Read Hatam SAMUEL GI NIGOM 29 Bible Online

SAMUEL GI NIGOM 29 - Hatam bible

SAMUEL GI NIGOM 29

¹Lene mben Filistin induk ide tentara nya bidem yam ei Afek. Noro tentara Israel yohok ide prak meng yati dideu minyei bousi ei Mbang Briep Yizreel.

²Lene mben Filistin ide nibou ndig ibou muhwi injei sut ide nimpung gom-gom ba, nimpung dima yok bihi ibou sratus gom lene bihi ibou sribu gom. Daud ya tut nide tentara nya ba, injei bram yam bigya abia kep yok bibit nibou ndig Akhis.

³Lene nibou pran mben Filistin ingat Daud nya ba, ihig ser yam “Tentara Ibrani dima yok ikwei mem mindei i?” Lene Akhis buhup “Gini ne Daud di nipou yo nok nibou tentara gom mem Nibou Ndig Saul leu Israel ri. Wer bong mimbrek bit da tu. Tirigi po noni kwei bong bit nye pima ne noni bon mun di tunggwei hi bou diyai him bi kikau kwei bipek ammani kep.”

⁴Noro nibou pran mben Filistin ingon sibui sut Akhis bipai bak “Acuk no dima bingkwei hanyen ug ei minu mien di ayai binoni tu. Ma ace tut ba, noni kon pran bit nye au. Leu ma hi rino igya pranti lene noni mikiek no kep nye bihwen nye. Leu gima mibon nituti di kei bibor mem noni bipwoi nide nibou ndig Saul ningon tug hon gi yai nimai bak nye di tentara Filistin.

⁵ Noni ne Daud di nipou pini jug sop nya ibien-bien nyen bingon mingon drek dip noni bipai doia ‘Saul hwen nide siceu nya ibou sribu-ribu gom noro Daud hwen nide siceu nya ibou sribu-ribu simnai ri.’ ”

⁶Lene Akhis hig Daud kwei bipai bak “Deheng bitug hon TUHAN di niyaijo ninyeng bipia nani ne no di ningon gom ri. Gima rino dijoi sut gima aya kui da ba, sikon pran dini. Lewo dingat atunggweisi hi ei nimbie him tirigi po akwei bong bit da pini jug kikau kwei bipek ammani kep bi. Noro nibou ndig nindigsi nya ijoi sut nani bi.

⁷Gima rino ma aba angon di jo nyahan ba, anyohou ngkwei hanyen ug ei ade minu mien pima hak ug. Ma abon mun di biyai nibou ndig dima yok ingon di sibui sut nani au.”

⁸Lene Daud buhup “Na di Nibou Ndig e, dibon mun tunggwei sut na nok mindei ngan i? Gino Na di Nibou Ndig apai sut da bipia agingat ditunggweisi hi ei nimbie him tirigi po dikwei bong bit na kikau kwei bipek ammani kep bou ayai him bi lene nggon rino ace tut ba, sikon pran bit ade siceu dima bi i?”

⁹Lene Akhis buhup “Akan tut bipia diba dingon bisrip huk na nok no di ningon gom noyam kin Allah de malaikat. Noro nibou pran nindigsi nya ikos tut mem nani bipia abit nye ba, igya pran diniti bi.

¹⁰Gima rino Daud e, ma je di jinang leu Saul ba, jikwei tti kin da pima jahagom jikiju mem njap tekti di hyep bijingkwei hanyen haninyai nipou tirigi mpia yaisi pri bicom digai jimbutti bigyo.”

¹¹Gima rino Daud ya tut nide tentara nya mem njap tekti ba, ikiju bimbut. Ingkwei hanyen ug ei Filistin lo, tentara Filistin injei ug ei Yizreel.