Read Hatam SAMUEL GI NIGOM 8 Bible Online

SAMUEL GI NIGOM 8 - Hatam bible

SAMUEL GI NIGOM 8

¹Tirigi Samuel wer andig-ndau leu su lene noni ta nipmot bat cin ba, inok nikei nya mem mben Israel.

²Mighumbou ninyeng Yoel lene Yoel nikinjoi ninyeng Abia. Yahacem inok nikei ei Bersyeba.

³Noro igyai bram icig niyai kepti nya bi lewo ita ibou ei gi inggok tut mitiei nindig biborti. Gima rino tungwatu iba mitiei bingot kep yok leu apino yoni iba ingon di sren bi bimbus tungwatu nya ingonti cem.

⁴Lene nibou mben Israel yahagom imbus yam ei leu api yuug ngat Samuel ei minu ndig Rama,

⁵ bipai binoni “Andigpoi e, nani ne awer andig-ndau su ba, apmot bat cin igyai bram ayai kepti nya bi. Gima rino ma ata nibou ndig gom mem nye dem kep nok ngkiai nya ide nibou ndig nya.”

⁶Noro Samuel joi sut ingon kanti dima bi. Gima rino noni ngat nadi bak TUHAN.

⁷Lene TUHAN buhup “Ma ayai hagom bit leu nok yo dima yahara naniti hak ug. Lewo irok nani bi noro irok Dani. Lewo ikou sut gima dinok nibou ndig mem yok.

⁸Habiei tirigi dibuwak yok kwei leu minu Mesir kikau kwei bipek ammani kep irok Dani leu binhyepo ikuk yok bak kwar nya. Tini bu ne ibibon na bit leu nok gi ibibon kikep Da nipou su.

⁹Gima rino ma ace tut ingon kanti hak ug noro asok kep yok ngkiem tirigi apingok ingonti tut notou nibou ndig mibibon yoti.”

¹⁰Lene Samuel ndat kep mun di TUHAN sok ei noni dip hagom bak nide limwa nya di ijoi sut gima nibou ndig ninyeng tak kep yok.

¹¹Noni pingok ingonti bipai “Jide nibou ndig mibibon je nok gini. Noni mibidip huk jipmot bat nya leu binhyepo bihi inok tentara di ibri kroba pran lene bihi inok tentara di ibri kuda pran lene bihi inok tentara di imbut imig bibie mem nindigsi nya.

¹²Noni mita bihi nok nibou mem tentara ibou sribu gom lene mita bihi nok nibou mem tentara ibou ningot muhwi. Noni mikes midyai di buhun bibor ei jipmot bat nya inghat dip. Yoni migyai kep nide miai nya bipuk nide njita ningat kwei leu beisi cem ba, ibon nide minggwen nya kin nimbumbati mem nide kroba pran cem.

¹³Noni mikes midyai di buhun bibor ei jipmisop bat nya inghat dip bu. Yoni mibon kep nide mini mbris ba, ikwen kep nide njita bikang nide roti cem.

¹⁴Noni mipos jide dihyei hanjop nsi kin ba anggur ninghousi kin biei zaitun ninghousi hagom di kei bibor kei leu je leu api mikwas hagom tut nide nibou di igya kui noni.

¹⁵Noni mipos jide gandum kin jide ba anggur ningat gom leu ningot gom lene nok leu je leu binhyepo kwas hagom tut nide nibou nindigsi nya kin yo di igya kui yoni bu.

¹⁶Noni mipos jide awak nya kin jide sapi nya kin keledai nya di kei bibor kei leu je leu binhyepo biyai nide midyai nya.

¹⁷Noni mipos jide domba kin kambir nya gom leu ningot gom lene nok leu je. Lene noni muubon jahagom bijinok nide awak nya.

¹⁸Tirigi nicunti mem mun dima yok hagom cut igkep je lene jilua sok tut jide nibou ndig di jidimig ei su dima noro TUHAN mingig nitingou mem jihyet bi.”

¹⁹Lene yo dima ijoi sut Samuel nihyet bi noro ipai binoni “E bi! Nijoi sut gima nibou ndig gom ninyeng tak kep nye.

²⁰Nok gima lene mininok ngkiai nya ba, nyeni nibon nibou ndig gom di mibie tut nye mem gima nikon pran.”

²¹Lene Samuel miap kep ighyet leu api ug ba, pai hagom bak TUHAN.

²²Lene TUHAN buhup “Nna ba ayai hagom bit leu yoni ingon kanti ba, ata nibou ndig gom mem yok hak ug. Lene Samuel cuk mben Israel yahagom bingkwei hanyen ug ei ide ig.”