Read Hatam SAMUEL GI NIGOM 12 Bible Online

SAMUEL GI NIGOM 12 - Hatam bible

SAMUEL GI NIGOM 12

¹Mpe dima lene Samuel pai bak mben Israel “Diyai hagom bit leu nok jingon kanti tu. Dita jide nibou ndig tu.

²Nogindia noni mibie tut je. Jingat i! Diwer andig-ndau ba, dibou tiei su. Dinok jide nibou habiei tirigi dipilei yo kikau kwei bipek ammani kep. Jo nibreisi mem je tug hon dipmot bat cin di iwer andigpoi su dima.

³Nogindini diya hak ei joho bei. Gino dipigau hanjop hi tu lene ma jipai kep da bou TUHAN kin nibou ndig di Noni ndo ei su igyai him. Gino dimbrai hiter de sapi kin keledai lene ma jipai igbit. Gino diris hi bidimbuk tut hi ba, hi ba mitiei bingot kep da cem lene ma jipai igbit leu binhyepo dingkwei mun dima yok hanyen bak niceu.”

⁴Lene nide limwa nya ibuhup “E bi! Aris nye ba, ambuk tut nye ba, ambrai mindhe-ndhe hi leu nye cem bi sren.”

⁵Gima rino Samuel pai biyok “Njap di ammani ne TUHAN kin nibou ndig di Noni ndo ei su yahacem imiap jibuhupti ba, jo nibreisi bipia dingon ngun.” Lene yo dima ibuhup “I, TUHAN miap nyeni nihyet tu.”

⁶ Lene Samuel binut nihyet bu bipai “TUHAN Nonti dimig Musa kin Harun ei leu api buwak jidigup bat-jidigai bat nya kwei leu minu Mesir.

⁷Nogindini ma jiya jiyati hak ug. Midipai kep jinghapti ei TUHAN Noho bei ug e. Ma jiyok ngon kep Nide nisingat tut jeti nya di Noni ndo bijeni kin jidigup bat-jidigai bat nya cem hagom.

⁸ Tirigi po Yakub kin nide bat nya yuug ei minu Mesir leu api mben Mesir ico kep yok pima lene jidigup bat-jidigai bat nya yahara TUHAN leu binhyepo mpu yok. Apino Noni pinak Musa kin Harun ug ndam yok. Lo bi lene yo cin dima ibuwak ide limwa nya kwei leu minu Mesir leu binhyepo ikwei bong kei igwam kei ei minu dini.

⁹ Noro Nide limwa nya ingon prion ser TUHAN di nok ide Allah apino Noni sindui sut mben Filistin kin nibou ndig Mben Moab kin Sisera po nibou pran leu Hazor pima yahagom injei siceu bihwen jidigup bat-jidigai bat nya leu api ngkiai nya dima inyeng tak kep yok.

¹⁰ Lo bi lene jidigup bat-jidigai bat nya yahara TUHAN bu bipai ‘TUHAN e, nibon sisar ba, ningkek ndok tut Na leu api nikuk nye bak kwar Baal kin Asytoret tu. Ma ateu nye biningwes ngun leu nyende siceu nya apino minikuk nye biNani bu!’

¹¹ Lene Noni pinak Gideon bibie kin Barak ei niabiati kin Yefta ya abia kep noni bu yahagom leu api pinak dani cem kwei ei ningwigsi. Bikwop nyeni nahagom niteu je bijingwes ngun leu jide siceu nya indati leu api jibong kei jigwam kei.

¹² Noro mpe di po jo nibreisi mem je bipia Nahas di nok nibou ndig mem mben Amon hwen je pima lene jikou sut TUHAN di nok nibou ndig mem je leu api jipai bida bipia jijoi sut mem gima nibou ndig gom ninyeng tak kep je.

¹³Nogindini ma jahagom jingat i! No dini ne nibou ndig di jidimig ei su ri. Jibidip huk da tut nibou ndig gom leu api TUHAN ta noni mem je tu.

¹⁴Gino jinggei sut TUHAN ba, jidimig jenti ei mem Noni cem jimiap kep nicuk jeti nya bijibit nihyet cem ba, jeni kin jide nibou ndig jingon gom tut Noni lene mijiyai ningon nggei-hi-nggei.

¹⁵Ne gino jimiap kep Noni nihyet ba, jijoi sut nicuk jeti nya bi lene Noni miba nitok bak jeni kin jide nibou ndig.

¹⁶Nogindini ma jiya jiyati hak ug ba, jingig jiyai kep mun di mindur di TUHAN mibibon mem je.

¹⁷Mbro nok gino nijam dini ne bed di biang mpia ngei rin lo, midingat nadi lene Noni mibindei ba, kru micut lene mpia but. Tirigi jingat gima bou jiyai him lene mijo nibreisi mem je bipia jibon sisar nindig bibor tut TUHAN tirigi po jibidip huk Noni tut nibou ndig di ninyeng tak kep je.”

¹⁸Gima rino Samuel ngat nadi lene TUHAN bindei ba, kru cut lene mpia but mem njap dima. Apino yo dima yahagom ittin tut TUHAN kin Samuel cem.

¹⁹Leu api ipai bak Samuel “Andigpoi e, angat nadi bak TUHAN di nok ade Allah mem nye ser nhyema nitug ndei nimai bi. Jo nibreisi mem nye tu bipia nibon sisar tirigi po nahara mem nibou ndig di ninyeng tak kep nye pima ba, nibikum ei nyende sisar nindigsi nya hagomti.”

²⁰Lene Samuel buhup “Dwai! Mbro nok gino jibon mun di kinei bibor dima lo, ma jiba jinghim bak TUHAN au. Noro ma jiba jingon titut yam bikuk je biNoni kikau.

²¹Ma jiba joho rok kwar nya au. Bit bon yoni impu je ba, iteu je bijingwes ngun kan bi lewo innei dihip ihwap nsi bi.

²²Allah preu ei mem je tug hon neheng bipia Noni mikes je ei bi sren. Lewo Noni dimig jeni ei bijinok Nide limwa nya.

²³Noro tut dani ne dikou sut gi dibon sisar tut Allah tug hon gi dikes hon ba, dingat nadi tindei je bu bi. Noro midingginau je tut jiyai munti di kei bibor kin mun di suar jiba jingon gom biyai cem.

²⁴Ma jibit Allah nihyet lene ma jiba jingon gom kin jingon titut yam bikuk je bak Noni. Ma jiyok ngon kep mun di mindur di Noni bibon mem je nipou su nya.

²⁵Noro gino jita jibou ei nibon sisarti kikau lene jeni kin jide nibou ndig jahagom mijitug ndei nimai.”