Read Hawaii Pidgin Genesis 37 Bible Online

Genesis 37 - Hawaii Pidgin bible

Genesis 37

¹Dis da story bout Jacob an his ohana peopo. Jacob, he stay live da same land wea his fadda Isaac wen put up his tent befo time. Dat land, Canaan.

²Jacob boy Joseph, he was ony one young guy, seventeen year old, dat time. He stay take care da sheeps an da goats wit his brudda guys. Dey all get da same fadda Jacob, jalike him, but dea muddas was Bilhah an Zilpah, Jacob's odda wifes. All da time, Joseph tell his fadda bad kine stuff bout his brudda guys.

³Israel get plenny love an aloha fo Joseph, mo plenny den he get fo all da odda boys. Israel old awready befo Joseph wen born, so Joseph spesho fo him. Az why Joseph wen do dat. Israel wen make one spesho robe fo Joseph outa all fancy kine cloth.

⁴Da brudda guys, dey see dat Joseph was da one dea fadda love mo plenny den dem. Az why dey hate Joseph. Dey hate um so plenny, dey no can even talk nice to him.

⁵One nite, Joseph get one dream. He quick time tell his brudda guys bout um. Wat he tell dem, make um hate Joseph mo plenny still yet.

⁶Dis wat he tell um: “Eh! Try lissen! I like tell you guys wat I wen dream.

⁷All us guys was outside, inside da wheat field, yeah? an tying up da wheat plants we wen cut. An you know wat? Da wheat plants I wen tie, go stand up! Den da odda wheat plants you guys wen tie, make circle around mines, an go down in front my wheat fo show um respeck!”

⁸Da brudda guys tell um, “Wot! You tink you goin come king ova us guys? You tink you goin tell us guys wat we gotta do?” Cuz a da dream, an cuz a wat Joseph stay tell um, dey hate um mo plenny den befo time.

⁹Den one nodda time, Joseph get one nodda dream. He tell his brudda guys wat he wen dream. He say: “You know wat I wen dream? Had da sun, an da moon, an eleven stars. Dey all was going down in front me fo show me respeck.”

¹⁰Dis time, not ony his brudda guys, but Joseph tell his fadda too. Da fadda Jacob scold Joseph. He tell um, “Wat dream you talking bout? You tink dass fo real, me an yoa mudda an all yoa brudda guys, bumbye we all goin go down in front you jalike you somebody importan, o wat?”

¹¹Cuz a dat, Joseph brudda guys come mo huhu an jealous wit Joseph. But Jacob, Joseph fadda, he stay tinking plenny bout all dat.

¹²Had one time, Joseph brudda guys wen go Shekem, fo take care dea fadda's sheeps an goats ova dea.

¹³Israel tell his boy Joseph, “Eh! Yoa brudda guys, dey all stay Shekem side, you know, fo take care da sheeps an goats ova dea. I like you go ova dea by dem.” Joseph tell, “Okay.”

¹⁴Joseph fadda tell um, “Go ova dea. Find out if yoa bruddas stay okay, an if da sheeps an goats stay okay too. Den come back hea an tell me.” So Joseph go from da Hebron Valley, all da way Shekem side.

¹⁵Wen Joseph get dea, he go all aroun da fields, but he donno wea he going. One guy see um an aks um, “Eh! Wat you looking fo?”

¹⁶Joseph tell um, “I looking fo my brudda guys. You can tell me wat side dey stay fo take care dea sheeps an goats?”

¹⁷Da guy tell um, “Yeah, but dey no stay hea. I wen hear um talking, ‘Eh! We go Dotan side!’ Den dey wen go way.” So Joseph wen go Dotan side, fo look fo his bruddas. Dass wea he find um.

¹⁸Befo Joseph get dea, his brudda guys see um far away. Dey make plan fo make Joseph tink eryting okay, den kill um.

¹⁹Dis wat dey all saying to each odda: “Eh! Big Mista Dream Guy, he stay coming!

²⁰So now, dis wat us guys gotta do: Firs ting, we go kill um. Den we trow da body inside one a da big holes dat get aroun hea. Den we tell our fadda, ‘One wild animal wen eat um!’ Den we goin see wat goin happen wit da kine stuff he stay dream!”

²¹But da oldes brudda, Reuben, he hear wat dey like do. He do someting fo get Joseph outa trouble from dem. Dis wat he do: Reuben tell his brudda guys, “No good we bus up Joseph so bad dat he mahke, you know.

²²No make da bugga bleed an mahke. Ony need trow um down inside dat big hole ova hea inside da boonies. No go bus um up!” Reuben talk lidat cuz he figga, he goin come back lata an get Joseph outa dea an send um back by his fadda.

²³So wen Joseph come by his brudda guys, dey grab um, an pull off da spesho robe he stay wear, made outa all kine fancy kine cloth.

²⁴Den dey take Joseph by da big hole an trow um down inside. Nobody use um dat time, an no mo watta inside.

²⁵Afta dat, da brudda guys go sit down fo eat. Dey look, an spock plenny guys from da Ishmael ohana, coming from Gilead side. Da guys all going Egypt side togedda. Dey get plenny camels, an da camels carrying stuff fo sell Egypt side, sap from da trees dat smell nice, an diffren kine sap fo make perfume, an bark from da trees fo incense.

²⁶Den Judah tell his brudda guys, “Eh! If us guys go kill our brudda Joseph, an den cova ova wat we do, you guys tink we goin make money from dat? No way!

²⁷Come on! Mo betta us guys sell um to da Ishmael ohana guys! Dat way, no need us kill da bugga. Cuz he our own brudda, you know. Us get da same blood an da same bone.” Da odda brudda guys, dey like wat Judah say.

²⁸Dat time, da Ishmael ohana guys from Midian side dat buy an sell stuffs go by dem. Da brudda guys go pull up Joseph outa da big hole. Dey sell um to da Ishmael ohana guys. Da Ishmael guys, dey pay twenty piece silva fo Joseph, an dey take Joseph Egypt side wit dem.

²⁹Latas, Reuben come back an go by da big hole, an you know wat? No mo Joseph inside dea! Reuben come plenny sore inside, dat he rip his own clotheses fo show he hurting inside.

³⁰He go back by da odda brudda guys, an tell um, “Da boy! He no stay! An wat I goin do now?!”

³¹Den Joseph brudda guys go kill one a dea goats. Dey trow Joseph fancy robe inside da blood.

³²Den dey send somebody by dea fadda Jacob wit da fancy robe fo tell him, “Us guys wen find dis ova dea. Try check out da robe. Dis yoa boy's robe, o wat?”

³³Jacob check out da robe, an he tell, “Dass my boy robe fo shua! One wild animal wen go eat um! Gotta be, Joseph all bus up!”

³⁴Den Jacob wen rip his own clotheses fo show he plenny sore inside. From den, aroun da middo he wear ony scratchy kine clothes made from goat hair, an fo long time he stay crying fo his boy.

³⁵All Jacob's odda kids, guys an wahines, go by him fo try help um fo come good inside. But he no like lissen to dem. He tell, “No way. Bumbye wen I go down da Mahke Peopo Place, I still goin stay crying fo my boy.” An he stay sore inside lidat, long time.

³⁶Same time, da guys from Midian side, dey go Egypt. Afta dey get dea, dey sell Joseph to Potifar, an he wen buy um. He one officer dat work fo Pharaoh da King. He da head guy fo da army guys dat kill da prisonas dat da king like kill.