Read Hawaii Pidgin 1 Kings 18 Bible Online

1 Kings 18 - Hawaii Pidgin bible

1 Kings 18

¹Long time afta dat, da numba three year dat no mo rain, one message come from Yahweh fo Elijah: “Go talk to King Ahab. Cuz now, I goin make rain come down on top da groun.”

²So Elijah go back Israel side, so Ahab can see him an know dat he dea awready. Dat time, no mo food Samaria side, an hard fo da peopo dea.

³Wen Elijah stay on da road fo go Samaria side, King Ahab tell his worka guy Obadiah fo come by him. (Obadiah stay in charge a Ahab palace, an he one guy dat get plenny respeck fo Yahweh.

⁴Befo time, wen Jezebel stay kill da guys dat talk fo Yahweh, Obadiah wen take one hundred a dem an hide um, fifty inside one big cave, an fifty mo inside one nodda cave, an he make shua dey get food an watta.)

⁵Ahab tell Obadiah, “Go all ova da land. Check out all da pukas get watta come outa da groun, an all da valleys dat get stream wit watta. Maybe can find some grass fo da horse an mule so dey stay alive an we no need kill any a da animals.”

⁶Ahab an Obadiah half half da place dey gotta go. Ahab go one side, an Obadiah go da odda side, dey no go togedda.

⁷So Obadiah walk down da road. Elijah meet him. Obadiah see Elijah an know dass him. So Obadiah go down on top da groun fo show respeck, an he tell Elijah, “Eh, az you fo real, my boss, Elijah?!”

⁸Elijah tell, “Yeah, dis me! Go tell yoa boss, ‘Elijah stay come awready!’-”

⁹Obadiah tell, “Wat I wen do wrong, fo me gotta do dis?! Cuz if I do wat you tell me fo do, az jalike you set me up so my boss Ahab goin kill me fo shua!

¹⁰I shua dat yoa God Yahweh stay alive, an I shua bout dis too: my boss Ahab wen send peopo to ery country an ery king fo look fo you! An wen dey tell, ‘Elijah no stay hea,’ den Ahab make da king say fo real in front God, dat dey no can find you.

¹¹An now, you tell me go tell my boss, ‘Elijah stay hea awready!’.

¹²But me, afta I leave you, I donno wat place God Spirit goin pick you up an take you. If I go tell Ahab dat you stay hea, an he no can find you hea, he goin kill me! No matta I yoa slave guy, an I get plenny respeck fo Yahweh from small kid time.

¹³Maybe nobody tell you, boss, wat I wen do befo time, da time Jezebel stay kill da guys dat talk fo Yahweh. I wen take hundred a dem an hide um inside two big cave, an make shua dey get food an watta.

¹⁴But now, you telling me fo go tell my boss, ‘Elijah, he hea awready!’ He goin kill me fo shua!”

¹⁵Elijah tell, “Jalike I shua dat Yahweh, Da God Ova All Da Armies, stay alive, I shua I goin stand in front Ahab today, an I goin let him see me!”

¹⁶Den Obadiah go fo meet Ahab. He tell Ahab wat wen happen. Den Ahab go fo meet Elijah.

¹⁷Wen Ahab see Elijah, he tell um, “So! You, da guy dat stay make trouble fo all da Israel peopo!”

¹⁸Elijah tell, “No ways! I neva make trouble fo da Israel peopo. You an yoa fadda guy ohana wen make trouble, cuz you guys neva do da tings Yahweh tell you fo do, an you pray to da Ba`al kine gods.

¹⁹“So now, go send peopo all ova da Israel land fo bring togedda all da peopo by me on top Mount Carmel. An bring da 450 talkas fo da Ba`al god, an da 400 talkas fo da Asherah god, dat Jezebel stay give food from her palace!”

²⁰So Ahab send guys fo go by all da Israel peopo, an fo tell da talka guys fo dea gods come togedda Mount Carmel.

²¹On top Mount Carmel, Elijah go in front all da peopo. He tell, “You guys gotta make up yoa mind right now, one way o da odda way! If Yahweh stay God fo real kine, go wit him! But if Ba`al stay God fo real kine, go wit him!” Da peopo, dey no say notting.

²²Den Elijah tell da peopo, “Me, I da ony talka fo Yahweh dat neva mahke. But Ba`al, he get 450 guys dat talk fo him.

²³Go get two boy kine cows, one fo me an one fo dem. Dey can pick da one dey like. Den dey goin kill um an cut um up an put da pieces on top da wood, but no put fire. Me, I goin do same ting wit da odda cow, an put da pieces on top da wood, but I no goin put fire, too.

²⁴Den, you guys call yoa god's name, an I goin use Yahweh name fo call him. Wateva god send da fire fo show dat he stay lissen, dass da God dat stay fo real!” All da peopo tell, “Az good, wat you tell.”

²⁵Elijah tell da talka guys fo Ba`al, “Get plenny a you guys, so go do um firs. Pick one a da boy kine cows an make um ready. Den call yoa god name, but no light da fire.”

²⁶Da talka guys fo Ba`al take da cow Elijah wen give um an kill um fo make ready da sacrifice. Den dey go use Ba`al name fo call him. Dey do dat from morning time till noon time. Dey yell, “Eh, Ba`al, lissen to us guys an do someting!” But dey no hear notting from Ba`al. Nobody answer dem. Den dey go dance all ova da altar dey wen build.

²⁷Wen come noon time, Elijah start fo mout off at dem. He tell, “Yell mo loud! Cuz Ba`al one god. Maybe he stay tink real hard bout someting, o maybe he stay inside da lua, o he go holoholo. Maybe he stay sleep, an gotta wait till he wake up!”

²⁸So den dey wen yell mo loud, an cut demself wit sword an spear, cuz dass wat dey do, till da blood come out.

²⁹Aftanoon time, dey do same ting. Dey making like da talkas fo Ba`al suppose to make, spazzing out, till evening time, wen time fo make da regula kine sacrifice. But Ba`al no do notting, nobody answa dem, nobody lissen dem.

³⁰Den Elijah tell all da peopo, “Come ova hea by me!” Dey all come. He fix da altar fo make sacrifice fo Yahweh, dat stay broke.

³¹Elijah go get twelve stone, one stone for ery one a da twelve ohanas dat come from Jacob. (An Jacob, he da guy long time ago get message from God, “From now, yoa name goin be ‘Israel.’-”)

³²Elijah use da stones fo build up da altar one mo time, fo show wat kine God Yahweh. He dig one big ditch aroun da altar, nuff fo plant two box seed.

³³He fix da firewood jus right, an cut up da cow an put da pieces on top da wood.

³⁴Den Elijah tell da peopo, “Go fill up four big pots wit watta, an pour um on top da sacrifice meat an on top da wood.” Afta dey do dat, he tell um “One mo time, same ting,” an dey go do um again. He tell um, “One mo time,” an dey do um, three time.

³⁵Da watta go all ova da altar an fill up da ditch too.

³⁶Wen time fo make da sacrifice, Elijah da talka fo God go by da altar an pray lidis: “Yahweh, you da God fo Abraham an Isaac an Israel. Today, I like erybody know, dat you da God fo da Israel peopo, an you da boss fo me. An all dese tings I do, I do um cuz dass wat you tell me fo do.

³⁷Yahweh, do someting fo show you lissen to me, so den dis peopo goin know dat you Yahweh, you da God dass fo real, an dat you stay make dea heart come back by you.”

³⁸Right den an dea, fire from Yahweh wen come down outa da sky. Da fire burn up da sacrifice, an da wood, an da stones an da dirt, an even da watta inside da ditch.

³⁹Wen all da peopo see dis, dey go down wit dea face on top da groun, an dey yell, “Yahweh, he da God fo real kine! Yahweh, he da God fo real kine!”

⁴⁰Den Elijah tell da peopo, “Grab da guys dat talk fo Ba`al! No let even one a dem run away!” Da peopo grab dem. Elijah tell da peopo go take um down by da Kishon Stream, an he kill um all dea.

⁴¹Den Elijah tell King Ahab, “You go home now, fo eat an drink. Cuz sound jalike goin get heavy rain!”

⁴²Ahab go home fo eat an drink. Elijah, he go back up Mount Carmel to da top. He bend down to da groun, an put his face on his knees.

⁴³Elijah tell da guy dat work fo him, “Go ova dea an look makai side.” Da guy go an look. He tell, “No mo notting ova dea.” Seven time, Elijah tell um, “Go back look!”

⁴⁴Da numba seven time, da worka guy tell, “Eh! Get cloud, small kine. Look like one hand. Stay come up outa da ocean.” Elijah tell, “Go by King Ahab. Tell um dis: ‘Tie da horse to yoa war wagon! Go quick down da mountain, befo da rain hold you back!’-”

⁴⁵An mo an moa, da sky come dark wit clouds an wind. Den start fo rain hard. Ahab ride his war wagon fo reach Jezreel town.

⁴⁶Yahweh [wen] make Elijah come strong. So he pull up his robe an tie um wit his belt, den he run in front Ahab all da way to da place peopo go inside Jezreel town.