Read Hatam SAMUEL GI NIGOM 16 Bible Online

SAMUEL GI NIGOM 16 - Hatam bible

SAMUEL GI NIGOM 16

¹Bed poi ser lene TUHAN hig ser Samuel “Apig api akes hon ba, angon ngguk tut Saul bu bi i? Dikou sut noni nok nibou ndig mem mben Israel. Gima rino ma apwoi ampou tut mini zaitun leu api ambut tut ug ei Betlehem ba, anggok ser Isai lewo didimig nipmot hi ei nok nibou ndig bu.”

²Noro Samuel hig ser “Ui! Notou diyai nok gima i? Gino Saul miap tut lene noni mikes nimai ei da dip ug ri!” Lene TUHAN buhup “Ma ajem sapi nipmot bo gom leu api apai ba, abitot hagau bipia abon midut nindig mindhe gom bak Dani ei sirima.

³Lene ma ahig Isai kwei ei nibon midut nindig mindheti dima leu api midindo dingon kanti bina. Ma ata no di dindo no bina nok nibou ndig.”

⁴Lene Samuel yai hagom bit leu nok TUHAN nicuk noti leu api mbut ug ei Betlehem. Noni kwei krau lene nibou minu dima nya iba inghuisi di mpig sut kwei um noni bihig ser “Andigpoi di akan huk mindur kan e, aba angon di kwes kin nye bikwei cem kep nyeni e?”

⁵Lene noni buhup “I, dingon kwes kin je lo, dikwei mem dibon midut nindig mindhe kep hum bak TUHAN. Ma jibon midut nipiap jenti bipwoi leu api jikwei bit da.” Lene noni cuk Isai kin nipmot bat nya cem bipia ibon midut nipiap yonti bipwoi leu api hig yoni cem ikwei bit nibon midut nindig mindhe kep hum bak TUHAN dima.

⁶Tirigi yahagom induk yam kwei su lene Samuel ngat Isai nipmot Eliab bikan “No ri! TUHAN dimig noni ei su.”

⁷Noro TUHAN srep bipai “Ma angig ayai kep no dima ningkek dip kin nintig bou di jei au. Dikou sut noni lewo dikos tut dingon kanti bit leu nok tungwatu nya ide nikos tutti nya bi. Lewo tungwatu nya ingig igyai kep tungwatu nya ingkek dip noro Dani dingig diyai kep ingonti.”

⁸Lene Isai hig nipmot Abinadab kwei bindo noni bak Samuel. Noro Samuel pai “TUHAN dimig noni ei cem bi.”

⁹Lene Isai buwak Syama kwei noro Samuel pai “TUHAN dimig noni ei cem bi.”

¹⁰Lene Isai buwak nipmot bat ibou muhwindacan kwei sindam bindo yok bak Samuel lo, Samuel pai “TUHAN dimig igom leu yo dini ei cem bi.”

¹¹Lene noni hig ser Isai “Apo apmot bat nya yahagom rin dini e?” Lene noni buhup “Dipmot nipumiap no rinaha lo, ug hyen domba nya leu su yo.” Lene Samuel pai “Ahig noni kwei. Lewo nyeni ibon midut nindig mindhe kep hum bak Allah bi bibou noni kwei krau ug e.”

¹²Gima rino Isai cuk tungwatu nya ba, hi ug buwak Daud kwei. Isai nipmot dini ubbu bibor ba, ninghuisi kei bibor ba, niyai nggrop mbris kei cem. Lene TUHAN pai bak Samuel “No dini ne no di didimig ei su ri! Ma ata noni!”

¹³Haninyai Samuel hit ampou tut mini zaitun pima bisiber ei Daud nibou nggram him bou nikindig bat nya igyai him. Mpe dima lene TUHAN Ninnei sindem tut noni ba, ningat rin bit noni kikau. Lene Samuel ngkwei hanyen ug ei minu ndig Rama.

¹⁴Jei bi lene TUHAN Ninnei kes Saul ei leu api TUHAN pinak ninnei rom gom di kwei hwen bit noni.

¹⁵Gima rino nide awak nya ipai binoni “Andigpoi e, Nikan tut bipia TUHAN pinak ninnei rom gom di kwei hwen bit na.

¹⁶Gima rino ma na di Andigpoi asindui sut ba, nuug nggok ser no di kek nggong mbrei igkei ba, nibuwak noni kwei. Tirigi ninnei rom hwen bit na di Andigpoi lene no dima mikek nide nggong mbrei bibindei ba, angon jo nyahan hanyen bu.”

¹⁷Lene Saul cuk yok bipai “Nna ba juug nggok ser no di kek nggong mbrei igkei leu api jibuwak noni kwei.”

¹⁸Tirigi noni pai nok lene nide awak gom pai cem “Isai di bong ei Betlehem yai nipmot gom di kek nggong mbrei igkei ba, no rinaha. Mimbri kui ningkek bikon pran kan. Noni ubbu bibor ba, ninghuisi kei bibor ba, mbrap kan cem lewo TUHAN mpu noni kikau.”

¹⁹Gima rino Saul sok nihyet bak Isai bipai binoni “Acuk apmot Daud di hyen kep domba nya kwei biya ei doho bei.”

²⁰Lene Isai tin ei kambir nipmot ningut gom kin keledai ningut gom di mbut tut roti nindak mang bibor kin aigmui mindhe ngkek di mpung tut ba anggur ningei cem bikes hagom ei Daud nindati leu binhyepo noni yai hagom bak Saul.

²¹Nok gima ne Daud kwei ya kui Saul apino Saul joi sut noni nindig bibor bidimig noni ei mem gima ttei kep nide minggwen nya.

²²Jei bi lene Saul sok nihyet bak Isai bipai binoni “Dijoi sut Daud nindig bibor. Ma asindui sut noni biya kui da kikau.”

²³Hon kep njap dima kui ne mpe dino Allah pinak ninnei rom pima kwei bihwen bit Saul lene Daud ug yai nide nggong mbrei ba, kek. Apino ninnei rom pima hei leu Saul leu api ningon kwes hanyen bimbut sindem.