Read Hatam SAMUEL GI NIGOM 21 Bible Online

SAMUEL GI NIGOM 21 - Hatam bible

SAMUEL GI NIGOM 21

¹ Lene Daud mbut ug ei Nob ba, cem kep Imam Ahimelekh. Lene no dima ba ninghuisi di mpig sut behei leu ig bei buug um Daud lene hig ser noni “Nggon rino ambut binangkom kwei i?”

²Lene Daud buhup “Nibou ndig cuk da kwei mem gima diyai midyai gom lo, cuon ser da nhyema dimbot kep tut midyai dima bak hiter au. Leu gima rino dicuk ditde limwa nya yuug ei minu ttou nsi gom leu api miduum yok ei sirima.

³Dijem ampon bina bidihig ser na tut njita niken di jo bina. Ma akwas roti nindak muhwi e, he njita hiter di jo bina e, hi tut da.”

⁴Lene imam dima buhup “Roti hi jo binye bi noro roti nibon midut niken no jo. Gino ade limwa nya igyem njita tut itnem bat nya njap poi gi pini jug bi lene ma ayai roti dima hak ug.”

⁵Lene Daud pai binoni “Dwai. Ditde limwa nya ingon sok kep yonti ser ba, ibon midut ninghuisi kwes bikwop mpe dino ikinyon ei midyai di nibou ndig ndo biyokti. Noro tut midyai di igyai mem njap di ammani ne ingon sok kep yonti ser nindig bibor bu tu.”

⁶ Gima rino imam dima yai roti nibon midut di ipigig sut mem Allah dima bak Daud lewo nide roti hi jo binoni ei ig bei bi. Tut roti pima ne imam kon gima hanyen kwei leu meja di ipigig sut mem Allah lene ba roti nijep-jau biluei bu tu. (

⁷Njap dima ne Doeg di nok nibou mem yo di ighyen kep Saul de mindhe-ndhe nya ningat rin ei mpia dima mem gima bit midut di yai kep ngan-ngan tu gom. No dini nitimieisi leu Edom.)

⁸Leu api Daud hig ser Ahimelekh “Andigpoi e, ayok micim hi e, he ayok simeda hi e, ei mem gima dittei ser da bi e? Nibou ndig ba nibinang cuk da apino dikiju bidimbut hak leu di digiyai simeda hi e, he minggwen hiter nya e, mem gima dittei bi ug a.”

⁹ Ahimelekh buhup “Simeda di Goliat di mben Filistin po ayai nimai bak ei Mbang Briep Ela pima nide ne no dikes ei a. No diba minyahas binggai di dikes ei sinsun efod ninghima. Gino ajoi sut lene ayai hak ug. Lewo minggwen dima he rino jo ei mpia dini.” Lene Daud pai “Ayai bida hak ug lewo simeda dima kei-kau dor njiriek simeda nindigsi hagom.”

¹⁰Lene Daud mbut binang leu Saul mem njap gom dima kikau ba, ug ngat Akhis di nok nibou ndig ei minu ndig Gat.

¹¹ Lene yo di igya kui nibou ndig Akhis ipai bak “No dima ne Daud di nok nibou ndig mem nide minu ri. Noni ripo mpe dima nide limwa sop nya ibien-bien nyen bingon mingon drek dip noni bipai doia bipia Saul yai nimai bak nide siceu nya ibou sribu-ribu gom noro Daud yai nimai bak nide siceu nya ibou sribu-ribu simnai.”

¹² Ighyet dima hwen-hwen nyen Daud nibou ngwakti bibindei ba, noni digit tut Nibou Ndig Akhis bibor.

¹³ Gima rino Daud bon nonti nok no di mirei bon ei yo dima yahagom yoho bei. Yoni ipi bibindei ba, ningon jo nyahan noro bi lewo bon nonti nok no di nibou ngwakti kwes bi. Ba, kam-kam nyen dimbou pmem ei minu ndig[8] dima lene bisinggre bisindui sut nirai binduk bisilipti nuhui nta.

¹⁴Apino Akhis pai bak yo di igya kui noni “Jingat i! Mirei bon dima! Nggon rino jibuwak gi mirei bon dima kwei bida i?

¹⁵Yo di ibou ngwakti kwes bi di ibong ttai da nya dem bi apino jibuwak no di mirei bon dini kwei ei ditde ig dini e?”