Read Hawaii Pidgin Genesis 25 Bible Online

Genesis 25 - Hawaii Pidgin bible

Genesis 25

¹Abraham wen marry again, an his new wife name was Keturah.

²She wen born fo him Zimran, Jokshan, Medan, Midian, Ishbak, an Shuah.

³Lata, Jokshan wen get two boys, Sheba an Dedan. Da Ashur peopo, an da Letush peopo, an da Le`um peopo, dey all wen come from Dedan.

⁴Midian, he wen get boys, Efah, Efer, Enoch, Abida, an Elda`ah. All dese peopo, az Abraham ohana from Keturah dea mudda.

⁵Abraham wen fix up eryting so Isaac get all Abraham stuff afta he mahke.

⁶Fo da odda kids dat wen born from Abraham an his odda wifes, Abraham give each kid plenny stuffs befo he mahke, but den he make um move house da east side, an no stay nea his boy Isaac.

⁷So dass da story wat happen da time Abraham stay live. He live 175 year.

⁸Abraham get eryting he like, an he feel good inside. He live plenny year an he stay good inside. Den he mahke. He go da same place his ancesta guys wen go.

¹⁰(9-10) Abraham boys, Isaac an Ishmael, dey bury him inside da cave Makpelah side, nea to Mamre town, inside da land dat Abraham wen buy from Efron, Zohar boy, da Het guy. Dey bury Abraham, da same place he wen bury his wife Sarah.

¹¹Afta Abraham mahke, God do plenny good tings for Abraham boy Isaac. Isaac make house nea da puka fo watta dat dey call Be`er Lahai Ro`i, dat mean, “Da Puka Wea Da God Dass Alive Wen See Me”.

¹²Now, dis da story bout Ishmael an his ohana. He Abraham boy, da one dat Hagar wen born fo Abraham. She da Egypt wahine dat wen work fo Sarah.

¹³Da boys dat wen come from Ishmael, dis dea names from da oldes to da younges: Nebaiot was da numba one boy, den Kedar, Adbe`el, Mibsam,

¹⁴Mishma, Dumah, Massa,

¹⁵Hadad, Tema, Jetur, Nafish, an Kedmah.

¹⁶All dese guys, dey Ishmael boys, an dey all get dea own small place fo live, an da peopo dat live dea afta give dea place da same name jalike da Ishmael boys, cuz dey da main guys dat dea twelve ohanas come from.

¹⁸(17-18) Da places wea da Ishmael boys go fo live start from Havilah an go all da way to Shur nea da Egypt land, wea you go Ashur side. But Ishmael, he wen live da east side a all his ohana guys. Dass da story wat wen happen da time Ishmael wen live. He live 137 year. Den he mahke, an he go da same place his ancesta guys go.

¹⁹Now, dis da story bout Isaac, da time he stay live. (Abraham was Isaac fadda.)

²⁰Wen Isaac was 40 year old, he marry Rebecca. Her fadda, Betu`el da Aram guy from Padan-Aram. Rebecca get one brudda guy, Laban da Aram guy.

²¹Had one time, Isaac pray to Yahweh fo give his wife Rebecca one bebe, cuz she no mo bebe yet. Yahweh wen lissen to wat Isaac wen pray. Den his wife Rebecca come hapai.

²²Was twins, an feel jalike da two bebes pushing each odda aroun inside her. Den she aks Yahweh fo tell her, “Wass happening? If dass how I stay, how come?”

²³Yahweh tell her, “Get two peopos inside you. Two diffren ohanas goin come from yoa body An dey goin stay agains each odda erytime. One peopo goin be mo strong den da odda peopo. Da olda brudda ohana goin work fo da younga brudda ohana.”

²⁴Wen time fo her born da bebes, was twins.

²⁵Da firs one dat come out get red kine skin an choke plenny hair all ova, so dey call him Esau, cuz sound kinda like “plenny hair,” dea language.

²⁶Afta dat, da odda brudda come out, holding Esau heel wit his hand. Dass how come he get da name Jacob, cuz sound kinda like “grab heel,” dea language, an kinda like “take ova” too. Wen da boys wen born, Isaac 60 year old.

²⁷Lata, wen da boys come big, Esau come real smart fo hunts, an he like stay outside in da boonies. Jacob, he mo quiet kine, an he like live inside da tents.

²⁸Isaac, he love Esau mo den Jacob, cuz Isaac like grind da wild meat too. But Rebecca, she love Jacob.

²⁹Had one time, Jacob stay cook stew. Esau, he come back from the boonies, an he real tired an hungry.

³⁰Esau tell Jacob, “Eh brudda, give me some a dat red stuff fo grind, cuz I real hungry.” (Dass how come dey wen give Esau da nickname Edom, dat mean “red.”)

³¹Jacob tell, “Okay, but firs, you gotta sell me yoa right fo get our fadda stuffs bumbye afta he mahke, cuz you da oldes. Den I let you eat.”

³²Esau tell, “Eh, me, I litto mo mahke awready from no eat. No matta I get da right fo get his stuffs cuz I wen born befo you, no mean notting -- cuz I goin mahke!”

³³Jacob tell, “Swear to God right now dat you give me da right!” So Esau wen swear to God. Dass how he wen sell Jacob da right fo get dea fadda stuffs bumbye afta dea fadda mahke.

³⁴Den Jacob give Esau bread an lentil stew. An Esau eat an drink, an den he stand up an go way. Dass how Esau wen ack like he no care, cuz he da oldes an he give away da right fo get his fadda stuff, to Jacob.