Read Hawaii Pidgin Genesis 6 Bible Online

Genesis 6 - Hawaii Pidgin bible

Genesis 6

¹Afta dat, wen start fo get plenny peopo inside da world, an dey get daughtas.

²Had guys jalike gods dat wen check out da daughtas dat born to da peopo. Dey see dat da wahines was good looking, an dey pick da ones dey like fo marry.

³Den Yahweh tell, “I wen give da peopo my spirit inside dea bodies fo make um stay alive. Still yet, dey ony peopo. My life no goin stay inside dem foeva. So from now, dey ony goin live hundred twenny year.”

⁴Had big strong kine peopo too inside da world dat time. Den, afta dat time, da guys dat jalike gods an da daughtas dat born to da peopo wen come togedda an get kids. Dea kids was da awesome guys dat come from dem, an erybody know da stories bout dem.

⁵Yahweh wen see how da peopo was doing mo an mo plenny bad kine stuff, all ova da world. Erytime da peopo tink an make plan, dey ony tinking how fo do bad kine stuff all da time.

⁶Yahweh, he tinking, “Auwe! Mo betta I neva make dose peopo dea inside da world!” He stay sore inside cuz a dat.

⁷An den Yahweh tink, “I goin wipe out from da world all da peopo I wen make awready. I goin wipe out all da animals too, an da small kine tings dat crawl, an da birds dat fly inside da sky, cuz bodda me dat I wen make um.”

⁸Ony one ting: Had one guy Noah. Yahweh wen see dat Noah live da way Yahweh like.

⁹Dis da story bout how was, da time Noah stay alive. Noah was one guy dat do da right ting erytime. From all da peopo dat live dat same time, nobody can poin finga Noah. Cuz Noah stay tight with God wateva he stay doing, az why.

¹⁰Noah, he get three boys: Shem, an Ham, an Jafet.

¹¹Dat time, da way God see um, all da peopo wen come poho inside. Da peopo all ova da world, dey ony like bus up each odda.

¹²God wen see dat erybody inside da world make demself come poho. Da way dey live, all da peopo stay ack pilau awready.

¹³Den God tell Noah, “I look all da peopo in front me, an all ova da world, dey ony like tink how dey goin bus up each odda. But me, you know wat I goin do? I goin wipe um all out big time!

¹⁴So den. Go get cypress wood, an make one big boat fo yoaself. Make rooms inside, an put tar from da groun all ova da inside an da outside.

¹⁵Dis how big you gotta make da boat: 150 yard long, an 25 yard wide, an 15 yard high.

¹⁶Make roof on top da boat, an make um open all round, eighteen inch down from da roof, so da light goin go inside. On da side, make one door fo da boat. Inside, make da bottom decks, an da decks numba two an three.

¹⁷“Cuz you know wat I goin do? I goin make da big watta come, wit watta from da sky all ova da groun. Dass how I goin wipe out eryting dat stay alive and breave unda da sky. Eryting dat stay alive on top da groun goin mahke.

¹⁸But fo you, I goin make one spesho deal. You goin go inside da big boat, you an yoa boys, an yoa wife, an yoa boys wifes wit you. Dass how you guys goin stay alive.

¹⁹So you goin get two animals, boy kine an girl kine, from ery kine animal dat get inside da world. You goin take dem all inside da big boat, so you goin make shua dey goin stay alive cuz dey stay wit you.

²⁰From ery kine bird, an ery kine animal dat live wit peopo, an ery kine ting dat crawl on top da groun, two a dem goin come by you, fo you make shua dey goin stay alive.

²¹Dis wat you gotta do: Go get togedda ery kine ting dat you an da animals eat, an put um inside da boat. Dass goin be da food fo you an fo dem.”

²²So, Noah wen do eryting dat God wen tell um fo do.