Read Hatam SAMUEL GI NIGOM 1 Bible Online

SAMUEL GI NIGOM 1 - Hatam bible

SAMUEL GI NIGOM 1

¹Mpe di gom lene Elkana bong ei minu ndig Rama ei nungug him di keret Efraim nya ide lewo noni ntun keret Efraim him. Nicig ninyeng Yeroham lene nignyon ninyeng Elihu. Noni ne Tohu nide bat ba, nimbier kim Zuf ninsi de nya.

²Mpe dima lene Elkana bon nitnem bat nya ibou can. Inyeng rino Hana kin Penina. Penina yai nimunggwom bat nya bak Elkana tu noro Hana pijet yo.

³Lene Elkana bit leu niyai kepti bikwop ari bingwam ba, jo leu minu ndig Rama buug ei Silo leu binhyepo kuk no bak TUHAN Di Sindem Bibor bibon midut nindig mindhe ei nimbar hum dokti bak Noni ei sirima. Mpe dima lene Eli yai nipmot bat cin di Hofni kin Pinehas ba, igyai midyai nok imam mem TUHAN ei sirima.

⁴Bikwop mpe dino Elkana bon midut nindig mindhe bak Allah lene noni digo mikwau ninghui ninggriet gom bak Penina ba, ninggriet gom bikwop Penina nipmot bat nya cem.

⁵Mbro nok gino Elkana ningon ngakei Hana nindig bibor lo, noni digo mikwau ninghui ninggriet gom ngat he bak noni leu gi po TUHAN bindei ba, noni pijet pima.

⁶Gima rino Penina di Elkana nitnem ndig hwen bit Hana binim kep noni leu gipo TUHAN bindei ba, noni pijet yo.

⁷Penina yai nok gima tut noni bikwop ari bingwam sindam. Tirigi yahagom yuug cem kep TUHAN De Prak Meng lene Penina bindei ba, Hana ningon buhun bibor bipim ba, niyai nggwei kibor ba, kou sut njita biyem bi cem.

⁸Tirigi mun dini cut igkep Hana lene nijjep mbus ningonti bihig ser “Hana e, nggon rino apim ba, angon buhun bibor kikau nok i? Akan bipia dani no di bon ninyeng mem na dor njiriek leu munggwom pinai nya ibou simnai bi e?”

⁹Mpe di gom niabiati tirigi Elkana nya yahagom igyem njita kui TUHAN De Prak Meng bingwig su lene Hana kiju biya. Ei mpe dima Eli no gwam kui ig hyei gom simiak dimbou heisi ei prak meng pimati.

¹⁰Lene Hana ningon buhun bibor hanyen bu apino pim ba, niyai nggwei kibor tirigi noni ngat nadi bak TUHAN.

¹¹ Lene noni preu ei bipai “TUHAN Di Sindem Bibor e, ma ayok ngon kep da lewo dinok Ade awak ri! Ma angig ayai kep dingon di buhun biborti. Ma angon prion ser da ba, akes da ei au. Gino ayai dipmot gom bida lene mididimig noni ei mem Na kikau ug bipek niyaijo ningwig honti. Lene dipreu ei mem Na bipia midikos nibou nta bi sren.”[1]

¹²Lene Hana huk nadi wer ninno ba, Eli tou kep nuhui tirigino nuhui bingmai-bingmai gwai.

¹³Lewo Hana ngat nadi ei ningonti. Nuhui bingmai-bingmai gwai noro nihyet tibim ei nuhui him bi. Apino Eli kan bigya ba anggur ningei pu noni.

¹⁴Gima rino pai bak Hana “Ba anggur ningei pu na ei mpia dini e? Akes hon leu binhyepo mun di pu na dima mipren hanyen!”

¹⁵Lene Hana buhup “Andigpoi e, ba anggur ningei pu da bi lewo didut hi bi. Noro dingon bos-bos nyen ba, dingon buhun bibor cem. Dingat nadi bidipui sut mun di buhun bibor di cut igkep da hagom bak TUHAN.

¹⁶Ma akan bipia dani ne sop di nibou sibui rin au. Dingat nadi biduhui bingmai-bingmai gwai nok gi pima lewo dingon ngguk bibor.”

¹⁷Lene Eli buhup “Gi nok lene ma aba angon di kwes bingkwei hanyen ug ei atimieisi. Handei kon ba, mben Israel ide Allah mibuhup ahyet bit leu angon kanti.”

¹⁸Lene Hana pai binoni “Andigpoi e, nna ba didem mem mun di kei di sindi anjei bak dani.” Lene noni kes Eli ei bimbut. Tirigi noni yem njita bindei no tu lene ningon kwes hanyen.

¹⁹Njap di hyep bu lene Elkana nya ikiju mem ha yausi ba, ikuk yok bak TUHAN mbigom kin bu leu api ingkwei hanyen ug ei minu ndig Rama. Jei bi lene Elkana kin Hana igyem njita tut yam apino TUHAN buhup Hana nihyet po ngat nadi pima.

²⁰Noni nghop ba, srek tut nipmot lene jem ninyeng Samuel bisimbot dat “Dahara TUHAN leu api Noni bindei ba, diyai dipmot gom.”

²¹Tto bou dem mem Elkana nya yuug ei Silo hanyen leu binhyepo noni bon midut nindig mindhe bak TUHAN sindam bikwop ari bingwam gom bu. Gima cem noni mibon midut nindig mindhe gom kin bu pijum ei mem Allah bit leu gi noni preu ei su.

²²Noro Hana gi bit yok bi lewo pai bak nijjep “Niabiati tirigi dipmot kes do bidut bu bi lene midibuwak noni ug ei TUHAN De Prak Meng nsi. Noni mibong ei sirima kikau bipek niyaijo ningwig honti.”

²³Lene Elkana buhup “Nok ug e. Ayai mun bit leu angon kanti hak ug. Nna ba jibou can jigwam bibou apmot kes do bidut bu bi ug e. Handei kon ba, TUHAN mibindei ba, mun di apreu ei su midem igbit.” Gima rino Hana bit yok bi noro gwam ig bei biyai do bak nipmot kikau bibou kes do bidut bu bi ug e.

²⁴Niabiati tirigi Samuel kes do leu ba, dut bu bi lene nipmem usap noni ug ei TUHAN De Prak Meng nsi ei Silo. Yoni ijem sapi di nide njap ug ei ari bingwam ningai ningut gom ba, ipwoi tepun kron gom kin ba anggur ningei naham nindig gom cem bimbut tut.

²⁵Tirigi ibui sapi dima bingwig lene ibuwak Samuel bindo noni bak Eli.

²⁶Leu api Hana pai bak Eli “Andigpoi e, dijem ampon bina. Ayok ngon kep dani e? Dani ne sop po kuk no bak Tuhan bingat nadi ei mpia dini nipou su pima ri.

²⁷Dahara Tuhan leu binhyepo Noni bindei ba, disrek tut dipmot dini lene Noni buhup dihyet bit leu nok dahara Noni tu.

²⁸Gima rino dikwei ba, didimig dipmot ei mem gima yai kep Tuhan de midyai nya bijem niceu bit TUHAN kikau ug bipek niyaijo ningwig honti.” Hana pai nok rino yahagom ikuk yok bak TUHAN ei mpia dima.