Read Hawaii Pidgin Genesis 29 Bible Online

Genesis 29 - Hawaii Pidgin bible

Genesis 29

¹From Bethel, Jacob wen hele on, till he come da land wea da ohanas from da east side live.

²Ova dea inside da boonies, in front him, he see one puka wea da watta come out. Had plenny sheeps laying down ova dea, cuz ery day da sheep farma guys let um drink da watta dat come outa da puka. Had da sheeps from one sheep farma one side, and da sheeps from one nodda farma da odda side, and da sheeps from one nodda farma, da odda side, three sheep farma guys. But had one big rock stay cova da puka.

³Da sheep farma guys, dey erytime wait till all da sheeps come togedda. Den dey push da big rock from on top da puka an let da sheeps go drink. Afta, dey put back da big rock on top da puka.

⁴Jacob tell um, “Eh bruddas, wea you guys from?” Dey tell um, “Us, from Haran.”

⁵He aks um, “So, you guys know Laban? Nahor grankid?” Dey tell, “Yeah, we know um.”

⁶Den he aks, “Laban, he stay okay, o wat?” Dey tell um, “Yeah, he stay okay. An look ova dea! Dass Laban daughta Rachel. She bringing dea sheeps ova hea.”

⁷Jacob tell, “But, wat? Still hot, you know. Mo betta give da sheeps watta an let um go back eat grass. Not da right time yet fo da animals come togedda.”

⁸But dey tell um, “Us no can, ova hea. Gotta wait till da sheeps from all da sheep farma guys come togedda. Den gotta push da big rock from on top da puka, an all da sheeps drink watta, same time.”

⁹Jacob an da guys still talking, an Rachel come dea wit all her fadda sheeps, cuz she da one take care da sheeps fo her fadda.

¹⁰Jacob see Rachel. She Laban's daughta, an Laban his mudda brudda. Da sheeps, dey Laban sheeps. So, right den an dea, Jacob go by da puka, an push da big rock from on top, an he let his uncle Laban sheeps drink watta.

¹¹Afta, Jacob go kiss Rachel, an he start fo cry plenny.

¹²Jacob tell Rachel dat her fadda an him from da same ohana, dat he Rebecca boy. So quick time, Rachel run an tell her fadda.

¹³Wen Laban hear dat his sista boy Jacob stay come, he run fo tell um aloha. Laban hug Jacob, an give um kiss, an take um inside da house. Jacob tell Laban eryting dat wen happen,

¹⁴an Laban tell him, “Fo shua, me an you get da same blood!” Jacob stay dea one month.

¹⁵Afta, Laban tell Jacob, “Eh, me an you, we stay from da same ohana. But dat no mean you gotta work fo me fo free! Tell me, how much you like me pay you fo work fo me?”

¹⁶Now, Laban, he get two daughtas. Da older daughta name Leah, an da younga daughta name Rachel.

¹⁷Leah, she get pretty eyes, but Rachel, she real good looking, wit one awesome figure.

¹⁸Jacob, he stay in love wit Rachel awready. He tell Laban, “I work fo you seven year, if you give me yoa younga daughta Rachel fo marry.”

¹⁹Laban, he tell, “Okay, az mo betta I give her to you an not to some odda guy. Stay hea wit me.”

²⁰Dass how come Jacob wen work seven year so he can marry Rachel. An he figga, was ony jalike two-three days, cuz he so plenny in love wit her.

²¹Da time come, wen Jacob pau work seven years fo Rachel. Jacob tell Laban, “Kay den! Give me Rachel so I can marry her.”

²²So Laban wen tell erybody from dat place fo come togedda, an he wen make one big wedding lu`au.

²³Nite time, Laban take his daughta Leah by Jacob, an Jacob an Leah sleep togedda.

²⁴(Same time, Laban give his daughta Leah da slave wahine Zilpah fo work fo her.)

²⁵Morning time come, an Jacob wake up. He see was Leah wit him, not Rachel! Jacob tell Laban, “Wass up? Wat you do to me! I work fo you seven years so I can marry Rachel! How come you trick me lidat?!”

²⁶Laban tell um, “Eh, you know, dass not how we do um hea. Get custom our place, da older sista gotta get married firs. Afta, da younga sista can get married.

²⁷Wait! Afta one week, den da wedding lu`au an stuff fo Leah pau. Den, if you like work for me seven year moa, den you can marry Rachel too.”

²⁸So dass how Jacob wen do. He wait one week till all da wedding kine stuff pau. Den Laban give him his daughta Rachel too fo marry.

²⁹(Same time, Laban give his daughta Rachel da slave wahine Bilhah fo work fo her.)

³⁰From dat time, Jacob wen sleep wit Rachel too. He get mo plenny love fo Rachel den fo Leah. An he stay dea work fo Laban, anodda seven year.

³¹But Yahweh, he see dat Jacob no mo love an aloha fo Leah. Dass why Yahweh let Leah get bebe, but Rachel, she no can get bebe, dat time.

³²Leah come hapai, an get one bebe boy. She give um da name Reuben, cuz she tinking, “Yahweh see dat I get trouble,” an da word Reuben sound kinda like “see one boy,” dea language. An she tinking dis too: “Now my husban goin love me.”

³³Leah come hapai one mo time an get one nodda bebe boy. She say, “Dis cuz Yahweh know dat my husban no like me, dass why Yahweh wen give me dis bebe too.” She call um Simeon, cuz sound kinda like “somebody dat lissen,” dea language.

³⁴Den Leah come hapai one mo time, an get bebe boy again. She call dat one Levi, cuz sound kinda like “come tight,” dea language. She say, “Dis time fo shua, my husban goin come tight wit me, cuz I wen born three boys fo him.”.

³⁵One mo time, Leah come hapai an get bebe boy. She call um Judah, cuz sound kinda like “tell good tings.” She tell, “Dis time, I goin tell good tings bout Yahweh!” From dat time, she neva have kids again, till lata.