Read Hatam SAMUEL GI NIGOM 27 Bible Online

SAMUEL GI NIGOM 27 - Hatam bible

SAMUEL GI NIGOM 27

¹Mpe dima lene Daud kan “Jei bi lene Saul miyai nimai bisa ri. Gima rino nna ba sinang ba, suug bong bit mben Filistin hak ug lewo puig hiter mem sa bu bi. Gi nok lene Saul mikes hon binggok-nggok nyen sa ei mben Israel ikieti bu bi. Apino misingwes ngun lewo sibong nyahan ei Filistin.”

²Leu api Daud ya tut nide tentara ibou sratus muhwindagom dima ba, inang ndam Akhis di Moah nipmot di nok nibou ndig ei minu ndig Gat.

³Ba, ya tut nide tentara nya bitut ide ig bei nsi nya hagom bibong timiei ei minu ndig Gat. Daud kin nitnem bat cin di Ahinoam di sop timiei Yizreel kin Abigail di sop kibom di nitimieisi leu Karmel tug hon Nabal nimaisi pima cem ibit noni.

⁴Tirigi Saul miap Daud ninghapti tut gi nang buug ei Gat tu lene mem kep ser nituti mem gima kat noni bu bi.

⁵Leu api Daud pai ningon kanti bak Akhis “Gino na di Andigpoi angon kwes kin da di dinok ade awak lene ma akes minu mien gom ei minu ting leu minu ndig nibousi dini binye leu binhyepo nibong timiei eisi. Gi nok lene da di dinok ade awak midibong bit na di Andigpoi ei minu ndig di nok nibousi dini bi.”

⁶Leu api Akhis kes minu mien di Ziklag bak Daud. Gima rino nibou ndig mben Israel inyeng tak kep Ziklag kikau kwei bipek ammani kep.

⁷Daud bong bit mben Filistin bidem ari bingwam nitindur gom ba, bed bitai.

⁸Ei nijam di jei dima lene Daud ya tut nide tentara nya ba, icut igkep mben Gesur kin mben Girzi kin mben Amalek bihwen yok ningwig a. Mben dima yok ibong timiei mimbrek ngan ei dihyei hanjop nsi dima tu. Daud hwen ide minu ndig nya kikau ug ei Sur kikau bipek minu Mesir cem.

⁹Tirigi Daud ya kep bihwen yok lene noni yai nimai bak pinai nya kin sop nya yahagom bipos domba nya kin sapi nya kin keledai nya kin unta nya bitut sinsun nya cem. Leu api ngkwei sut hanyen ba, ug ngat Akhis.

¹⁰Gino Akhis hig ser noni “Ahwen timiei minu ndig di tou njap di ammani i?” Lene Daud mibuhup bipia noni ug cut igkep yo di ibong ei Yehuda nite bei mpia nibiho kin mben Yerahmeel ide dihyei hanjop nsi kikau ug ei mben Keni ide dihyei hanjop nsi cem.

¹¹Igisindui sut timiei minu ndig di ihwen yok dima yok ba, tungwagom niyai gijo cem bi. Daud yai nok gima leu binhyepo timiei minu dima yok ibisau kwei ei Gat ba, ipai igbit tut Daud kin nide tentara nya di ihwen yok bisar ningwig dima bi. Tirigi Daud bong bit mben Filistin lene yai nok gima kikau.

¹²Noro Akhis ba ningon com Daud lene kan “Daud de mben migga noni bibor apino bitig dino noni minok awak mem da kikau ug bipek niyaijo ningwig honti.”