Read Hatam SAMUEL GI NIGOM 6 Bible Online

SAMUEL GI NIGOM 6 - Hatam bible

SAMUEL GI NIGOM 6

¹Niabiati TUHAN De Brua Gi Preu jo ningkiaisi ei Filistin mem bed nitindur muhwindacan tu lene,

²timiei minu dima ihig ide imam nya kin yo di nung kui yok kwei leu api ihig ser yok “Ninggon ndei Brua Gi Preu dini i? Gino nitug brua dini hanyen bak niceu lene niba mindei kum eisi bu i?”

³Lene yo dima ibuhup “Ma jitug Brua Gi Preu dima hanyen bak Allah kin gi hei he au. Noro ma jikwas jide mun di kei hi tut Noni cem leu binhyepo jibigo gau jide sisar. Tug hon nisinati dima rino mijikei hanyen leu ninggwen di cut igkep je ba, mijo nibreisi mem je bitig dino mben Israel ide Allah kes hukum ei jeni dip cem.”

⁴Lene timiei nya ihig ser imam pima yok “Nikwas mun di kei mindei tut Noni i?” Leu api imam nya ibuhup “Ma jiba mas bibon kwar arimesa njep ningat muhwi kin kwar ncup ningut muhwi ba, jibikwop nibou ndig mben Filistin ibou muhwi. Lewo Allah kes hukum di nok arimesa njep kin ncup di ingwig kep je ei jeni kin jide nibou ndig nya cem dip.

⁵Gima rino ma jiba mas bibon kwar hi nok ningkek dip dimaham kin ncup di igyem jide njita bingwig leu je cem leu api ma jikon mben Israel ide Allah ninyenga. Tug hon nisinati dima Noni mikes hukum ei jeni kin jide kwar nya kin jide dihyei hanjop nsi nya dip bu bi.

⁶Nggon rino jingkek ndok nok gi po nibou ndig mben Mesir kin nide limwa nya ingkek ndok pima i? Ma jiyok ngon kep bipia Noni ba mben Mesir bikek kikau bibou ikes yok bingwes ngun leu minu Mesir ug e.

⁷Gima rino ma jibon kroba nijep-jau gom lene jidimig sapi niwek di yai nido ngei bak nimien yo di iba yok bibrim kroba bi sren yo ningut can lene ma jiprion kroba dima ei inggibi dip. Lene ma jijem sapi nimien cin dima hanyen ug ei ig kandanti.

⁸Lene ma jikon TUHAN De Brua Gi Preu bijikes ei kroba dip. Ma jikes kwar di jiba mas bibon mem jibigo gau jide sisar pima hagom ei jide brua ninsi gomti ba, jikon bijo ei kroba dip simiak Brua Gi Preu. Lene ma jisindui sut ba, sapi nya yonti imbut tut kroba bit leu ingon kanti.

⁹Lene ma jitou kep imbutti. Gino sapi nya imbut hallu kak puig ndam Bet-Semes lene mijo nibreisi mem nye bipia Allah Nonti ripo kes hukum di buhun bibor pini ei nye dip a. Ne gino sapi nya imbut ter lene gima mibindo brei binye bipia Allah Nonti ripo kes hukum dima ei nye dip bi noro mun di buhun bibor dima cut igkep nye mikui-kausi.”

¹⁰Lene yo dima igyai hagom bit leu nok imam nya icuk yoti. Iba kuk bikim sapi nya kin kroba leu api ijem ide sapi nimien cin dima hanyen ug ei ig kandanti.

¹¹Lene ikon Brua Gi Preu kin ide brua tut kwar ningkek dip dimaham kin kwar ncup di iba mas bibon pima hacem ei kroba dip.

¹²Lene sapi nya yonti imbut tut kroba bimbut hallu kak puig ndam Bet-Semes ba, israwir bi. Lene idungwek kak imbutti kikau lo, nibou ndig mben Filistin ibou muhwi pima igya abia kep yok bingkwei hon minu Bet-Semes niya kwas yamti.

¹³Tirigi timiei Bet-Semes nya di ikos ide gandum nintam ei beisi ingat lo, Brua Gi Preu tau kep yok hanyen tu lene ingon nggan-triot kei.

¹⁴Sapi nya ibrim kroba dima bikwei ya simiak tig nindig bibor ei beisi gom di niceu ne Yosua di timiei Bet-Semes. Leu api timiei minu dima inggek kroba bibui sapi nya cem ba, ibon midut nindig mindhe titut kep humti bak TUHAN.

¹⁵Gima rino imam di intun Lewi him nya ikon TUHAN De Brua Gi Preu kin brua di mas joti bikes hacem ei tig nindig pima dip. Lene timiei Bet-Semes ibon midut nindig mindhe titut kep hum kin midut hiter bu bak TUHAN.

¹⁶Tirigi nibou ndig mben Filistin ibou muhwi ingat gima bou igyai him lene ingkwei hanyen ug ei Ekron mem njap gom ndia.

¹⁷Gima rino mben Filistin iba kwar ningkek dip dimaham di iba mas bibon mem TUHAN bigo gau ide sisar. Ipinak kwar mas ningat gom bibikwop ide minu nyeng nya di Asdod kin Gaza kin Askelon kin Gat kin Ekron.

¹⁸Nok gima cem mben Filistin ipinak kwar ncup di iba mas bibon bibikwop ide minu ndig di ide nibou ndig ibou muhwi inyeng tak kep nya bitut ide minu ndig di bon ngug tig bikrop ttai kin ide minu mien di bon ngug tig bi nya cem. Hon kep njap dima kwei bipek nogindini kep lene tig nindig bibor ei Yosua di timiei Bet-Semes de beisi po imam nya ikes TUHAN De Brua Gi Preu ei dip pima rinok tig nibiyok ngon kep mun di pek kep mem mben Israel.

¹⁹Noro timiei Bet-Semes ibou ningot muhwindacan yuug ngig igyai kep mun di jo ei Brua Gi Preu dimati. Gima rino TUHAN kes hukum nimai ei yahagom dip. Apino timiei Bet-Semes nya ingon ngguk tut hukum nindig bibor di TUHAN bindei di cut igkep yok dima.

²⁰Lene mben Bet-Semes ipai biyam “Nyeni ne dem mem gima TUHAN ningat rin ei nyeni ikieti bi. Ma ipinak Nide Brua Gi Preu ug ei sitou leu binhyepo jo minu ting bibor leu nye i?”

²¹Lene isok ighyet bak mben Kiryat-Yearim bipai biyok “Mben Filistin itug TUHAN De Brua Gi Preu hanyen kwei binye tu. Ma jikwei yai leu nyeni hak ug.”