Read Hawaii Pidgin Genesis 40 Bible Online

Genesis 40 - Hawaii Pidgin bible

Genesis 40

¹Long time afta dat, had one guy dat get da job fo give da wine to da king a Egypt, an one nodda guy dat get da job fo bake da bread fo him too. Dose guys, dey wen do tings dat da king neva like.

²Da Pharaoh (dass wat da Egypt peopo call dea king guy), he come huhu wit dese two palace guys, da main guy in charge a da wine, an da main guy in charge fo bake da bread.

³So da Pharaoh guy turn um ova to da guy in charge a da army guys dat execute prisonas, fo keep um inside da prison. Was da same prison wea Joseph stay inside.

⁴Dey stay inside da prison long time, an da guy in charge a da army guys give Joseph da job fo work fo da two guys.

⁵One time, da two guys get dream nite time, wea dey stay inside da prison. Da guy dat use to give da wine to da king befo time get one dream, an same ting fo da guy dat use to bake da bread fo da king befo time. Da dreams wen mean diffren ting fo dem.

⁶Morning time, Joseph go by dem inside da prison, an he look dem, an he see dat something stay bodda dem plenny.

⁷Joseph talk to da two guys dat use to work fo Pharaoh befo time, an now dey stay wit Joseph inside da prison wea his boss stay in charge. He tell um, “Eh! Wassup? You sick o wat? Da way you guys look today, someting stay bodda you!”

⁸Dey tell um, “Nite time, us two guys wen get dream. But no mo nobody hea fo tell us wat da dream mean!” Joseph tell um, “You know, my God, he da ony one dat know wat da dream mean! So, tell me wat you guys wen see.”

⁹Den da guy dat was da boss befo time fo da peopo dat give da wine to da king, he tell Joseph wat he wen dream firs. He tell um: “Inside my dream, had dis grape plant in front me.

¹⁰On top da grape plant, had three branch. Ony had small kine buds an flowa on top, but right den an dea, da flowa come big, den quick time had plenny grapes ready fo pick awready!

¹¹I was holding da spesho wine glass fo da Pharaoh guy inside my hand, so I go grab da grapes an squeeze um so da juice go inside da glass. Den I wen give da spesho wine glass to da Pharaoh guy. An dass my dream.”

¹²Joseph tell da guy: “Kay den. I know wat dis mean, da ting you wen dream. Da three branch, dat mean, three days.

¹³Three days from now, da Pharaoh guy goin make up his mind dat you okay an no need stay inside da prison. He goin give you da same job jalike befo time, fo give da wine to him.

¹⁴So. Bumbye wen eryting come okay fo you, I like you tink bout me, an do someting good fo help me. Go tell da Pharaoh guy bout me, an aks him fo get me outa dis prison too.

¹⁵You know, I come from da land wea da Hebrew peopo stay live, but some guys wen kidnap me an bring me ova hea, an nobody ova dea know. But ova hea Egypt side, I neva do notting bad fo make um trow me inside dis prison ova hea!”

¹⁶Den da odda guy, da one dat use to befo time stay in charge a da guys dat bake da bread fo da king, he see dat wen Joseph tell wat da firs dream mean, he tell good tings going happen fo him. So dat guy tell Joseph, “Eh! Same ting wit me! Inside my dream, had dese three baskets wit fancy kine bread an cake inside. I stay carry dem on top my head.

¹⁷Inside da basket dat stay on top, had all kine stuff dat I wen bake fo da Pharaoh guy eat. But da birds wen come an eat um outa da basket on top my head!”

¹⁸Joseph tell da guy: “I tell you wat da ting you wen dream mean. Da three basket, dat mean, three days.

¹⁹Three days from now, da Pharaoh guy goin tell da army guys fo cut off yoa head an hang yoa body on top one pole. Den da birds goin come ova dea an eat da meat from yoa body.”

²⁰So den, three days from dat time, da Pharaoh guy wen make one big party fo his birfday. He tell all his importan worka guys come. Den, he tell all dem guys fo go get da guy dat befo time stay in charge a da guys dat give da wine to da king, an da guy dat befo time bake da bread fo da king, an dey bring um to him.

²¹Fo da firs guy, dat befo time was in charge a da guys dat give da wine to da king, da king give um back da same job jalike befo time.

²²Da odda guy, dat befo time was in charge a da guys dat bake da bread fo da king, da king tell da army guys fo kill um an hang um on top one pole. Eryting happen jalike Joseph wen tell da two guys bout wat dey wen dream.

²³Still yet, da guy in charge a da peopo dat give da wine to da king, he neva even tink bout Joseph. Da guy wen go foget all bout him!