Read Hawaii Pidgin 1 Kings 11 Bible Online

1 Kings 11 - Hawaii Pidgin bible

1 Kings 11

¹But King Solomon wen love plenny wahines from odda places an like marry dem. He love Pharaoh daughta -- an wahines from da Moab peopo, da Ammon peopo, da Edom peopo, da Sidon peopo, an da Het peopo too.

²Dey come from diffren peopos, da ones Yahweh tell da Israel peopo befo time, “No marry dem. No let dem marry you. Cuz if you do dat, bumbye fo shua, dey goin make you hamajang an you goin start fo follow dea gods, an stop fo follow me, yoa God!” But Solomon, he no can stop love da wahines.

³He get 700 wifes come from king kine ohanas, an 300 odda kine wifes. An da wifes start fo make Solomon head come hamajang an he wen follow dea gods.

⁴Den wen Solomon come ol, his wifes wen make Solomon heart go follow dea odda kine gods. Deep inside his heart, he no no stay okay cuz he no stay tight wit Yahweh no moa, da God he pray to. He no stay like his fadda guy David.

⁵So Solomon go pray to Ashtoret, da wahine idol kine god dat da Sidon peopo stay pray to. He go pray to Molek too, da pilau kine idol god dat da Ammon peopo stay pray to.

⁶So Yahweh see Solomon stay do bad kine stuff. He no stay tight wit Yahweh, da way his fadda David was.

⁷He wen build one place on top da Olive Ridge across Jerusalem fo pray to Kemosh da pilau idol kine god dat da Moab peopo stay pray to, an one odda place fo Molek da pilau kine idol god dat da Ammon peopo stay pray to.

⁸He wen do da same ting fo all da odda wifes he get from odda places, fo dem burn incense an make sacrifice fo dea own gods.

⁹Yahweh come huhu with Solomon, cuz he let his wifes turn him away from Yahweh. He no stay tight wit da God fo da Israel peopo, no matta God wen let Solomon see him two time.

¹⁰No matta Yahweh tell Solomon no pray to odda gods dat not fo him, Solomon neva do wat Yahweh wen tell um fo do.

¹¹So Yahweh tell Solomon: “Cuz a all dis stuff you stay do, an you no keep yoa side a da deal, an you no do da tings I wen tell you you gotta do, dis wat I goin do. Fo shua, I goin take away da right fo you be da king. I goin give one a da guys dat work fo you, da right fo come da king.

¹²But cuz a yoa fadda David, I no goin take um away from you da right fo be king, befo you mahke. But fo yoa boy, I goin take away da right fo him be da king.

¹³Still yet, I no goin take away all da rights fo yoa boy be king. I goin give him jus yoa ohana an one nodda ohana fo be dea king too, cuz David wen work fo me, an I awready pick Jerusalem town fo be mines.”

¹⁴Den Yahweh set up one guy fo throw off Solomon. Dis guy was Hadad, from da king ohana Edom side.

¹⁵Now dis da story, how was fo Hadad. Befo time wen David stay fight da Edom peopo, his main army guy Joab wen go Edom side fo bury da Israel army guys dat da Edom guys wen kill. But wen Joab stay dea, he kill ery man dat live Edom side.

¹⁶Joab an all da odda Israel army guys stay inside Edom fo six months, till all da Edom guys wen mahke.

¹⁷Hadad ony was one young guy dat time, but him an some a da Edom guys dat work fo his fadda befo time, dey run away, fo go Egypt side.

¹⁸Dey start from Midian side, den dey go wes Paran side. Dey take some guys wit dem from Paran an go Egypt side by Pharaoh, da king fo da Egypt peopo. Da Pharaoh guy give Hadad one house, an tell his guys fo feed dem, an even give um some land.

¹⁹Da Pharaoh guy wen really like Hadad. He give Hadad his sista in law, Queen Tahpenes sista, fo marry.

²⁰Tahpenes sista [wen] born one boy Genubat fo Hadad. His auntie Tahpenes [wen] raise him right dea inside Pharaoh palace, wit Pharaoh's own kids.

²¹Hadad stay Egypt side long time. Den he hear dat David wen mahke an stay sleep wit his ancesta guys, an he hear dat Joab da main Israel army guy mahke too. Hadad tell da Pharaoh guy, “Let me go, so I can go back my own country.”

²²Da Pharaoh guy aks Hadad, “How come you like go back yoa own country? Wat ova dea get, dat mo betta den get ova hea by me?” Hadad tell um, “Notting. Eryting okay ova hea. But, I like you let me go!” Dass how Hadad wen come back Edom side.

²³An God wen get one nodda guy Rezon, Eliada boy, fo go make pilikia fo Solomon too. Befo time, Rezon work fo Hadadezer, da king fo Zobah, but den he run away from Hadadezer.

²⁴Wen David wipe out da Zobah army guys, Rezon go get togedda plenny guys fo go by him, an he come da leada man fo one gang dat rip off peopo. Den Rezon an his gang guys go Damascus town an live dea, an take ova Damascus.

²⁵All da time Solomon stay alive, Rezon make trouble fo Solomon, jalike Hadad. Rezon stay king fo da Aram peopo, but he really hate da Israel peopo.

²⁶Jeroboam, Nebat boy, he make plenny trouble fo King Solomon too. Befo time, Jeroboam work fo Solomon. He from da Efraim ohana an live Zeredah side. His mudda, one widow wahine, Zeruah.

²⁷Dis, da story how Jereboam wen go agains King Solomon. Solomon wen fix up da place da army guys need so nobody can come attack Jerusalem. He fix one place wea da wall no go across one gulch, inside da big town his fadda David wen build.

²⁸Jeroboam was one awesome strong young guy. Solomon see how he do real good work. So he make him da head luna fo all da guys from da Efraim an Manasseh ohanas dat gotta come work hard fo Solomon.

²⁹Dat time, Jeroboam go outside Jerusalem to da country side. Ahijah, da talka from God dat live Shiloh side, meet Jeroboam on top da road, jus dem two guys out da country side. Ahijah stay wear one new robe.

³⁰Den Ahijah hold da new robe he stay wear, an broke um up fo make twelve piece.

³¹Ahijah tell Jeroboam, “Take ten a da pieces fo yoaself. Cuz dis wat Yahweh, da God fo da Israel peopo, tell. He tell, ‘Lissen up! I goin take away da right from Solomon fo be da king! An I goin give you ten a da Israel ohanas.’ Dis why I stay broke dis robe fo make small pieces.

³²‘Cuz I get respeck fo my worka guy David, an fo Jerusalem town, da place I wen pick from all da Israel ohana land, get one ohana goin stay wit da David ohana.

³³Az cuz da Israel peopo wen go leave me. Dey go pray to Ashtoret da wahine god fo da Sidon peopo, an Kemosh da god fo da Moab peopo, an Molek da god fo da Ammon peopo. Dey no do da way I tell um fo go. Dey no do da tings dat I say stay right. Dey no do wat I tell um dey gotta do. Dey no lissen me, da real Judge. Dey no make like David, Solomon's fadda, cuz David do all dat da right way.

³⁴‘But I no goin take away all da right Solomon get fo be king. I wen make him one king awready, fo all da time he stay alive. I let um stay king, cuz a his fadda David. I wen pick David, da guy dat do eryting I tell um he gotta do. An he wen stick wit my rules. ‘

³⁵But from Solomon's boy, I goin take away da right fo him be king. I going give you da right fo come king fo ten a da ohanas.

³⁶I jus goin leave da Judah ohana an one nodda ohana fo Solomon's boy. Cuz I like fo my worka guy David erytime get one guy dat come from him, Jerusalem side, fo show my peopo wea fo go, jalike one oil lamp dat goin burn in front me foeva. Az cuz I wen pick Jerusalem town fo be da place wea erybody can find out wat kine God me.

³⁷An fo you, I goin take you an make you da king fo be in charge eryting you eva like get. You goin be da king ova da Israel peopo.

³⁸An if you lissen an do eryting I tell you you gotta do, an if you do um my way, an do wat I say stay right, an if you stay do da tings I tell you fo do, an follow my rules, jalike my worka guy David wen do, den I goin stick tight wit you. I goin make da ohana dat goin come from you stay solid, jalike I build one strong house fo you. Goin be solid jalike da David ohana stay solid. An I goin give you da Israel land.

³⁹I goin make da ohana dat come from David come shame cuz a wat Solomon stay do, but dey no goin stay shame foeva.’-”

⁴⁰Solomon wen try fo kill Jeroboam. But Jeroboam go run away Egypt side by Shishak da king fo da Egypt peopo. He live dea till Solomon mahke.

⁴¹Get plenny odda tings Solomon wen do -- da tings he make, da way he show peopo how he know wat fo do erytime. All dat, stay inside da govmen books about Solomon time.

⁴²Solomon was da king Jerusalem side fo all da Israel peopo, fo 40 year.

⁴³Den Solomon wen mahke an sleep by his ancesta guys. Dey bury him inside da big town his fadda David wen build. An Rehoboam come da nex king.