Read Hawaii Pidgin Genesis 36 Bible Online

Genesis 36 - Hawaii Pidgin bible

Genesis 36

¹Dis da story bout da ohana dat come from Esau - dass da Edom peopo, you know.

²Esau, he marry two wahines from da Canaan ohana. Da firs one he marry, Adah, Elon da Het guy daughta, an da odda one, Oholibamah, Anah daughta, an Anah was Zibeon da Hiv guy boy.

³Afta dat, Esau wen marry Basemat, she Ishmael daughta an Nebaiot sista.

⁴Adah wen born Elifaz, an Basemat wen born Reuel,

⁵an Oholibamah wen born Jeush, Jalam, an Korah. All dese boys, dey born fo Esau, Canaan side.

⁶Lata, Esau take his wifes an his kids, an all da peopo dat work fo him, an his cows and sheeps an goats, an all da stuffs he get wen he live Canaan side, an dey all go one nodda land, mo far from his brudda guy Jacob.

⁷Cuz da two brudda guys get plenny animal, az why dey no can live togedda. Da land wea dey live befo time, too small fo all dea sheeps an goats.

⁸Dass how come Esau wen go live up country Se`ir side. (Esau, he get da odda name Edom.)

⁹So, dis da story bout da Esau ohana. Esau, he da ancesta guy fo da Edom peopo, dat live up country Se`ir side.

¹⁰Now, da names fo da Esau boys: Elifaz, his mudda was Esau wife Adah. Reuel, his mudda was Esau wife Basemat.

¹¹Elifaz, his boys, Teman, Omar, Zefo, Gatam, an Kenaz.

¹²Elifaz, Esau boy, had one wahine Timna dat was his odda wife. She wen born Amalek fo Elifaz. Dea granmudda, Esau wife Adah.

¹³Reuel, his boys, Nahat, Zerah, Shammah, an Mizzah. Dea granmudda, Esau wife Basemat.

¹⁴Oholibamah, dass Anah daughta an Zibeon grandaughta, she was Esau wife. Her boys, Jeush, Jalam, an Korah.

¹⁵Now, da importan guys dat come from Esau kids. From Esau's numba one boy Elifaz, get Teman, Omar, Zefo, an Kenaz. Dey was da main guys fo dea ohanas.

¹⁶Same ting fo Korah an Gatam an Amalek. Dass da main guys fo da Elifaz ohanas dat live Edom land. All dem wen come from Adah.

¹⁷From Esau boy Reuel, get Nahat, Zerah, Shammah, an Mizzah dat was da main guys fo dea ohanas. Dese ohanas live Edom land, an dey all come from Reuel, and he come from Esau wife Basemat.

¹⁸From Esau wife Oholibamah, get Jeush an Jalam an Korah dat was da main guys fo dea ohanas. Dis da main guys fo da ohanas dat come from Oholibamah, Esau wife, Anah daughta.

¹⁹Dass da story bout Esau boys, an all da main guys fo da ohanas dat come from Esau. (Esau get da odda name, Edom.)

²⁰Dis, da ohana dat wen born fo Se`ir da Hor guy. Dey wen live inside dat same land: Lotan, Shobal, Zibeon, Anah,

²¹Dishon, Ezer, an Dishan. Dey da main guys fo da Hor peopo ohanas, dat wen come from Se`ir, Edom land.

²²Lotan, his boys Hori an Hemam. Lotan sista, her name Timna.

²³Shobal, his boys Alvan, Manahat, Ebal, Shefo, an Onam.

²⁴Zibeon, his boys Ayah an Anah. (Dis Anah guy, as da same one dat was inside da boonies taking care da donkeys fo his fadda guy Zibeon, an he wen find one place wea get hot watta dat come outa da groun.)

²⁵Anah, he get two kids, his boy Dishon an his daughta Oholibamah.

²⁶Dishon, his boys, Hemdan, Eshban, Itran, an Cheran.

²⁷Ezer, his boys, Bilhan, Za`avan, an Akan.

²⁸Dishan, his boys, Uz an Aran.

²⁹Now, da main guys fo da ohanas dat come from da Hor peopo: get Lotan, Shobal, Zibeon, Anah,

³⁰Dishon, Ezer, an Dishan. Dey da main guys fo da ohanas dat come from da Hor peopo, Se`ir side.

³¹Edom side, ova dea had king guys dat was in charge, long time befo da Israel peopo wen get king guys.

³²Bela, Beor boy, he was king Edom side. His town get da name, Dinhabah.

³³Den Bela mahke, an Jobab, Zerah boy from Bozrah side, he come king.

³⁴Jobab mahke, an Husham, dat come from da land wea da Teman peopo live, he come king.

³⁵Husham wen mahke, an Hadad, Bedad boy, he come king. He da one wen bus up da Midian peopo inside da boonies Moab side. His town get da name, Avit.

³⁶Hadad mahke, an Samlah from Masrekah, he come king.

³⁷Samlah mahke, an Shaul from Rehobot (da one by da Eufrates Riva), he come king.

³⁸Shaul mahke, an Ba`al-Hanan, Akhbor boy, he come king.

³⁹Ba`al-Hanan, Achbor boy, mahke, an Hadar, he come king. His town get da name, Pa`u. Hadar wife was Mehetabel. Mehetabel mudda was Matred, dat was Mezahab daughta.

⁴⁰So, dis da names fo all da main guys fo da Esau ohanas. Ery ohana get dea own place. All da ohana names, dey come from dea main peopo: Timna, Alvah, Jetet,

⁴¹Oholibamah, Elah, Pinon,

⁴²Kenaz, Teman, Mibzar,

⁴³Magdi`el, an Iram. Dey da main peopo fo da Edom ohanas, dat wen come from Esau, da ancesta guy fo all da Edom peopo. An dass da places wea ery ohana get dea own land.