Read Hawaii Pidgin Genesis 17 Bible Online

Genesis 17 - Hawaii Pidgin bible

Genesis 17

¹Lata, wen Abram 99 year old awready, Yahweh wen let Abram see him. He tell um, “Me, I da God Dat Get All Da Powa. So, live da way I tell you, an no do notting dat goin make shame.

²I wen make one deal fo me an you, an I goin make dat happen fo shua. I goin make choke plenny peopo come from you.”

³Abram, he wen go down right den an dea wit his face on top da groun fo show respeck fo God. God wen talk to him lidis:

⁴“Cuz I get dis deal wit you, you goin come da ancesta guy fo big stack diffren peopos.

⁵From now, yoa name no goin be Abram no moa, dat mean ‘Importan Fadda’. Yoa name goin be Abraham, dat mean ‘Fadda Fo Plenny Peopos’. Cuz I making you da ancesta guy fo big stack diffren peopos.

⁶I goin give you choke plenny peopo come from you bumbye, diffren kine peopos, so you goin be jalike one tree dat get plenny fruits. Even goin get king guys dat goin come from you too!

⁷“I making dis deal now, jus fo me an you. Dis deal wit you, goin stay foeva! I goin be da God fo you, an fo all da peopo dat goin come from you bumbye, even afta you mahke.

⁸An one mo ting: right now, you guys ony making house dis Canaan land. But I goin give all dis land to you an da peopo dat goin come from you, foeva. An I goin be da God fo all dem too.”

⁹Den God wen tell Abraham dis: “You, Abraham, dis wat you gotta do. You an all da peopo dat goin come from you, all you guys gotta stick wit da deal foeva.

¹⁰Hea's da deal I making, wat you an da peopo dat goin come from you gotta do. Fo ery guy inside yoa ohana, dey gotta cut skin fo show you my peopo.

¹¹Goin get one spesho mark on top all da guys body. Da cut skin mark, dat goin be da sign fo da deal dat me an you get.

¹²“ So from now to foeva, ery time you guys get new bebe boy, wen da kid eight day old, gotta cut skin. Wen yoa slave guys get boy kine kids, gotta cut skin. No matta da fadda mudda guys wen born fo yoa ohana, o you buy slave peopo dat not from yoa ohana,

¹³gotta cut skin dem too. All you guys gotta get da mark fo dat on top yoa bodies, an dass how you guys goin show dat da deal I make wit you guys fo be my peopo, goin stay foeva.

¹⁴If get one guy by you dat neva cut skin, an no like cut skin, gotta throw da guy outa yoa ohana, cuz dat kine guy goin mess up da deal you guys get wit me.”

¹⁵Den God tell Abraham dis too: “Yoa wife Sarai, from now, you no goin call her Sarai. Her name goin be Sarah, dat mean ‘princess’.

¹⁶I goin do good tings fo her, an I goin give her one boy fo you. I goin make good tings come out fo her, so she goin be da ancesta wahine fo plenny diffren peopos. Goin get king guys fo diffren peopos dat goin come from her too!”

¹⁷Den Abraham wen go down wit his face on top da groun fo show respeck to God. But he laugh same time, cuz inside, he tinking, “No way! How can?! Me, one hundred year old, an Sarah, ninety year old. How us can get kids?!”

¹⁸Abraham tell God, “Okay den. I like Ishmael be da one you goin take care of.”

¹⁹God say, “I know you tink dis no goin happen. But I talking bout yoa wife Sarah. Her, dat goin born one boy fo you. You goin give him da name Isaac (dat mean, ‘he laugh’). I goin make da same deal fo him dat I get wit you, him an da peopo dat goin come from him, foeva.

²⁰“An no worry bout Ishmael. I wen lissen to you awready. I promise, I goin do good tings fo him too. I goin make him get so choke plenny peopo goin come from him, twelve important leada guys goin come from him. I goin make his ohana come one importan peopo.

²¹But I goin set up my spesho deal wit Isaac, not wit Ishmael. Nex year, dis same time, Sarah goin born yoa boy.”

²²Afta God pau talk to Abraham, God go way from Abraham up inside da sky.

²³Dat same day, Abraham tell his boy Ishmael, an all da slave guys fo his ohana, da ones he wen buy an da ones dat wen born dea, fo come togedda. He cut skin all dem, jalike God wen tell um fo do.

²⁴Wen Abraham wen cut skin, he 99 year old awready.

²⁵He wen cut skin his boy Ishmael wen Ishmael 13 year old.

²⁶Da fadda Abraham an his boy Ishmael, dey wen cut skin same day,

²⁷an same ting fo all da slave guys fo da Abraham ohana, da ones dat wen born fo his ohana, an da ones dat he wen buy from peopo from odda place.