Read Hawaii Pidgin Genesis 16 Bible Online

Genesis 16 - Hawaii Pidgin bible

Genesis 16

¹Sarai, Abram wife, she neva get kids, but she take one slave wahine from Egypt name Hagar.

²Sarai tell Abram, “You know, God neva let me get kids. So den, get dis custom, you go sleep wit my slave wahine Hagar, fo make kids fo me hanai dem. Maybe dat way I get one boy from her, an start one ohana fo you.” Abram, he tell Sarai, “Kay den.”

³So, ten year afta dey come back Canaan side, Abram wife Sarai, she take Hagar, da slave wahine from Egypt side, an give her to her husband Abram fo be his odda wife.

⁴Abram an Hagar, dey wen sleep togedda, an she come hapai. But wen she know she hapai, she start fo tink she mo betta den Sarai, da lady she work fo.

⁵Den Sarai tell Abram, “Eh! No good, how dis wahine make to me! Az yoa fault! Was me wen tell you fo take her an sleep wit her. But now, she know she hapai, she make jalike she mo betta den me! Da God Yahweh Up Dea Inside Da Sky, he da judge, an he know dat you da one wen mess up, not me!”

⁶Abram tell Sarai, “Eh! You da one own her, not me! Go do wateva you like, den.” From dat time, Sarai wen make any kine to Hagar, an Hagar run away from Sarai.

⁷Hagar go da boonies. Had one angel messenja guy, dat was Yahweh, an he find her dea by one puka wea get watta inside, in one place wea you can see da road dat go Shur side.

⁸He tell, “Eh! You Hagar, da slave dat work fo Sarai. Wea you coming from? An wea you going?” Hagar tell um, “I running away from Sarai, da lady dat I work fo.”

⁹Da angel messenja guy dass Yahweh tell her, “You go back now, to da lady you work fo. Show her respeck an do wat she tell you, no matta she make any kine to you.”

¹⁰Den da angel guy tell her dis: “I goin give you plenny plenny kids. Da peopo dat goin come from you, too plenny fo count.”

¹¹He tell her dis too: “Eh, you hapai awready, you know. You goin get one boy. You goin give him da name Ishmael Cuz Yahweh lissen, an he know you suffa plenny.

¹²Dat boy goin be one outsida guy, Jalike da wild donkey. Nobody goin tell him wat fo do. He goin like beef erybody, An erybody goin like beef him. Even his own ohana guys, He goin be agains dem all erytime.” (Da name Ishmael sound kinda like “God lissen,” Hebrew language.)

¹³Hagar, she tinking, “Wow! God wen see me, an den I wen see God! An I still alive!” Dass why Hagar wen give Yahweh one new name. She tell: “You, I goin call you Da God Dat See Eryting, now.”

¹⁴Dat puka wea da watta come out, nowdays dey call um Be`er Lahai Ro`i, cuz a wat Hagar wen say dat time. Dat mean “Da Puka Wea Da God Dass Alive Wen See Me,” Hebrew language. Stay in da middo Kadesh town and Bered town.

¹⁵Hagar, she wen go home an born Abram's boy. Abram wen give his boy da name Ishmael.

¹⁶Abram 86 year old awready, dat time Hagar wen born Ishmael fo Abram.