Read Hawaii Pidgin Genesis 39 Bible Online

Genesis 39 - Hawaii Pidgin bible

Genesis 39

¹Now, come back to da guy Joseph. Had one Egypt guy Potifar, one a da head guys dat work fo da king, Egypt side. He stay in charge a da army guys dat kill da prisonas dat gotta mahke. Afta da Ishmael guys take Joseph ova dea, dey sell um to Potifar.

²Dass how come Joseph stay Potifar house, da Egypt guy, cuz Potifar wen buy him. Yahweh, he stick wit Joseph an help um come one good worka fo Potifar.

³Da owna guy, Potifar, he see dat, an know dat Yahweh stay make Joseph so eryting he do come good.

⁴Az why Potifar like Joseph plenny. He make Joseph his own right hand guy. He make um in charge a eryting inside da house dea, an eryting he get.

⁵From da time da Egypt guy wen make Joseph in charge, Joseph God Yahweh wen make eryting come out real good, inside da house an inside da fields, an eryting Potifar own, cuz a Joseph.

⁶Potifar neva even make Joseph show him da receipts. Da ony ting Potifar even tink bout was wat kine food he like eat nex time. Joseph, he was one good looking guy.

⁷So afta Joseph do all dat kine stuff, an cuz he good looking, Potifar wife wen like him. She tell um, “Come! We go bed togedda.”

⁸But Joseph, he no like. He tell Potifar wife, “No way! Tink bout my boss. Wit me hea, da boss no even make me show him da receipts fo da house. He let me take ova eryting dat he own.

⁹Inside dis house, no mo nobody mo important den me. Ony one ting he hold back from me -- dass you, cuz you his wife! An you tink I goin do dat to him?! No way I goin go agains God an do dis real bad ting you talking bout!”

¹⁰Ery day, she talk to Joseph lidat, fo try make um go bed wit her o hang out wit her. But Joseph no lissen, an try fo no go nea her.

¹¹But had one time, Joseph go inside Potifar house fo work. Da odda worka guys, dey no stay dea, dat time.

¹²Potifar wife go grab his shirt an tell, “We go bed togedda now!” But Joseph, he run away outside da house. But his shirt come off, an Potifar wife still get um in her hand.

¹³Da wahine see dat Joseph run away outside from inside dea, but she get da shirt wit her.

¹⁴So she wen yell fo help real loud an da odda worka guys all come. She tell um, “Eh look! Dat Hebrew bugga Joseph, my husban wen bring um hea by us fo make us shame! Da guy wen like rape me, but I wen yell plenny fo help.

¹⁵An wen he hear me yelling, he run away outside da house, an he leave his shirt by me!”

¹⁶Da wahine wen keep Joseph's shirt. She wait till her husband come home.

¹⁷Den she tell um, “Eh! You know dat Hebrew slave guy, da one you wen go bring inside oua house? Da bugga wen come by me, fo make me shame!

¹⁸But I wen yell fo help, he run away outside da house, an he leave his shirt by me!”

¹⁹Potifar, wen he hear da tings his wife tell um bout wat his slave guy wen do, he come real huhu fo shua.

²⁰He take Joseph an trow um inside da jail wea da guys dat da king say gotta go. An dass da place Joseph stay, inside da jail.

²¹Yahweh, he wen [stick / stay tight] wit Joseph inside dea too, an take care him. Yahweh even wen make da guy in charge a da jail so he like Joseph plenny.

²²Da guy wen make Joseph in charge a all da odda prisona guys dat stay dea. Cuz a Joseph, eryting wen come out good inside da jail.

²³Afta dat, da guy in charge a da jail neva worry bout notting dat he suppose to do, cuz Joseph take care eryting an Yahweh stay wit Joseph. An eryting Joseph do, Yahweh make um come out good.