Read Hawaii Pidgin Genesis 1 Bible Online

Genesis 1 - Hawaii Pidgin bible

Genesis 1

¹Da time wen eryting had start, God wen make da sky an da world.

²Da world come so no mo notting inside, no mo shape notting. On top da wild ocean dat cova eryting, neva had light notting. Ony had God Spirit dea, moving aroun ova da watta.

³Den God say, “I like light fo shine!” an da light start fo shine.

⁴God see how good da light. Den he put da light on one side, an da dark on da odda side.

⁵Da light time, he give um da name “Day time.” Da dark time, he give um da name “Nite time.” So, had da nite time an da day time, az day numba one.

⁶Den God say, “I like get someting inside da middo, fo no let da watta up dea an da watta undaneat come togedda!”

⁷An dass wat God wen do. God make someting fo no let da watta up dea an da watta undaneat come togedda.

⁸Da ting inside da middo, God give um da name “Da Sky.” Had da nite time an da day time, az day numba two.

⁹Den God say, “I like da watta unda da sky come togedda one place, so dat get dry land!” An dass wat God wen do.

¹⁰Da dry groun, God give um da name “Land,” an da watta dat wen come togedda one side, he give um da name “Sea.” God look da dry groun an da sea, an he tell, “Real, real good, all dat!”

¹¹Den God say, “I like da land, get all diffren kine plant grow! Da kine plants dat make dea own kine seed, an da kine trees dat make da fruits wit da seed inside, eryting!” An dass wat God wen do.

¹²So da land wen make all diffren kine plant grow, da kine plants dat make dea own kine seed, an da kine trees dat make da fruits wit dea own kine seed inside, eryting. An God look da plants, an he tell, “Real, real good, all dat!”

¹³Had da nite time an da day time, az day numba three.

¹⁴Den God say, “I like put lights up dea inside da sky! Dass fo make da day time diffren den da nite time. Dass fo show da time fo do tings, an da odda kine days fo do someting, an da years.

¹⁵I like get lights up dea inside da sky, fo make light all ova da world!” An dass wat God wen do.

¹⁶God make da two big lights. Da big light, he make um fo be da main one day time, an da odda light, he make um fo be da main one nite time. He even make da stars too.

¹⁷God put da lights up dea inside da sky, fo make light shine on top da groun,

¹⁸day time an nite time, an fo make da light an da dark diffren. An God look da day an da nite, an he tell, “Real, real good, all dat!”

¹⁹Had da nite time an da day time, az day numba four.

²⁰Den God say, “Inside da watta, I like get choke diffren kine fishes an odda kine tings dat live dea! Up inside da sky, I like get plenny bird an any kine tings dat fly up ova da groun!”

²¹God make all da big kine fishes an odda kine tings dat live inside da ocean, an choke plenny small kine fishes an odda kine tings dat move aroun inside da watta, an all kine birds an bugs wit wings. An God look da tings inside da watta an da tings dat fly, an he tell, “Real, real good, all dat!”

²²Den God tell da fishes an birds an all da odda kine life, “I give you da powa so you can do eryting I wen make you fo do. So, I like you get plenny bebes, an fill up da ocean wit um. You birds too, I like you fo do da same ting an fill up da world!”

²³Had da nite time an da day time, az day numba five.

²⁴Den God say, “I like da land make all kine diffren tings! da animals dat live wit peopo, an da small kine animals, an da wild animals.” An dass wat wen happen.

²⁵God wen make um all: all kine wild animals, an all kine animals dat live wit peopo, an all da small kine animals dat run aroun on top da groun. An God look da animals, an he tell, “Real, real good, all dat!”

²⁶Den God say, “Now, I like make peopo. I like dem be like me, jalike one copy. Dey goin be in charge a eryting: da fishes inside da ocean, da birds inside da sky, da animals, all da land, an all da small kine animals dat go aroun on top da groun.”

²⁷So God make da peopo, same same jalike one copy a him. Fo start, he make one guy an one wahine.

²⁸Den God tell um, “I give you guys da powa so you can do eryting I wen make you fo do. So, get plenny bebes, an fill up da world wit um, an take ova! You guys, in charge a da fishes inside da ocean, an da birds inside da sky, an all da animals dat move aroun on top da groun.”

²⁹An God say dis too: “You know wat? I give you guys all da plants all ova da world dat make seed, an all da trees dat make fruits wit da seed inside. Dat fo you guys eat.

³⁰An fo all da wild animals, an fo all da birds inside da sky, an fo all da animals moving aroun on top da groun -- eryting dat stay alive, I give dem all da grasses an odda kine green plants fo dea food.” An dass wat God wen do.

³¹God look eryting he wen make, an he say, “Real, real good, all dat!” An had da nite time an da day time, az day numba six.