Read Hawaii Pidgin Genesis 3 Bible Online

Genesis 3 - Hawaii Pidgin bible

Genesis 3

¹Dat time, from all da wild animals dat da God Yahweh wen make, da snake was da mos smart an sneaky one. One time, da snake tell da wahine, “Eh! Fo real, God wen tell you guys, dat from all da trees ova hea inside dis place, get trees dat you no can eat da fruits from dem, o wat?”

²Da wahine tell da snake, “Nah, he neva say dat. Can eat da fruits from all da trees inside dis place.

³Ony get da one tree ova dea inside da middo, dat God wen tell us, ‘No even eat um, an no touch um! No good bumbye you guys goin mahke, az why.’-”

⁴Da snake tell, “No way! You guys no goin mahke from dat!

⁵But God ony saying dat, cuz he know, da same time you guys go eat da fruit from dat tree, jalike yoa eyes goin come open an you goin undastan stuff. You guys going come jalike God! You goin undastan wass good an wass bad!”

⁶Da wahine look da tree. She like how da tree look, an da fruits look good fo eat. She tinking, “Oh, dat tree, shaka kine! I like! An if I eat da fruits, I goin come smart, an make me undastan any kine!” So she take some a da fruits an eat um. Den she give um to her husband too, an he eat um.

⁷Right den an dea, dey undastan, jalike dea eyes wen come open. Dey know dat dey naked, an dey go get plenny fig leaf an sew um togedda fo make someting fo wear aroun da middo.

⁸Dat day, wen da sun going down an da wind start fo blow, da guy an his wife hear one noise. Was da God Yahweh! He was walking aroun inside da place wea he wen plant da trees. Dey go hide behin da trees inside dea, so da God Yahweh no can see um.

⁹Da God Yahweh call loud so da guy can hear um. He tell, “Hui! Adam! Wea you stay?”

¹⁰Da guy tell, “I wen hear you, ova dea inside dis place. I scared, cuz I naked! Az why I wen go hide.”

¹¹God tell um, “Who wen tell you dat you stay naked? You wen eat da fruits from da tree, da one I wen tell you fo no eat, o wat?!”

¹²Da guy tell, “Yeah, was da wahine, az why. Da same one you wen put hea fo stay wit me fo help me! Her wen give me some fruit from dat tree an I wen eat um.”

¹³Da God Yahweh tell da wahine, “Eh! Wat you wen do, huh?!” Da wahine tell um, “Was da snake! Da bugga wen go trick me! Az how come I wen eat da fruit!”

¹⁴Den da God Yahweh tell da snake dis: “Eh! Cuz you wen do dat, I goin make bad ting come to you. No mo odda animal dat I goin make bad ting come to dem, Da way goin come to you! From now, till you mahke, You goin crawl on top yoa belly Wit yoa face in da dirt!

¹⁵From now on, you an da wahine, I goin make you guys fight each odda. Yoa kids an her kids, Dey goin fight each odda too. Dey goin bus yoa head, An you goin bite dea feet!”

¹⁶Den God tell da wahine dis: “You! Wen you get bebe, I goin make um so you get plenny pilikia wen you come hapai. Goin come real sore fo born kids! Still yet, you goin like stay wit yoa husban, An him, he goin be in charge a you.”

¹⁷God tell da guy Adam dis: “You, you wen make how yoa wife tell you, an not how I tell you. You eat da fruit from dat tree, no matta I wen tell you befo time, no eat. Cuz a wat you wen do, I goin make da land hard fo grow stuff! From now, till you mahke, You goin work hard fo get stuff fo eat!

¹⁸Wen you plant seed, da land goin grow weeds an thorns fo you too. Still yet, you goin eat da kine food dat grow inside da fields.

¹⁹You gotta work hard an sweat Fo get nuff food outa da groun, An afta, you goin go back to da dirt Cuz I wen make you outa da dirt. You come from dirt, An you goin come dirt one mo time.”

²⁰Da guy Adam give his wife da name Eve. Dat sound kinda like “Life,” Hebrew language, an she da firs mudda fo all da peopo dat eva live.

²¹An one nodda ting da God Yahweh do: he use animal skin fo make clotheses fo Adam an Eve his wife, an give um to dem.

²²Den da God Yahweh talk lidis: “So, wat you tink? Da peopo wen come jalike us awready. Dey undastan wass good an wass bad. So now, no good we let um go take da fruits from Da Tree Dat Make You Live Foeva, an eat um. Cuz if dey do dat, dey goin live foeva, az why!”

²³Dass why da God Yahweh trow dem outa Eden, da place he wen plant da trees. God make dem go work da same groun dat he wen make um outa, firs time.

²⁴Afta dat, God neva let dem go back inside again. He put spesho watcha tings dat stay alive ova dea on da east side a da place he wen plant, Eden side. He put one sword dea too, wit fire dat come out, an dat move all aroun so nobody goin go nea da Tree Dat Make You Live Foeva.