Read Hawaii Pidgin Genesis 49 Bible Online

Genesis 49 - Hawaii Pidgin bible

Genesis 49

¹Lata, Jacob tell all his boys fo come by him. He say, “Come togedda aroun me. I goin tell you guys wat goin happen to you afta I mahke.

²My boys, Jacob kids, Come lissen to me, Israel, yoa fadda guy.

³“Reuben! You my numba one boy. You wen born wen I was mo strong. You da numba one in da family, An da mos importan one fo get powa.

⁴But eh! You not too strong inside, jalike da wave watta! Dass why you not goin come out okay, from now. Cuz you wen make sex wit my odda wife, An do pilau ting on top my bed, dat time.

⁵“Simeon an Levi! Dey same kine brudda guys. Dey like hurt peopo.

⁶No go tink dat I like make plan wit dem guys. Wen dey come togedda, I no like stay wit dem. Cuz wen dey come huhu, dey kill peopo, An dey even hurt da cows, fo notting.

⁷I like bad ting happen to dem weneva dey come real huhu, An weneva dey tink az okay fo dem make any kine. Az why I goin put dem one side, inside da Jacob ohana, An no come togedda wea da Israel peopo live.

⁸“Judah! Yoa brudda guys, Dey goin say you awright. Erybody dat go agains you, You goin make dem do wat dey suppose to. Yoa odda brudda guys, dey goin go down in front you fo show you respeck.

⁹Judah, he jalike one young lion. He come big cuz he kill meat fo eat. Jalike da lion, he lay on top da groun, Ready fo jump an kill all da animals. Jalike da lion, no mo nobody goin make um get up!

¹⁰Judah, da spesho stick dass fo show he da king, His ohana goin keep um fo eva. Peopo from odda place goin bring him money an all kine stuffs, An da odda peopos goin do wat he tell um fo do.

¹¹“Judah get plenny grape farm, So he no lose notting if he tie his donkey to one grape plant, An da bebe donkey, he tie um to da plant dat get da bestes grape. He no need watta fo make his clotheses come clean, Cuz he rich, an he get plenny wine fo wash um, An he can even wash his robe wit da juice from da grape.

¹²His eye, shine mo den da wine. His teeth, mo white den da milk.

¹³“Zebulon! He goin live by da beach. He goin make boat harbor. Da Sidon peopo goin be his neighbor guys.

¹⁴“Issachar! He jalike one donkey dat get strong bones Dat like lay down in between da two bag he suppose to carry.

¹⁵He figga, az good place fo rest. Nice, da land. All da time, he jus one worka guy. Az why no bodda him work hard fo carry big load.

¹⁶“Dan! He goin be da judge fo his peopo, Cuz dey goin be one a da ohanas dat goin come from me, Israel.

¹⁷Dan goin be jalike one snake dat stay nea da road, Jalike one snake wit poison dat stay nex to da trail Fo bite da horses feet So da guy on top da horse fall down.

¹⁸Den Jacob pray lidis: “Eh Yahweh! I stay waiting fo you, God, Cuz I know you goin come help me!”

¹⁹Jacob tell: “Gad! Goin get steala guys dat come togedda an bus him up. But lata, Gad goin go afta dem an bus up dem too.

²⁰“Asher! He goin make fancy kine bread, An fancy kine food, da kine da king guys like eat.

²¹“Naftali! He jalike one wahine kine deer Dat da peopo let run away, An bumbye, get nice looking bebe deer.

²²“Joseph! He jalike one tree branch dat get plenny fruit Ova dea wea da watta come outa da groun. Jalike one branch wit leafs, Dat grow ova da wall.

²³“Da army guys dat use bow an arrow, Dey make plenny presha fo Joseph. Dey wen stay nuha wit him.

²⁴But Joseph, his bow neva lose fight An his hand stay strong fo move quick, Cuz da Strong God, da one I pray to, me, Jacob, He make Joseph strong too. Jalike God da Sheep Farma dat take care me, Jalike he da Big Rock dat stay help me, Israel.

²⁵God, he da God fo me,nyoa fadda guy, Da God dat help you, Joseph, Da God Wit All Da Powa, dat do good tings fo you. He make good kine stuff come down from da sky fo you, An good kine stuff from da deep ocean dat stay unda da sky, An from da wahine dat give you kids from her belly an her breastes.

²⁶“Me, yoa fadda, I like da good tings dat I do fo you Come mo plenny den all da good tings you goin get from da mountains, An from da nice tings dat get Inside da hills dat goin stay fo eva. I like all dis good stuff come to Joseph, On top his head, his girigiri, Cuz he da guy dat wen come mo importan den all his odda brudda guys.

²⁷“Benjamin! He jalike one wild dog dat go afta da animals. Morning time, he eat da wild meat. Evening time, he half half da stuff he steal.”

²⁸Dass da twelve ohanas dat come from Israel, an dass wat dea fadda guy tell um wen he make da spesho blessing fo dem. Fo ery boy, he wen give um da kine words dat stay right fo him.

²⁹Den Israel tell his boys wat dey gotta do. He say, “Pretty soon, I goin mahke an go meet my peopo. Bury me da place wea my ancesta guys stay, ova dea inside da cave inside da piece land dat Efron da Het guy had,

³⁰da one inside da Makpelah field, wea can see Mamre, Canaan land. Dass the land dat Abraham wen buy fo bury his peopo dea, from Efron da Het guy.

³¹Dass da place dey wen bury Abraham an his wife Sarah. Same ting fo Isaac an his wife Rebecca. Dass da same place I wen bury Leah.

³²Az da land wit da cave inside dat our ancesta guy wen buy from da Het peopo.”

³³Afta Jacob pau tell his boys wat dey gotta do, he wen pull his feets inside da bed. Den he breave da las time an mahke, an he go meet his peopo from befo time.