Read Hatam SAMUEL GI NIGOM 30 Bible Online

SAMUEL GI NIGOM 30 - Hatam bible

SAMUEL GI NIGOM 30

¹Daud ya tut nide tentara nya bingkwei hanyen ba, yuug krau Ziklag ei njap gi niningai bingat lo, tentara Amalek injei bihwen hanjop Yehuda nite bei nibiho ba, bitut Ziklag cem bindig minu ndig dima bitimek bingwig.

²Igyai nimai bak timiei nya bi. Noro ikat sop nya kin munggwom nya yahagom bitut timiei nindigsi nya cem bimbut tut yok.

³Lene Daud ngat lo, indig minu ndig dima bitimek bingwig ba, ikat nide ig bei nsi nya bitut nitnem bat cin di Ahinoam kin Abigail kin nide tentara nya ide ig bei nsi nya cem bimbut tut tu.

⁴Apino noni kin nide tentara nya ingon ngguk bram yok nindig bibor bipim kui jei kikau ba, inghuisi mbris bram yok.

⁵ Ningat ne tentara Amalek nya ikat Daud nitnem bat cin di Ahinoam kin Abigail cem bimbut tut.

⁶Daud de tentara nya yahagom ingon buhun bibor lewo imunggwom bat nya kin itnem bat nya ipror bingwig leu yok tu. Gima rino itin ei mem gima iba tig bihwen noni drek dip imunggwom bat nya kin itnem bat nya di ipror leu yok dima. Daud um mun di nggruk bibor dima noro nide TUHAN Allah biwin kep ningonti hanyen bu.

⁷ Leu api Daud pai bak Imam Abyatar di Ahimelekh nipmot “Attei efod dima kwei bida! Lene Abyatar ttei efod dima biyai bak.”

⁸Lene Daud hig ser TUHAN “Suar duhuk bram siceu dima yok e? Gino duhuk bram yok lene midahatap yok bidikat yok e?” Lene TUHAN buhup “I, ahuk bram yok hak ug. Leu mporo ahatap yok lene ateu nimpung di ikat yok di yuug sut yok dima bingwes ngun leu siceu inda nsi hanyen ug ri.”

⁹Leu api Daud ya tut nide tentara nya ibou sratus muhwindagom dima ba, ikiju biyuhuk bram yok. Tirigi yuug krau Minyei Besor nyai lene ibou sratus can ikuk yok bigwam.

¹⁰Lene Daud ya tut ibou sratus bitai ba, yuhuk bram siceu nya kikau noro ibou sratus can pima igwam ei minyei nyai dima lewo inghuisi jet bibor ba, isindem mem gima isigon Minyei Besor biyuug dihip ei nitehi bi.

¹¹Yuug krau puig sinon rino Daud de tentara nya itau kep munggwom pinai mben Mesir gom ei iggum ndigsi bibuwak bak Daud. Lene igyai njita bak biyem lene igyai minyei cem bak bidut.

¹²Igyai roti biei ara nindak kin ba anggur ngat di ningak nimbeu can cem bak biyem. Tirigi yem njita dima bindei no tu lene ninghuisi sindem hanyen lewo noni yem njita bidut minyei cem bi kikau mem njap ningai su.

¹³Leu api Daud hig ser “Andigpoi ade nya ritou i? Akwei leu hantou i?” Munggwom dima buhup “Dani ne timiei mben Mesir rin ba, dinok awak mem timiei mben Amalek gom. Tirigi ninggwenti hwen da lene diceu kes da ei bimbut hak leu da ei njap ningai su.

¹⁴Ninjei binihwen mben Kreti ide dihyei hanjop nsi ei keret Yehuda de hanjop nite bei mpia nibiho lene nihwen Kaleb nide bat nya ide dihyei hanjop nsi ba, nindig minu ndig Ziklag cem bitimek.”

¹⁵Daud hig ser noni “Ace tut gima abuwak da ug ei mpia di yo di isibut dima ibongti e?” Lene munggwom dima buhup “Gino na di Andigpoi apreu ei mem da tug hon TUHAN ninyeng bipia akes hukum nimai ei da dip ba, akes da bak diceu hanyen bi lene midiyai igbit angon kanti.”

¹⁶Nok leu lene noni buwak yok bindo mpia di yo di isibut dima ibongti. Mpe dima lene tentara di isibut dima idis yam bigwam sinsiou bidem mpia dima ba, igyem njita bidut pes cem igyem pesta nindig bibor bibiyai nillei drek dip. Lewo ndigban di ipos di ittei kwei leu mben Filistin kin Yehuda nya nindig bibor.

¹⁷Njapti kui mem gwam ntuisi lene Daud ya tut nide tentara nya ba, ihwen yok kikau bipek mmun kep. Lene pinai pilei ibou sratus bitai di ipri bigwam unta dip nya rino inang di ingwes ngun ug a. Noro siceu nindigsi nya di inang bingwes ngun bi yahagom itug ndei nimai.

¹⁸Daud hwen yok ningwig leu lene teu mun nyeng di mben Amalek ipos nya hagom hanyen bitut nitnem bat cin cem.

¹⁹Mun nyeng gom ngat cem sar bi. Daud teu nide tentara nya imunggwom bat pinai nya kin sop nya kin ndigban di mben Amalek ipos pima yok hagom.

²⁰Nok gima cem Daud pos domba nya kin mindhe-ndhe nihyen kep nya hagom leu siceu dima yok. Lene tentara nya ijem mindhe-ndhe dima yok binjei sut nibie ngat bijo ter leu ndigban di ipos nindigsi nya. Lene ice tut yam bipai “Mindhe-ndhe dini yok mem Daud ri!”

²¹Lene Daud nya ingkwei hanyen bingat ibou sratus can di igibit yok bi di ikes yok bigwam ei Minyei Besor nyai leu gi po inghuisi jet bibor ser imbutti pima. Lene yo dima ikiju bigya um Daud kin tentara nindigsi nya lene Daud dideu yok lene ba ningon di llei bipigo yok.

²²Noro Daud de tentara di ibit di yuug hwen siceu pima yok bihi isibut ba, bihi idrui bou ngwak cem bisrep bipai “Yo dima ibit nye kikau bi. Gima rino yoni mitug ndei mun nyeng hi leu ndigban ngot ndig di nipos kwei pima bi. Ma itug ndei imunggwom bat-itnem bat nya he bimbut tut yok hak.”

²³Noro Daud buhup “Disut bat jen, ma jibuhup nok gima drek dip mun di TUHAN yai binye au! Lewo TUHAN nyohou nye bibindei ba, ibindei timek tentara di isibut dima yok tu.

²⁴Gi mbun tentara hi ce tut jingon kanti dima kan bi! Suar jikwas mun di jimati nimangti noyam. Yo di igwam ser ndigban dima imati noyam kin yo di yuug kon pran imati.”

²⁵Daud tri tut nikos tutti dima leu api mben Israel ikrau kep kikau kwei bipek ammani kep.

²⁶Tirigi Daud ngkwei ug ei Ziklag hanyen lene noni pinak ndigban di ipos leu mben Amalek dima bihi bak nisut bat nibou minu ndig nya ei keret Yehuda ide dihyei hanjop nsi bipai nihyet kin “Gini ne ndigban nite hi di nipos leu TUHAN de siceu nya indati rin ba, ninjei bak jeni.”

²⁷Minu ndig dima yok rino Betel kin Rama ei Yehuda nite bei mpia nibiho kin Yatir kin Aroer kin Sifmot kin Estemoa kin Rakhal kin minu ndig di mben Yerahmeel kin mben Keni kin mben Horma kin mben Bor-Asan kin mben Atakh kin mben Hebron ide nya cem. Daud njei ndigban di kwas dima tut nibou nya ei minu ndig di noni kin nide tentara nya ibong-bong nyen eisi pima yahagom ba, yahagom ima bidem yok.