Read Hawaii Pidgin 1 Kings 2 Bible Online

1 Kings 2 - Hawaii Pidgin bible

1 Kings 2

¹Wen almos time fo David mahke, he tell his boy Solomon wat fo do. He tell:

²“You know, erybody inside dis world, gotta mahke. An me, I goin mahke pretty soon. So you gotta be strong an show you no scared notting.

³Do wateva yoa God Yahweh tell you, you gotta do. Live da way he tell you. Wateva job God give you, you betta do um. He da Judge, so wen he say someting, do um. Eryting God teach, dat Moses wen write inside da Rules, do um. Den, no matta wat you do, an wea you go, eryting goin come out good fo you.

⁴Wen you do all dat, den Yahweh goin make happen, wat he tell bout me befo time, ‘Da king guys dat come born from yoa blood bumbye, dey gotta watch how dey ack. Cuz I goin see how dey live. If dey do eryting wit all dea heart, an wit eryting dey get inside, I know I can trus dem. Den me, Yahweh, I no goin wipe out yoa blood line eva. Erytime goin get one guy dat come from yoa blood line, dat goin be da King fo sit on top da throne fo da Israel peopo.’ Dass wat Yahweh wen tell bout me.

⁵“One mo ting. You know wat Joab, my sista Zeruiah boy, wen do to me. He wen go kill da two guys dat was da generals fo da Israel army, Abner Ner boy an Amasa Jether boy. Joab do dat afta pau all da fight. An he ack jalike still get war. So now, jalike get blood all ova his army clothes an stuff an all ova his shoes.

⁶You know wat fo do erytime, so go do wateva you gotta do. But no matta Joab come ol an get white hair, wen he mahke, no let him mahke an go down to da Mahke Peopo Place easy kine, jalike he neva do notting bad!

⁷“Stick wit da Barzillai guys from Gilead side. Make dem some a da guys dat you take care an eat wit you at yoa table. Cuz you know, dey da guys dat wen stick wit me an bring me food, da time I wen run away from yoa brudda Absalom.

⁸“An no foget, you get wit you dis guy Shimei, Gera boy, from da Benjamin ohana Bahurim side. Da bugga wen put kahuna on top me fo hurt me plenny, da time I go Mahanaim. Lata, Shimei wen come down to da Jordan Riva fo talk to me, an I wen make one strong promise to him. I wen aks Yahweh fo help me. I tell um, ‘I no goin kill you wit my sword.’

⁹But now, no need ack like da guy neva do notting bad. You one guy dat know wat fo do erytime, so you know wat fo do bout Shimei. He stay ol an get white hair, but make um bleed befo you send him down to da Mahke Peopo Place!”

¹⁰Den David mahke an go wit his ancesta guys. Da peopo bury him inside Jerusalem, dat get da name “David [Big] Town.”

¹¹All da time dat David was da King fo da Israel peopo, was forty year. Firs part, he live Hebron town seven year, an den Jerusalem town, 33 year.

¹²Den King Solomon take ova from his fadda David, an sit on top da same throne. An erybody know, dat Solomon da King fo real kine.

¹³Lata, Solomon's half brudda Adonijah go by Solomon mudda Batsheba (Adonijah mudda, Haggit). Batsheba aks Adonijah, “You come hea fo make trouble, o eryting okay?!” Adonijah tell, “Eryting okay.”

¹⁴Den Adonijah tell Batsheba, “I like tell you someting.” She tell, “Kay, you can.”

¹⁵Adonijah tell: “You know, was me suppose to come da King. All da Israel peopo wen tink me da one fo be dea leada. But da whole ting wen turn aroun, an now my brudda come da King, cuz Yahweh wen give him da right, not me.

¹⁶An now, I like aks you fo do one ting for me. No tell me no.” Batsheba tell um, “Tell me.”

¹⁷So Adonijah tell, “Go talk to King Solomon, cuz he no goin tell you no. Aks him fo give me Abishag da Shunam wahine fo come my wife.”

¹⁸Batsheba tell him, “Kay den, I go talk to da King fo you.”

¹⁹So Batsheba go by King Solomon, fo talk to him fo Adonijah. Wen she come inside, da King stand up fo tell her aloha, den he go down in front her. He sit down on top his throne, an he tell his helpa guys fo bring one nodda throne cuz she da King Mudda. She sit down dea, da right side by King Solomon, fo show erybody she importan.

²⁰She tell, “I get one small ting I like aks you fo do. Can do um fo me, o wat?” Da king tell, “Eh, you my mudda. Aks me, cuz I no goin tell you no.”

²¹Batsheba tell, “Go let yoa brudda Adonijah marry Abishag da Shunam wahine.”

²²King Solomon tell his mudda, “Wot! How come you aks me fo let Abishag da Shunam wahine marry Adonijah?! Jalike you stay aks me fo make him da King! Cuz he my older brudda. O same ting jalike you aks me fo make Abiatar da main pries, an Joab Zeruiah boy da main army guy!”

²³Den King Solomon wen make one strong promise to Yahweh. He tell, “If I no go do wat I say now, I like God kill me, o do mo worse tings! Dis Adonijah guy goin mahke, cuz he tell you fo come tell me dat!

²⁴I stay shua dat Yahweh stay alive, an dat he da one make me strong, an make me sit down on top da same throne jalike my fadda David. An I stay shua dat he wen make me one promise dat da Kings fo da Israel peopo goin come from my blood. An cuz I stay shua bout all dat, I know, Adonijah goin mahke, today!”

²⁵So King Solomon send Benaiah, Jehoiada boy, fo kill Adonijah, an Adonijah wen mahke.

²⁶Da King tell Abiatar da pries guy, “Go back Anatot side, wea you get land. You suppose to mahke. But I no goin kill you today, cuz you wen help carry da Box Fo Rememba Da Deal Wit My Boss Yahweh in front David my fadda, an cuz you wen suffa all da time my fadda wen suffa.”

²⁷Den Solomon throw out Abiatar, an no let um be one pries fo Yahweh. All dis wen happen jalike wat Yahweh wen tell befo time bout da pries guys from da Eli ohana, Shiloh side.

²⁸Joab wen hear wat wen happen. (Befo time, Joab wen push Adonijah fo come King, but he neva push Absalom.) Joab run to da Tent Fo Rememba Da Deal Wit Yahweh, an he grab da tings jalike horns dat stick out from da four corner a da altar.

²⁹Somebody tell King Solomon, “Joab wen run to da Tent Fo Rememba Da Deal Wit Yahweh. Now he stay by da altar so nobody can go kill him!” Den Solomon tell Benaiah, Jehoiada boy, fo go ova dea. Solomon tell um, “Go. Wipe out Joab.”

³⁰So Benaiah go da Tent Fo Yahweh, an he tell Joab, “Da King say, come outside.” But Joab tell, “No. I go mahke right hea.” Benaiah go back by da King an tell um wat Joab wen tell him.

³¹Da King tell Benaiah, “Go kill Joab, jalike he tell, an bury him, so dat nobody goin blame me an my fadda peopo. Cuz Joab wen make plenny peopo bleed an mahke, fo no reason.

³²Cuz Joab wen make peopo bleed an mahke, now Yahweh pay back Joab. Joab wen go attack an kill two guys, an my fadda neva know wat Joab do till afta. One guy Abner, Ner's boy, da general fo da Israel army, an da odda, Amasa, Jeter boy, da general fo da Judah army. Dey mo betta guys den Joab, an dey stay do da right ting mo den Joab.

³³Dese two guys mahke, an Joab get da blame fo dat, an erybody dat come from him, get da blame too. But fo David an da peopo dat come from him, an his ohana, an fo da kings dat goin come from David, Yahweh goin make eryting come good fo dem, foeva.”

³⁴So Benaiah, Jehoiada boy, go up dea an attack Joab an kill um. Da peopo bury Joab by his own house, nea da boonies.

³⁵Den da King wen make Benaiah, Jehoiada boy, da general in charge a da army afta Joab. Da king make Zadok da main pries afta Abiatar too.

³⁶Den da King send one guy fo tell Shimei fo come by him. Da King tell Shimei, “Go build one house fo yoaself ova hea inside Jerusalem. But you no go outside Jerusalem fo go anodda place.

³⁷Dis da deal: If you go out, an go cross da Kidron Stream, you know fo shua dat da same day, you goin mahke, an ony you goin get da blame fo dat.”

³⁸Shimei tell da King, “I goin live jalike how you say. You da King, an you my boss, an I yoa worka guy, an dass wat I goin do.” Shimei wen stay inside Jerusalem town long time.

³⁹But afta three year, two guys dat was slaves fo Shimei wen run away. Dey go Gat side, by King Akish, Ma`akah boy. Somebody tell Shimei, “Yoa slave guys, dey stay Gat side.”

⁴⁰So Shimei put saddle on top his donkey an get ready fo go. He go Gat side by King Akish, fo look fo his slaves. Den he bring um back from Gat.

⁴¹Somebody tell King Solomon dat Shimei wen go outside Jerusalem to Gat, an now he come back.

⁴²Da King send somebody fo tell Shimei fo come by him. King Solomon tell Shimei, “Wass up?! I wen make you, make one strong promise in front Yahweh, an I wen tell you, ‘Fo shua, I goin do wat I tell you. If you go outside Jerusalem town, no matta wat place you go, da same day, you goin mahke.’ “An you wen tell me, ‘I goin live jalike how you say. I do um.’

⁴³You wen make one strong promise to Yahweh. How come you no do wat you wen promise, aah? I wen tell you wat you gotta do. How come you neva do um, aah?”

⁴⁴Da King tell Shimei dis too: “Inside yoa heart, you know all da bad kine stuff you wen do to King David my fadda. Now, Yahweh stay bring all dat bad stuff back to you.

⁴⁵But Yahweh goin do good tings fo me, King Solomon. Fo shua, kings from David blood goin sit on top King David throne in front Yahweh, foeva.”

⁴⁶Den da King tell Benaiah, Jehoiada boy, go hit Shimei an kill um. Dass how everybody come shua dat Solomon, he stay da King fo real kine.