Read Hatam SAMUEL GI NIGOM 28 Bible Online

SAMUEL GI NIGOM 28 - Hatam bible

SAMUEL GI NIGOM 28

¹Bed poi ser lene tentara Filistin induk yam bikon pran bit mben Israel. Leu api Akhis pai bak Daud “Jo nibreisi mem na tu bipia suar nani kin ade limwa nya jahagom jitti kin dani kin ditde tentara bijihwen ditde siceu nya e?”

²Lene Daud buhup “Igbit ri! Dibon danti nok na di Andigpoi ade awak. Mbigom na di Andigpoi angat mimbri di kui dingkek brei bou ayai him.” Gima rino Akhis pai “Kei bibor! Dita nani ba, anok no di ya kui da ba, acuon ser diyaisi kikau.”

³ Samuel mai su ba, mben Israel yahagom ingon ngguk tut noni nindig bibor lene ibitig ningut cem ei nitimieisi di minu ndig Rama tu. Ei nijam dima cem Saul jji yo di iko bibinggok nya kin nung nya yahagom bingwig leu mben Israel ide minu tu.

⁴Mpe dima lene tentara Filistin induk yam kwei dideu minu ndig Sunem ba, yohok ide prak meng yati ei mpia dima. Lene Saul nduk tentara Israel ei Nungug Gilboa ba, yohok ide prak meng yati ei mpia dima.

⁵Tirigi Saul ngig niyai kep tentara Filistin lene ningon nde bibor.

⁶ Gima rino noni hara TUHAN mem gima ndo bindo binoni. Noro TUHAN buhup nihyet tug hon mumpriem nya kin Urim kin Tumim kin nabi nya ighyet bi.

⁷Lene Saul cuk yo di igya kui noni bipai “Juug nggok ser sop di nung kui leu api midihara noni mem gima ndo bindo bida.” Lene ibuhup “Sop di nung kui no bong ei En-Dor.”

⁸Lene Saul luei nitta ba, juk sinsun bit leu nok niyai kepti bi noro juk sinsun hiter bu. Lene noni kin yo di igya kui noni ibou can imbut mem mmun ba, yuug ngat sop dima. Leu api Saul pai binoni “Ma ako ba, anggok tut no di dindat kep ninyeng bina ningwes leu binhyepo ningwes mindo igbit mun di mipek kep mem da ei nidipti bu bida.”

⁹Lene sop dima buhup “Akan tut Nibou Ndig Saul nicuk nyeti bi e? Noni jji yo di iko bibinggok nya kin nung nya yahagom bingwig leu mben Israel ide minu tu. Nggon rino aba mun dima bisrou da leu binhyepo ditug ndei nimai i?”

¹⁰Noro Saul ba neheng bibuhup “Deheng bitug hon TUHAN di niyaijo ninyeng bipia atug ndei hukum drek dip ayai munti dini bi.”

¹¹Lene sop dima hig ser noni “Nnaba na di Andigpoi ajoi sut diko bidibinggok tut tou ningwes i?” Lene Saul buhup “Samuel.”

¹²Tirigi sop dima ngat Samuel ningwes bou niyai him rino noni ba nihyet nindig bibor bahara leu api hig ser Saul “Nggon rino aris mun bida nok i? na di Andigpoi ne Nibou Ndig Saul ri!”

¹³Lene nibou ndig buhup “Dwai! Angat mindei ngan i?” Lene sop dima pai “Dingat tungwagom ningwes di kiju leu dihyei jou kwei.”

¹⁴Leu api Saul hig ser noni “Nitta no tou i?” Lene sop dima buhup “Andig-ndau gom di juk sinsun ndok di jei.” Pai nok lene Saul kan tut bipia gima ne Samuel ningwes ri. Gima rino noni ba nibiau bicom mpia biba ningwak bikik dihyei leu api kon Samuel ninyenga.

¹⁵Lo bi lene Samuel hig ser Saul “Nggon rino abindin da i? Nggon rino abindei bidikwei hanyen i?” Lene Saul buhup “Mun di buhun bibor cut igkep da tu! Mben Filistin mikon pran bit da bigyai nimai bida noro dikan tut bipia Allah kes da ei su. Noni buhup dihyet tug hon nabi nya ighyet kin mumpriem nya cem bu bi. Gima rino dihig na kwei leu binhyepo apingok dingonti tut mun di midiyai.”

¹⁶Lene Samuel buhup “Gino TUHAN kes na ei ba, bon Nonti nok siceu ndam na tu lene nggon rino ahig da kwei i?

¹⁷ TUHAN bibon na bit leu nok gi po Noni pai bina tug hon dani nipou su. Noni yai anyeng di tak kep ade limwa nya leu na ba, yai hanyen bak Daud leu api noni ya luei ahoti bu tu.

¹⁸ Tirigi po ahwen mben Amalek pima lene abit TUHAN nicuk nati bi. Lewo ayai nimai bak yahagom ba, anggek ide mun di jo biyoni hagom bingwig bi. Nogindini Noni bibon nani kinei nok gini drek dip mun pima yok hagom.

¹⁹Noni mikes nani kin mben Israel jahagom ei tentara Filistin indati. Njap di hyep bu lene nani kin apmot bat nya jahagom mijiba je kum da ei mpia dini leu api tentara Israel yahagom micut bak tentara Filistin.”

²⁰Tirigi Saul miap nok tu rino tti ug ei dihyeisi lene ningon digit tut Samuel nihyet nindig bibor. Ba, ninghuisi mbris bibor cem lewo noni yem njita mem njap jei dima bi.

²¹Lene sop pima kwei ngat lo, Saul ningon tai-tai bou sut nihyet pima nindig bibor. Gima rino pai binoni “Andigpoi e, dinggok dimai eisi tirigi diyai igbit acuk dati pima.

²²Nogindini ma ayai igbit dingon kanti gom dini ug e. Asindui sut da bidikwen njita mem na di Andigpoi. Suar ayem njita kep anggum leu binhyepo ayai nisindem mem gima ambut amig ba, angkwei hanyen.”

²³Noro Saul kou sut bipai “Midiyem njita bi!” Noro yo di igya kui noni ibidip huk noni tut. Leu api noni ce bikiju leu dihyeisi lene gwam nyahan ei nibongti.

²⁴Lene haninyai sop dima bui sapi nehen pap ningut gom bibam. Lene ug yai tepun di roti ninjep joti bi bikang nok roti.

²⁵Lene noni ngei njita dima bak Saul kin yo di igya kui noni leu api igyem bindei yok. Lo bi lene ikiju mem mmun dima bingkwei hanyen.