Read Hatam SAMUEL GI NIGOM 19 Bible Online

SAMUEL GI NIGOM 19 - Hatam bible

SAMUEL GI NIGOM 19

¹Mpe di gom ne Saul pai ningon kanti bak nipmot Yonatan kin yo di igya kui noni yahagom bipia noni miyai nimai bak Daud. Noro Yonatan kin Daud ingon ce yam bi.

²Gima rino Yonatan ug pai bak Daud “Dicig bungwam mem gima yai nimai bina. Gima rino ma angon sok kep nanti mem njap di hyep bu. Ma aku na nyahan nding leu tungwatu nya igyai him lene ma akiju-kiju nyen au.

³Tirigi dicig nyeni nuug ei briep ndigsi di aku na nyahan eisi lene midihig pus noni tut ningon kanti. Gino dimiap tut ningon kanti lene midipai bina bu.”

⁴Lene Yonatan nggei sut Daud bak Saul bipai “Arig e, ma abindei ba, mun di buhun cut igkep ade awak di Daud au. Noni yai mun tunggwei sut nani hi bi sren. Noro niyai munti nya hagom ngat ningat di kei mem na.

⁵Noni nggok nimai eisi tirigi po noni yai nimai bak Goliat pima leu api TUHAN sindem tut nye di mben Israel tug hon nihwen Goliatti leu api sihwen side siceu nya ba, itimek bingwig. Arig e, mpe di po angat gima lene ajoi sut noni nindig bibor. Arig e, nggon rino ma ahwen bit no di ningon ngun ba, ayai nimai binoni mikui-kausi i?”

⁶Lene Saul ningon huk niti tut Yonatan nihyet leu api heng bitug hon TUHAN ninyeng bipia miyai nimai bak Daud bi.

⁷Lene Yonatan hig Daud kwei bindat kep Saul nihyet hagom bak. Lene noni buwak Daud hanyen kwei ei Saul noho bei leu api Daud ya kui nibou ndig hanyen bit leu nok niyai kepti.

⁸Mpe dima lene tentara Filistin ikon pran bit mben Israel hanyen bu. Noro Daud nya ihwen yok bibindei cut yok bibor apino yahagom inang ningwig a.

⁹Mpe di gom bu tirigi Saul gwam ei nide ig bikrau nide micim ei nindati lene Daud cem gwam bit noni bikek nide nggong mbrei. Nok rino ninnei rom di TUHAN pinak kwei coi ei Saul ningonti.

¹⁰Leu api noni ba nide micim bihwen Daud di ya kui dring noro Daud pri leu micim dima bitibim dringti leu api nang leu ig bei nsi dima ba, ningwes ngun.

¹¹ Ariman mmun lene Saul cuk nide tentara nya ibou poi ug ba, iku yok nyahan ei Daud de biyati bingig igyai kep nide ig leu binhyepo igyai nimai binoni mem njap tekti. Noro Daud nitnem Mikhal pai binoni “Gino anang mem mmun dini bi lene njap di hyep migyai nimai bina ug ri.”

¹²Gima rino noni huk kuk tut Daud ei kendera mihyeti leu api noni nang biningwes ngun leu.

¹³Gima ngwig lene Mikhal ug kon nide bat nya ide kwar di ikuk yok bak gom kwei lene kes bibong ei Daud nibongti. Leu api noni kes bitau di noni ba kambir ninta bibon ba, kwar bitau. Lene ba ban gom binggai kep hagom.

¹⁴Tirigi yo po Saul cuk yok kwei mem gima ikat Daud itau su lene Mikhal pai biyok “No nggwen di bonga.”

¹⁵Noro Saul cuk yoni hanyen ug leu binhyepo igyok igyai kep Daud ei nibongti lene pai biyok “Ma jikon mun di bong niti tut noni kwei leu api midyai nimai bak.”

¹⁶Yo dima icoi ug ei ig bei nsi bingat lo, kwar he rino bong nibongti ba, bitau kambir ninta di nok bitau.

¹⁷Lene Saul hig ser Mikhal “Nggon rino aris da ba, asindui sut ditde siceu dima nang biningwes ngun i?” Lene Mikhal buhup “Gino disindui sut noni nang ba, ningwes ngun bi lene noni miyai nimai bida.”

¹⁸Gima rino Daud ningwes ngun buug ngat Samuel ei minu ndig Rama bindat kep Saul nibibon noti hagom bak. Lene yahacem yuug ei Nayot bibong ei sirima.

¹⁹Noro hi pai bak Saul bipia Daud ug bong ei Nayot dideu minu ndig Rama tu.

²⁰Gima rino Saul cuk nide tentara nya ibou poi ug ei sirima leu binhyepo ikat Daud kwei. Noro yoni yuum nabi nya nimpung gom di ipri-pri nyen ba, imbos-hi-mbos lo, Samuel bie tut yok. Lene Allah Ninnei sindem tut Saul de tentara dima yok leu api yoni cem sindi ipri-pri nyen ba, imbos-hi-mbos.

²¹Tirigi yo dima inghapti tibim ug ei Saul nitingou nsi lene noni cuk nide tentara nya ibou poi bu. Noro Allah Ninnei sindem tut yoni cem leu api sindi ipri-pri nyen ba, imbos-hi-mbos. Lene Saul cuk nide tentara nya ibou poi nimbiningai bu lo, mun pima pek kep mem yo dima cem.

²²Lene Saul nonti mbut ug ei minu ndig Rama. Tirigi noni kwei krau minyei bousi nindig ei Sekhu lene hig ser timiei minu dima tut Samuel kin Daud ibongti leu api ibuhup bipia ibong ei Nayot.

²³Mpe dino Saul ug ei puig sinon lene Allah Ninnei sindem tut noni cem bu leu api noni pri-pri nyen ba, mbos-hi-mbos kak nimbutti kikau bipek Nayot.

²⁴ Lene noni cem juk nide sinsun leu api ba ningat ngu bipri-pri nyen ba, mbos-hi-mbos bu ei Samuel noho bei leu api bong tut ningat nguti ei dihyei ninjek dip kikau mem mmun-njap gom. (Niyai munti dima bindei ba, tungwatu nya sindi ihig ser yam “Saul cem no di nabi e?” Gima ne nihyet nibiti ninda dima nitriti ri.)