Read Hawaii Pidgin 1 Kings 16 Bible Online

1 Kings 16 - Hawaii Pidgin bible

1 Kings 16

¹One time, Yahweh give Jehu, Hanani boy, dis message fo King Ba`asha:

²“Befo time, you was notting. I wen pick you up from da dirt. I wen make you leada guy fo my peopo, da Israel peopo. But you wen go make jalike King Jeroboam. You make my Israel peopo cuz go do bad kine stuff. Cuz a you, an da bad tings dey do, dey piss me off!

³So, I goin wipe out you an all yoa ohana, King Ba`asha. I goin make yoa ohana come jalike da ohana dat come from Jeroboam, Nebat boy, all pau.

⁴Anybody from yoa ohana mahke inside one town, da dogs goin eat um. If dey stay mahke inside da country side, da scavenja birds goin eat um.”

⁵All da odda stuff dat stay happen wen Ba`asha stay king, an all da tings he wen do, an all da powa he get, stay write inside da Record Book Fo Da Kings Fo Israel.

⁶Den Ba`asha mahke. Da peopo bury him wit his ancesta guys inside Tirzah town. An Ba`asha boy Elah come da nex king.

⁷All da time Ba`asha was king, he make any kine fo piss off Yahweh. He ack jalike da Jeroboam ohana. Yahweh even give Jehu, Hanani boy, da talka fo God, da message fo King Ba`asha an his ohana. Jehu tell um all da kine stuff Yahweh see Ba`asha stay do, jalike da Jeroboam ohana guys do. An cuz a dat, God go afta Ba`asha too.

⁸Da numba 26 year dat Asa stay king Judah side, Elah, Ba`asha boy, come king fo da Israel peopo. He stay king Tirzah town, two year.

⁹One guy Zimri, dat one a da palace guys fo Elah an stay in charge a half da war wagons, make plan fo kill Elah. Dat time, Elah go Tirzah side, Arza house, da guy dat stay in charge a da Tirzah palace, an he stay drink an come drunk ova dea.

¹⁰Zimri go ova dea an hit Elah an kill um. Den Zimri take ova an come king afta Elah. Dat time was numba 27 year dat Asa stay king Judah side.

¹¹Wen Zimri take ova da throne fo come king, he go kill all da guys from da Ba`asha ohana, an even Ba`asha's odda ohana guys an dea friends.

¹²Dass how Zimri wen wipe out all da Ba`asha ohana peopo. Dis happen jalike Yahweh wen tell his talka guy Jehu fo tell Ba`asha.

¹³Yahweh make dis happen cuz a all da bad kine stuff Ba`asha an his boy Elah wen do, an all da bad kine tings dey wen make da Israel peopo do, fo make dea God Yahweh come huhu, cuz Ba`asha an Elah wen stick to da idol kine gods dat no can do notting.

¹⁴Da odda stuff dat happen wen Elah stay king, an all da tings he wen do, stay write inside da Record Book Fo Da Kings Fo Israel.

¹⁵Da numba 27 year wen Asa stay king fo da Judah peopo, Zimri wen come king Tirzah town -- but ony seven days. Dat time, da Israel army guys stay camp in tents fo make ready fo fight da Filisha peopo dat live Gibbeton town.

¹⁶Wen da Israel army guys inside da camp find out dat Zimri wen make plan an kill King Ba`asha, dat same day da Israel guys wen make da general fo dea army, Omri, da king fo Israel, right dea inside da camp.

¹⁷Den Omri an all da Israel guys wit him wen go way from Gibbeton town, an go all aroun outside Tirzah town fo attack um.

¹⁸Wen Zimri see da Israel army goin take ova Tirzah town, he go inside da place wit real strong wall inside da palace, an burn down da palace on top him. Dass how he wen mahke,

¹⁹cuz a da kine tings Zimri wen do, dat stay bad da way Yahweh see um. Da way Zimri do bad kine stuff, an da way he make da Israel peopo do bad kine stuff too, he make jalike Jeroboam wen do.

²⁰Da odda stuff dat happen wen Zimri stay king, an how he make plan fo kill King Elah, all dat stay write inside da Record Book Fo Da Kings Fo Israel.

²¹Dat time, da Israel peopo wen go take sides. Half a dem like Tibni, Ginat boy, fo come king, an da oddas like Omri stay king.

²²But da peopo dat stick wit Omri mo strong den da peopo wit Tibni, Ginat boy. Az why Tibni mahke, an Omri stay da king.

²³Was da numba 31 year dat Asa stay king Judah side, wen Omri come king fo da Israel peopo. He stay king twelve year. Da firs six year, he stay Tirzah town.

²⁴Den Omri buy da hill dey call Samaria now. He buy um from Shemer, an he pay Shemer 150 pound silva. On top dat hill, he build one town. He give da town da name Samaria, fo no foget da name Shemer, da guy dat own da hill befo time.

²⁵But Omri, he do bad kine stuff, da way Yahweh see um. Omri wen do mo plenny bad kine stuff den all da king befo him.

²⁶Omri wen do all da same kine bad stuff jalike Jeroboam, Nebat boy, wen do. He make da Israel peopo do bad kine stuff too. Az how Omri make Yahweh come huhu, da God Fo Da Israel Peopo, cuz Omri pray to da idol kine gods dat no can do notting.

²⁷Odda stuff wen happen wen Omri stay king, an all da tings he wen do, an all da powa he get, stay inside da Record Book Fo Da Kings Fo Israel.

²⁸Den Omri mahke jalike his ancesta guys. Da peopo bury him inside Samaria town. An Omri boy Ahab come da nex king.

²⁹Ahab, Omri boy, come da nex king fo da Israel peopo, da numba 38 year dat Asa stay king fo da Judah peopo. Ahab stay king fo da Israel peopo inside Samaria town 22 year.

³⁰Ahab, Omri boy, he do plenny bad kine stuff, da way Yahweh see um, mo bad den all da odda king guys befo him.

³¹Fo Ahab, az no big ting fo him do da same kine bad kine stuff jalike Jeroboam, Nebat boy. He wen marry Jezebel, her fadda Etba`al, da king fo da Sidon peopo. He wen start fo make da god Ba`al be his god, an go down an show um respeck.

³²He build one temple fo Ba`al Samaria side, an he put one altar dea fo make sacrifice to Ba`al.

³³An he put up one pos dea fo pray to da wahine god Asherah too. He do plenny fo make Yahweh, da God Fo Da Israel Peopo, come huhu, mo den all da odda kings fo da Israel peopo dat come befo him.

³⁴Da time Ahab stay king, one guy Hiel from Bethel town wen go build Jericho town one mo time. Wen he make da foundation, his numba one boy Abiram mahke. Wen he put up da big town gate, his mos young boy Segub mahke. Dass wat Joshua, Nun boy, tell befo time, cuz Yahweh tell um fo say dat.