Read Hawaii Pidgin Genesis 19 Bible Online

Genesis 19 - Hawaii Pidgin bible

Genesis 19

¹Da two angel messenja guys dat was wit Yahweh, Abraham place, dey wen get to Sodom sunset time. Dea was Lot, sitting inside da town gate wit da odda importan guys. Wen Lot spock da angel guys, he stand up an tell um “Aloha!” Den he go down in front dem wit his face on top da groun fo show dem respeck,

²an he tell um, “Eh! I like you guys stay my house tonite. Cuz jalike you guys my bosses an I yoa slave guy, yeah? Ova dea you guys can wash yoa feet an go sleep. Den tomorrow early, you guys can wake up an hele on.” Dey tell um, “Nah, dass okay, us jus goin sleep ova dea wea da streets come togedda, inside da gate.”

³But Lot tell um, “No way! You guys gotta stay my house!” So dey go wit him his house. Lot tell his peopo fo make good kine food, an fo make da kine bread witout yeast fo dem. Den dey eat.

⁴Befo dey go sleep, all da guys from Sodom town, young guys and old guys, dey all wen come togedda from all ova, an stay all aroun outside Lot house.

⁵Dey yell to Lot, “Eh Lot! Wea da guys dat wen come yoa house tonite? Bring um outside hea by us guys. We like rape um!”

⁶Lot, he go outside fo talk to dem. But he shut da door behind him.

⁷He tell, “Eh, my bruddas! No do dis bad ting!

⁸You know wat? I get two daughtas dat neva sleep wit any guy yet. So, let me bring dem outside hea fo you guys, so you can make to dem howeva you like. Ony no do wat you talking bout to dese guys, cuz dey come from odda place an dey wen come my house, an I gotta take good care dem.”

⁹But da town guys yell, “Get outa da way, we going inside!” Dey telling each odda, “Dis bugga, he not from hea, he ony live hea short time. But now, he tink he da judge fo tell us wat fo do!” Dey tell Lot, “Afta we pau wit dem guys, we goin do mo worsa ting to you!” Dey wen make plenny presha fo Lot fo bring da guys outside, an dey move close fo bus up da door.

¹⁰But da two angel guys inside da house, dey wen put dea hands outside an grab Lot an pull um back inside da house. Den dey shut da door.

¹¹Den da angel guys zap all da guys outside da house, da guys dat not importan an da guys dat important. Dey zap um wit light so strong, da guys outside no can see notting. Dey give up fo find da door.

¹²Den da two angel guys tell Lot, “So! You get odda peopo from yoa ohana hea inside dis town? Yoa wife, yoa boys, yoa daughtas, son-in-law guys, anybody else you get inside dis town - get um outa dis place!

¹³Cuz us guys hea fo wipe out dis place. Get so plenny peopo dat stay yell to Yahweh fo help um, cuz da peopo hea so bad. Az why Yahweh wen send us hea, fo wipe out eryting.”

¹⁴So Lot wen go talk to da guys dat goin come his son in law guys wen dey marry his daughtas. He tell um, “Get up! Get outa dis place! Da God Yahweh goin wipe out da whole town!” But da guys dat like marry his daughtas, dey tink he making joke, so dey no do notting.

¹⁵Early morning time, wen ony litto bit red da sky, da angel messenjas guys wen try fo make Lot hurry up. Dey talk: “Move now! Take yoa wife, an yoa two daughtas dat stay hea wit you! No good Yahweh goin blow you away wit dem wen he wipe out da town fo da tings dey do dat need punish!”

¹⁶But Lot, he still neva like hurry up. So da two guys wen grab dea hands, Lot, an his wife, an da two daughtas, an dey take um all outside da town an leave um dea. Dass how Yahweh wen show pity fo dem an give um chance.

¹⁷Afta dey get um outside da town, one a da angel messenja guys tell Lot, “Run away some place wea you no goin mahke! No look behind you! No stay nea da towns. Run away mauka side, cuz dea you okay. No good Yahweh blow you away too!”

¹⁸Lot tell um, “Eh! You da boss. But no can, you know.

¹⁹You wen like help me, an I jalike yoa slave guy, an you wen stick wit me plenny, an cuz a you I alive still yet. But me, no way I can run all da way mauka side, so dis bad ting no goin catch me an kill me.

²⁰Look ova dea, dat small town! Stay nea, an I can run away ova dea. Az ony small place, so let me run to dat place, so I goin stay alive!”

²¹Da angel guy tell Lot, “Kay den. I goin let you do how you say. I no goin bus up dat small town you talking about.

²²But hurry up! Run ova dea, cuz I no can wipe out notting till you get dea.” (Dass how dat small town get da name, Zo`ar, dat mean “not importan.”)

²³Da sun jus coming up awready, wen Lot go inside Zoar town.

²⁴Den Yahweh wen make burning sulphur come down outa da sky wea he stay. Da fire wen come down on top Sodom town an Gomorrah town, jalike was rain.

²⁵God wen wipe out eryting inside dose towns, eryting aroun da towns, all da peopo dat live inside da towns, all da stuff dat grow on top da groun, eryting.

²⁶But Lot wife, she wen look behind her, an right den an dea she come salt rock, all hard kine jalike one post.

²⁷Dat morning, Abraham wen get up early an go to da place wea him an Yahweh wen stand fo talk da day befo.

²⁸He look down da valley to Sodom town an Gomorrah town an all da land in da valley aroun dea. Da ony ting he can see is smoke coming up from all ova da land, jalike da thick smoke from one place wea dey melt da metal.

²⁹Dass wat wen happen da time God wen go wipe out da towns all ova da Siddim Valley. But God neva foget da ting Abraham aks um fo do, an he get Lot folks outa dea befo he zap da towns, da place wea Lot wen live.

³⁰Lata, Lot an his two daughtas wen go way from Zo`ar to da mountains. He scared fo stay wit da Zo`ar peopo, az why. Ova dea mauka side, Lot an his two daughtas wen live inside one cave.

³¹One time, da older daughta tell da younga daughta, “Eh! No mo even one guy us can sleep wit fo get kids, an our fadda getting too old awready.

³²We do dis den: we give our fadda plenny wine fo drink. Den we go sleep wit him. Dat way, him an us goin get kids an make our ohana stay alive.”

³³Dat same nite, dey give dea fadda plenny wine fo drink. Den da older daughta wen go by her fadda an go sleep wit him. Cuz da fadda drunk, he neva know notting, wen she lay down wit him an wen she get up.

³⁴Da nex day da older daughta tell da younga daughta, “Eh! Las nite, I wen go sleep wit our fadda. We do da same ting tonite. We give um plenny wine fo drink, den you go sleep wit him. Dat way him an us goin get kids an make our ohana stay alive.”

³⁵Dat nite, same ting, dey wen give dea fadda plenny wine. Da younga daughta wen go sleep wit him, an cuz he drunk, he neva know notting wen she lay down wit him an wen she get up.

³⁶Dass how da two wahines, Lot daughtas, dey wen come hapai from dea own fadda.

³⁷Da older daughta, she wen born one boy, an she give um da name Mo`ab, dat mean, “From Fadda.” He da ancesta guy fo da Moab peopo dat get nowdays.

³⁸Da younga daughta, same ting. She wen born one boy, an she give um da name Ben-`Ammi, dat mean, “Boy From My Ohana.” He da ancesta guy fo da Ammon peopo dat get nowdays.