boas po tig mbier tut Elimelekh nide.

⁴Jei bi lene Boas nonti kwei leu Betlehem ba, ngig niyai kep nide awak nya bipigo yok bipai “Handei kon ba, TUHAN sindem tut je.” Lene yo dima ipigo noni bipai “Handei kon ba, TUHAN njei mun di kei bak na di Andigpoi.”

⁵Lene Boas hig ser ide mindor “Misop dima tig mbier tut tou i?”

⁶Lene mindor buhup “Noni ne sop ngkiai di bit Naomi kwei leu minu Moab pima ri.

⁷Noni hig ser da leu api disindui sut noni bibram yo di ikos gandum nya ba, mbus gi hi di iba igyai ngat di iba inda mbres ei nya he. Noni kinyon eisi mem gwam ntuisi ba, ninda jo kep midyai dima kikau kwei bipek nogindini kep ba, no sindi gwam kep ninghuisi ei ig jibei behei.”

⁸Lene Boas pai bak Rut “Dipai dingon kanti gom bina. Ma ambus gandum ei hiter de beisi au. Noro anda jo kep ba, ambus ei ditde beisi dini bit ditde awak sop nya.

⁹Angig ayai kep mpia di ikinyon ei gandum nittou nsi gomti lene aya bit yok lo, ma ambres nanti leu yok au. Gino anggobiau lene adut minyei di awak pinai nya itau ei dibijigti. Disok kep yok ngkiem ser nhyema iwaisi nani au tu.”

¹⁰Lene Rut ba ningwak bikik dihyei ei Boas nimig him bipai binoni “Andigpoi e, dani ne dem mem gima abibon da nok gima bi. Nggon rino na di Andigpoi asingat tut da di ngkiai ba, abibon da nok i?”

¹¹Lene Boas buhup “Dimiap tut anghapti tu. Lewo hi pai bida tut gino asingat tut agnyot ba, ampu noni nindig bibor tirigi po ajjep nimaisi kikau kwei bipek ammani kep. Dikan tut bipia akes acig-apmem kin atimieisi ei su ba, akwei bong angkiaisi dini.

¹²Handei kon ba, TUHAN di nye di mben Israel nikuk nye bak miba mun di kei bibor bibirop hanyen bina tut ayai munti nya hagom lewo akwei gwam coi Noni tu!”

¹³Lene Rut pai binoni “Andigpoi e, mbro nok gino dibon dinyeng nok ade awak hi rin bi lo, asingat tut da nindig bibor ba, ade nisingat tut dati dima biwin kep dingonti tu.”

¹⁴Tirigi jam dem mem igyem njita lene Boas pai bak Rut “Akwei yem njita bit nye.” Lene Boas su ninda biyai roti nindak gom binoni leu api Rut tur roti dima ei ba anggur ningeiti biyem. Noni gwam bit yo di ikos gandum nindigsi nya leu api Boas yai gandum ngan di noni kang ei su binoni biyem bu. Rut yem njita bindei no leu ba, njita niken di jo binoni nindig.

¹⁵Lene noni kiju hanyen buug ei beisi bimbus gandum hi kin bu. Niabiati noni kes nindigsi nya ei su lene Boas sok kep nide awak nya bipai “Suar jisindui sut Rut bimbus gandum niken di jo simiak mpia ttou nsi di jike nintam eisi cem. Lene ma jiwaisi noni au.

¹⁶Suar jiba jinda bimbres nintam gom-gom leu gi hi di jike ei su bijo ei mem noni lene ma jicuon ser noni au.”

¹⁷Gima rino Rut mbus gandum-barli bikam niken ei beisi dima kikau ug bipek mmunti. Niabiati noni llet barli ningan leu nintam tu lene ngat lo, nibuhunti kilo simnai biniken.

¹⁸Lene noni biang nide gandum-barli dima bingkwei hanyen tut ug ei nide ig bindo bak Naomi. Lene noni kwas njita niken po yem bingwig bi pima tut Naomi biyem.

¹⁹Lene Naomi hig ser noni “Njap di ammani ambus gandum-barli dini yok ei siri tou i? Beisi di ayai midyai eisi pima niceu tou i? Handei kon ba, Allah minjei mun di kei bak no di ngondut na dima!” Lene Rut buhup “Dimbus gandum-barli niken ei beisi gom di niceu rino Boas.”

²⁰ Lene Naomi pai bak Rut “No dima ne side bat di suar brim ningkek mem gima nyohou sa ri. Handei kon ba, TUHAN di ningon ngkwei leu mun di Noni preu ei mem yo di igyaijo kin yo di imai su nya bi sren miyai gi kei binoni.”

²¹Lene Rut pai “Amei e, gima he bi lewo no dima sindui sut da bidimbus gandum ei nide beisi kikau bibou nide awak nya igyai kep midyai dima hagom bingwig ug e.”

²²Lene Naomi buhup “Dipmisop na e, gima igbit ri. Leu gino ayai midyai ei hiter nide beisi lene mpaba no di ugwai-gwai mikrar kep nani e? Anda jo kep midyai nimbus gandum-barli ei Boas de beisi bit sop nindigsi nya.”

²³Gima rino Rut ba no kum sop nindigsi nya biyai kep midyai kikau bibou ikos gandum-barli di len bibie kin gi hi di len niabiati bu ei Boas de beisi bingwig ug e. Noni bong bit nignyot kikau mem nijam dima.