Read Hawaii Pidgin Genesis 33 Bible Online

Genesis 33 - Hawaii Pidgin bible

Genesis 33

¹Jacob look, an ova dea, he see Esau coming -- an four hundred odda guys wit him! So Jacob tell Leah an Rachel an his odda two wifes fo take all dea own kids wit dem.

²He tell da odda two wifes go firs wit dea kids. Afta dem, he send Leah an her kids. An da las, he send Rachel an Joseph.

³Den Jacob go fas an go in front his wifes an kids. Wen Jacob come nea his brudda Esau, he go down on top da groun fo show respeck, till he come nea his brudda, an he do dat seven times.

⁴Esau run to Jacob fo tell um aloha. Esau give his brudda Jacob big hug, an kiss um, an dey cry togedda.

⁵Den Esau look aroun, an he see da wahines an da kids coming. He tell um, "Dis peopo dat wit you, who dem?" Jacob tell um, "God do plenny good stuff fo me, yoa slave. Dey da kids dat God wen give me."

⁶Den da odda two wifes an dea kids come by Esau an go down on top da groun fo show um respeck.

⁷Den Leah an her kids come, an dey go down on top da groun fo show respeck. Afta Leah, Joseph an Rachel come, an dey go down on top da groun fo show respeck too.

⁸Esau aks Jacob, "Den, all da odda big stack guys dat I wen meet awready, dey yoa guys too, o wat?" Jacob tell um, "Yeah. I wen send dem fo you make good to me, cuz you da boss."

⁹Esau tell um, "But brudda, I get plenny stuffs awready. Mo betta you keep all yoa stuffs. Dass fo you."

¹⁰Jacob tell Esau, "But please? Take dis present dat I stay give you cuz I like you stay good to me. Cuz erytime I look you, jalike I looking God's face, cuz you take me in wit aloha.

¹¹So, take da present I give you. God do plenny good kine stuff fo me, an I get plenny." Jacob stay aksing Esau fo take da present, an den Esau take um.

¹²Den Esau tell Jacob, "Kay den, you get ready, an we go togedda. I go firs, cuz you guys no can go fas."

¹³Jacob tell um, "Eh, you da boss. But you know dat some a da kids still small an not strong, an da sheeps, da goats, an da cows, dey giving milk to dea bebes, an I gotta take care dem. If my guys make um go too fast, even one day, bumbye all da animals goin mahke.

¹⁴So, you da boss an I da slave guy. But you go stay go firs, an I go stay come afta, easy kine, how da animals an da kids can walk feet. Dass how I goin go by you, my boss, Se`ir side."

¹⁵Den Esau tell, "Kay den, I tell some a my ohana guys hea fo go wit you fo help." But Jacob tell, "Eh, brah, no need! You da boss, an you making plenny nice to me awready!"

¹⁶So, Esau guys go back Se`ir side dat same day.

¹⁷But Jacob, he go Succot. Ova dea, he build house fo himself, an make shade places fo da animals. Dass how come da place get da name Succot, dat mean "shade places," dea language.

¹⁸Dass wat happen da time Jacob come all da way from Padan-Aram. Had one time afta dat, Jacob move house Shekem town, inside da Canaan land. He get dea okay, an notting bad happen to him. Jacob put up his tents in front Shekem town.

¹⁹Dat land wea Jacob put up da tent, he wen buy um from da Hamor ohana. (Hamor, he Shekem guy fadda.) Jacob wen pay da Hamor ohana peopo hundred piece da old kine silva money.

²⁰Jacob wen put up one altar dat place, an he call um El-Elohe-Yisra`el, dat mean "God, he da God fo Israel," dea language.