Read Hawaii Pidgin Genesis 31 Bible Online

Genesis 31 - Hawaii Pidgin bible

Genesis 31

¹One time, Jacob wen find out dat Laban boys was talking, “Eh! Dat Jacob, he take away eryting our fadda get. Da bugga use our fadda stuffs fo make him come real rich.”

²Jacob see one nodda ting too: Laban not acking nice to him jalike befo time.

³Den Yahweh tell Jacob, “Time awready fo you go back yoa ancesta guys land wea yoa ohana guys stay. I goin stay wit you.”

⁴Dat time, Jacob stay inside da boonies, wit da sheeps. He send somebody fo go tell Rachel an Leah fo come ova dea by him.

⁵Wen dey get dea, Jacob tell his wifes, “I see dat you guys fadda not acking nice to me now, da way he wen make befo time. But no matta -- da God dat my fadda guy pray to, he stay wit me.

⁶You know awready, I work hard an do good job fo yoa fadda.

⁷But him, he bulai me. Ova an ova, he change wat he pay me. “But God neva let him do notting fo hurt me.

⁸Weneva yoa fadda guy tell me, ‘Now, I goin pay you wit da sheeps an goats dat get spot all ova dem,’ den all da girl kine sheeps an goats dat wen born bebe sheeps an goats, all get spots all ova dem. Den, weneva he tell me, ‘Now, I goin pay you wit da sheeps and goats dat get twist kine tail,’ den all da girl kine sheeps an goats dat wen born bebe sheeps an goats, all get twist kine tail.

⁹Dass how God take away da sheeps an goats an cows from yoa fadda, an give um to me.

¹⁰“One time, wen da sheeps an goats was in heat, I get one dream. Dis wat I see inside my dream. I wen see da boy kine goats dat was breeding wit da ones in heat, an dey all get twist kine tail an spot an diffren kine color all ova.

¹¹“Den, inside da dream, one angel messenja guy from God tell me, ‘Eh Jacob!’ I tell um, ‘Yeah, dass me!’

¹²Da angel tell, ‘Look. See ony da boy kine goats dat get twist kine tail an spot an diffren kine color all ova, stay breeding wit da ones in heat. Dass cuz I see awready, eryting dat Laban doing to you.

¹³Me, I da same God you wen see Bethel side. Dass da place wea you put up da big rock jalike one post, an wen pour olive oil on top fo show love an respeck fo me. You wen make one strong promise ova dea fo do someting spesho fo me. So now, go way from dis land, an go back yoa own ohana land.’-”

¹⁴Rachel an Leah, dey tell Jacob, “Az okay wit us. Us guys no goin get notting from our fadda guy, anyway. He no goin give us notting, no matta us his kids.

¹⁵He stay make us jalike we not from his ohana. Jalike he wen sell us, an all da money dat suppose to be fo us all gone awready.

¹⁶But all da money an stuff dat God take away from our fadda guy an give um to you, fo shua dass fo us an our kids. So now, you go do wateva God tell you.”

¹⁷So, Jacob go put his wifes an his kids on top camels fo go.

¹⁸He get togedda all his sheeps, goats, an cows, an odda stuffs dat he get Paddan-Aram side, fo go by his fadda Isaac, Canaan land side.

¹⁹Dat time dey go, Laban awready stay inside da boonies fo cut da wool from his sheeps. Befo Rachel go, she go steal da idol kine gods dat her fadda ohana pray to.

²⁰Jacob, he neva tell Laban da Aram guy dat he goin go, so he neva know notting dat dey was goin leave.

²¹He take all da stuffs he get, an go. He go cross da Eufrates Riva, fo go up country Gilead side.

²²Laban neva know dat Jacob wen go, till somebody wen tell him three days lata.

²³Laban, he get togedda his ohana guys, an dey chase Jacob. Dey catch um up seven days lata, up country Gilead side.

²⁴But dat nite, God wen let Laban da Aram guy see um inside one dream. God tell Laban, “Watch out! No say notting to Jacob, bad kine o good kine!”

²⁵Jacob, he wen put up his tents awready, up country Gilead side. Den Laban come by Jacob, an Laban an his ohana guys put up dea tents, same place not too far.

²⁶Wen dey come togedda, Laban tell Jacob, “Eh! Wat you wen do? How come you neva tell me? You take my daughtas wit you, jalike you one army guy an dey yoa prisonas!

²⁷How come you go hide yoaself so you can run away? You steal stuff from me an neva tell me notting, hah? If you wen tell me you going befo time, I goin make big party fo let you go, wit songs an tambourine an guitar!

²⁸But you, you neva even let me kiss my daughtas an my grandkids fo tell um aloha! Stupid, make lidat!

²⁹“I get da powa fo hurt all you guys, you know. But las nite, da God dat yoa fadda guy pray to, he tell me, ‘Watch out! No say notting to Jacob, bad kine o good kine.’

³⁰I figga, you gotta hele on, cuz you tinking plenny bout yoa fadda guy house. But, how come you steal my idol kine gods?”

³¹Jacob tell Laban, “I was scared, cuz I tinking you goin take back yoa daughtas an bus me up. Dass how come I run away.

³²But fo yoa idol gods?! If you find dem wit one a my peopo, dat guy no goin stay alive! I say dis in front all our ohana guys: You show me one ting I get dass yours, an you can take um back!” Jacob talk lidat cuz he neva know dat Rachel wen steal da idol kine gods.

³³So Laban go inside Jacob tent firs, den inside Leah tent an da tents fo da two slave wahines dat work fo his two daughtas, but he neva find notting. Afta he pau inside Leah tent, he go inside Rachel tent.

³⁴But befo Laban go inside Rachel tent, Rachel take da idol kine gods an put um inside da saddle fo her camel, an sit down on top um. Laban open up eryting inside da tent an look inside. He neva find notting.

³⁵Rachel tell her fadda “I like show you respeck, but no huhu, yeah? I no can stand up fo you, cuz right now I stay get my sick time dat come ery month, you know.” Laban look all ova da place, but he neva find da idol kine gods fo his ohana.

³⁶So den, Jacob come real huhu an start fo make grumble wit Laban. He tell um, “So, wat you wen find?! You tink I goin do someting fo mess up our ohana?! Wat kine bad ting I do to you, dat you chase me lidat?!

³⁷Cuz you wen go look ova eryting I get. So! Wat ting you wen find hea dat come from yoa house? Put um hea, in front da whole ohana, so dey can see! Den let yoa ohana guys an my ohana guys figga, if I owe you someting, o not!

³⁸“Twenny year now, I stay wit you. Yoa girl kine sheeps an goats, dey neva lose even one bebe. Yoa boy kine sheeps, I neva kill even one fo eat.

³⁹Wen da wild animals kill one a your sheeps o goats, I neva bring da body to you. I pay fo um, so you neva lose notting. You make me pay, no matta was day time o nite time dat da wild animal wen steal um.

⁴⁰Dis how was: I work day time wen too hot fo work, an nite time I come real cold, an I no can sleep.

⁴¹Yeah, dass wat happen to me, da twenny year I stay wit you. I wen work fourteen year fo marry yoa two daughtas, plus six year fo pay you fo da sheeps an goats. An den, you change my pay plenny times.

⁴²“But da God dat my fadda pray to, dass da God fo Abraham. He da One dat make Isaac scared an shaky cuz he so awesome. He stay wit me. If he neva stay wit me, you no give me notting, an tell me fo go way. But God, he see how plenny hard time I get, an how plenny hard I work. Las nite, wat he tell you wass right, cuz he da Judge.”

⁴³Den Laban tell Jacob dis: “Kay den. Da wahines, dey my daughtas. Da kids, dey my grankids. Da sheeps an goats, dey my sheeps an goats. Eryting you see, mines. But wat? I no can do notting now bout my daughtas, an da kids dey wen born.

⁴⁴So come. Now, we make deal, me an you. We put up someting so erybody goin know wat wen happen hea wit me an you.”

⁴⁵So Jacob, he take one big rock an put um up jalike one post.

⁴⁶Den Jacob tell his ohana guys, “Go bring some mo rocks.” So dey get odda rocks an make one big pile. Right dea by da pile, Jacob guys an Laban guys wen eat togedda.

⁴⁷Laban give dat pile a rocks da name Yegar-sahaduta, dat mean, “Da Rock Pile Fo Rememba Wat Happen,” Aram language. Jacob, he give um da name Gal-ed, dat mean same ting, Hebrew language.

⁴⁸Laban tell, “Dis rock pile hea, so erybody goin know wat wen happen wit me an you, dis day.” Dass how come get da name Gal-ed.

⁴⁹Dey call da rock pile Mizpah too, dat mean “Place Fo Watch From,” cuz Laban tell, “I like Yahweh watch you an watch me, all da time dat we no can see each odda.

⁵⁰If you make any kine to my daughtas, o if you marry odda wahines, no matta no mo nobody dat know. Cuz no foget: God know wat happen wit you an me.”

⁵¹Den Laban tell Jacob, “Look. Dis da rock pile I wen make, an dis da rock dat stand dea jalike one pos. I goin stay one side, an you stay da odda side.

⁵²Dat pile an dat pos, dey stay dea so us no goin foget dat I not suppose to go da odda side dis pile fo bus you up, an you not suppose to go da odda side dis pile an dis pos fo bus me up.

⁵³I like da God fo yoa granfadda Abraham an da God fo my granfadda Nahor be da judges, if I stay right o if you stay right.” So Jacob make one strong promise fo stick wit da deal, an he aks da God dat make his fadda Isaac stay scared an shaky cuz he so awesome, fo make shua he do eryting right.

⁵⁴Den Jacob make sacrifice to God dea inside da up country, an he tell Laban an all da odda ohana people fo come eat wit him. Afta, dey all wen sleep dea, up country side.

⁵⁵Nex morning, Laban get up early. He kiss his daughtas an his grankids, an aks God fo do good tings fo dem. Den he go home.