Read Hawaii Pidgin Genesis 9 Bible Online

Genesis 9 - Hawaii Pidgin bible

Genesis 9

¹God wen give Noah an his boys da powa so dey can do eryting he like um fo do. He tell um, “Get plenny kids now, an go make da world wit mo plenny peopo.

²All da wild animals all ova da world, an all da birds inside da sky, an all da tings dat crawl on top da groun, an all da fishes inside da watta -- dey all goin be real scared a you guys, but still yet you guys goin be in charge a dem.

³All da animals dat stay alive, goin be food fo you guys. Same ting wit da green plants -- I give um all to you guys.

⁴“Ony one ting -- I no like you guys eat meat dat still yet get da blood inside, cuz dass wat make da animal stay alive.

⁵An fo you guys too, anybody dat go make you guys bleed an mahke, eh! I da Judge, an I goin make dem bleed an mahke too. Even one animal dat kill one guy o one wahine, I goin make dat animal bleed an mahke too. An anybody dat go kill one guy o one wahine, I da Judge, an I goin take away dea life, cuz dey wen kill somebody dass jus like dem.

⁶Whoeva go make somebody bleed an mahke, Somebody gotta make dem bleed an mahke. Cuz God wen make da peopo Jalike dey one picha, Made fo look jalike him, same same.

⁷“So den, you guys. Get plenny kids, an go fill up da world wit mo plenny peopo.”

⁸Den God tell Noah an his boys:

⁹“So! Dis da deal I making fo you guys, an fo da peopo dat goin come from you guys bumbye,

¹⁰an fo all da animals dat stay by you guys -- I mean, da birds, an da farm animals, an all da wild animals, eryting dat wen come outa da big boat wit you guys, all da animals dat stay alive now on top da groun.

¹¹Dis da deal dat I making fo you guys. I make dis promise: no way eryting dat stay alive goin get wipe out again from da big watta. No goin get big watta lidat fo mess up da whole world one mo time!”

¹²God tell um dis too: “An now, I goin do dis: I give you guys one sign, so you guys no foget dat you get deal wit me. Dat deal, fo me an fo you guys, an fo all da animals dat stay wit you guys. Da sign stay fo now, an stay fo all da peopo dat goin come from you guys afta.

¹³My rainbow in da heavy clouds, Dass da sign I give you guys. Erytime get rainbow, Dat goin be da sign fo make you guys rememba Dat I wen make dis deal fo da whole world.

¹⁴Erytime bumbye I make da heavy clouds come ova da groun, Goin get rainbow up dea in da clouds.

¹⁵Den you guys goin know dat I tinking Bout da deal I wen make fo you guys, An fo eryting dat stay alive. Dass why I no goin send big watta bumbye Dat goin wipe out eryting dat stay alive.

¹⁶Weneva da rainbow stay in da cloud, I goin look um, an I goin tink about da deal dat I wen make, dat stay foeva - me, God, I awready get deal wit all da tings dat stay alive on top da groun.”

¹⁷Dass wat God wen tell Noah: “Da rainbow, dass da sign fo da deal I wen make fo eryting dat stay alive on top da groun.”

¹⁸Dat time, had Shem, an Ham, an Jafet, Noah three boys, dat wen come outa da big boat wit him. An Ham, he get one boy name Canaan.

¹⁹Dey da three Noah boys, dat erybody no matta wea dey go all ova da whole world, dey come from dem.

²⁰Noah, he one farma guy. An he da firs guy dat eva plant one grape farm.

²¹One time, Noah wen drink some a da wine from da grape farm, an he come drunk. An right dea inside da tent, he take off all his clotheses.

²²Ham, da one dat get da boy Canaan. Ham wen see his fadda Noah naked. But Ham, he no shame, he go outside da tent make big deal bout um to da two brudda guys .

²³Shem an Jafet, dey wen look da odda way fo no see dea fadda naked. Dey go get one blanket an hold um behind dem an go backwards inside da tent, an dey cova him wit da blanket. Dat way, dey neva see notting.

²⁴Latas, Noah wen wake up from drunk. He find out wat his boy Ham wen do to him.

²⁵Noah tell, “I like God make bad tings happen to da Canaan ohana! I like dey come jalike slave guys Dat gotta do da kine work dat nobody like even do, Fo dea brudda guys an dea peopo!”

²⁶Noah say dis too: “I like erybody say good tings bout Yahweh, Da God dat my boy Shem pray to! But da Canaan ohana, dey goin come slaves fo da Shem ohana!

²⁷I like God give da Jafet ohana all da land dat dey need! I like Jafet an his peopo go live togedda wit da Shem ohana, But da Canaan ohana, dey goin come slaves fo da Jafet ohana!” (You know, "Jafet" sound kinda like how dey say "give big place" Hebrew language.)

²⁸Afta da big watta come, Noah wen live 350 year moa.

²⁹From da time Noah wen born till he mahke, was 950 year.