Read Hawaii Pidgin 1 Kings 20 Bible Online

1 Kings 20 - Hawaii Pidgin bible

1 Kings 20

¹Den Ben-Hadad, da king fo da Aram peopo, tell all his army guys fo come togedda. He get 32 odda king guys with dea armies, wit dea horse an war wagon. Dey go Samaria town an put army guys all aroun da town, so nobody can go inside da town o get outa da town. Den dey attack.

²Ben-Hadad send messenja guys inside da town fo go by King Ahab, da Israel king. Dey tell um, “Lissen up. Dis wat Ben-Hadad tell:

³‘Yoa silva an yoa gold, dey mines now. An yoa bestes wifes an kids, dey mines now.’-”

⁴Da king fo da Israel peopo answa him, “Jalike you tell, you da king, an you da boss fo me. Dis jalike I yoa slave guy, an eryting I get, yoas.”

⁵Da messenja guys come again by Ahab. Dey tell um, “Lissen up. Dis wat Ben-Hadad tell: ‘I wen send my guys awready fo tell you give me all yoa silva an gold, an yoa wifes an yoa kids.

⁶Dis da deal. Same time tomorrow, I goin send my palace guys by you. Dey goin check out eryting inside yoa palace, an eryting inside yoa palace guys houses too. Dey goin take eryting dat cost plenny an stay real nice, an take um away.’-”

⁷Den da Israel king call all da older leadas from da land an he tell, “You guys, wat you tink bout dis?! Dis guy looking fo make trouble, an how he do bad kine tings to us! Wen he send messenjas fo tell me gotta give him my wifes an kids an silva an gold, I neva tell him no.”

⁸Den all da older leadas an all da peopo tell da king, “No lissen him! No tell um you goin make how he like!”

⁹King Ahab tell da messenja guys from Ben-Hadad, “Go back tell my boss King Ben-Hadad, ‘Eryting yoa messenja guys wen tell me da firs time dat I gotta do cuz you da boss, I goin do um. But dis ting you tell me today, I no can do dat!’-” So da messenja guys go back tell Ben-Hadad dis.

¹⁰Den Ben-Hadad send back da messenja guys fo tell Ahab, “I make dis promise: I goin bus up da Samaria town! No goin get nuff dirt ova dea fo all my army guys pick up even one hand full. If I no bus up Samaria town, den I like da gods bus me up even mo den dat!”

¹¹Den da Israel king tell da messenja guys, “Tell yoa king dis: ‘No talk big now! Wait till afta you pau fight, not befo!’-”

¹²Wen Ben-Hadad hear dis, him an da odda king guys stay drinking inside dea tents. Right den an dea he tell his officer guys, “Make ready fo attack!” So dey make ready fo attack Samaria town.

¹³Dat same time, one talka fo God go by King Ahab an tell um, “Lissen up. Dis wat Yahweh tell: ‘You see all da plenny army guys outside dea? Dis wat I goin do. I goin give you da powa fo win ova dem today. Den you goin know fo shua, dat I Yahweh!’-”

¹⁴Ahab aks um, “Who you goin use fo do dis?” Da talka fo God tell, “Lissen up. Dis wat Yahweh tell: ‘Da young guys dat work unda da officer guys from da odda districks, goin do um.’-” Da king tell, “Who goin tell um wen fo attack?” Da talka fo God tell, “You.”

¹⁵Firs ting, Ahab tell da 232 young guys dat work unda da officer guys from da odda districks fo make ready fo fight. Den he tell da 7,000 odda Israel army guys fo make ready too.

¹⁶Noon time, da Israel army guys go outside da town. Same time, Ben-Hadad stay inside one tent drinking an getting pilute wit da odda 32 king guys dat stay help him.

¹⁷Da young guys dat work unda da officer guys from da districks go out firs. Ben-Hadad get guys he wen send fo watch da town, an dey tell um, “Get guys coming outside from Samaria town!”

¹⁸Ben-Hadad tell, “If dey stay come fo make deal fo no fight, grab um an no kill um. If dey stay come fo make war, grab um an no kill um too.”

¹⁹Da young guys dat work unda da officer guys from da districks stay come outside da town, wit da army behind dem.

²⁰Ery one a da Israel guys pick one Aram guy in front him an kill him. Den da odda Aram guys run away, an da Israel guys chase um. Da Aram king, Ben-Hadad, he run away on top his horse, an some a da horse rida guys do da same ting.

²¹Da Israel king an his army guys keep going an wack up da Aram horses an war wagons, an kill plenny Aram guys.

²²Lata, da guy dat talk fo God go by da Israel king an tell um dis: “You gotta make yoa army strong, an make plan watevas you goin do. Cuz nex year same time, da Aram king goin come back an attack you one mo time!”

²³Da govmen guys dat work fo da Aram king tell um, “You know, da gods dat da Israel guys pray to, dey hill kine gods. Az why dey mo strong den us. But nex time, we goin fight um wea da groun stay flat. Den fo shua we goin be mo strong den dem.

²⁴Dis wat you gotta do: No let da odda king guys stay in charge a dea own army guys! Mo betta put real kine officers ova dea army guys!

²⁵Dis yoa job, you gotta put togedda one nodda army jalike da one you wen lose. Go get da same numba horse an da same numba war wagon jalike befo time. Den we goin fight da Israel guys on da flat groun. Den fo shua, we goin be mo strong den dem!” Da king lissen to dem an do how dey tell.

²⁶So da nex year, same time, Ben-Hadad put togedda da Aram army. Dey go Afek town fo fight da Israel guys.

²⁷Da Israel guys, dey come togedda too, an get ready nuff food fo da fight. Den dey go Afek side fo fight da Aram army guys. On one side, da Israel guys make camp two place, but dey no mo plenny guys. Dey look jalike two small bunch goats ova dea. Da odda side, da Aram guys make camp all ova da land, an dey get plenny guys.

²⁸Da guy dat know God fo real kine come by da Israel king again. He tell um, “Lissen up. Dis wat Yahweh tell: ‘Da Aram peopo tink dat me, Yahweh, I ony one hill kine god, an dat I no stay da god fo da valleys too. Cuz dey tink lidat, I goin make you win ova all dat big army ova dea. Den all you guys goin know fo shua, dat I Yahweh!’-”

²⁹Da two armies stay camp in front each odda, seven days. Den, da numba seven day, dey start fo fight. Da Israel guys wen wipe out hundred tousan a da Aram infantry guys, ony one day.

³⁰Da guys dat no get wipe out, run away Afek town. But ova dea, da town wall fall down on top 27,000 a dem. An Ben-Hadad, he run away to one place inside da town dat get strong wall, an he hide inside one room inside one house.

³¹Da guys dat work fo da king tell um, “You know wat? Us guys hear, can trus da Israel kings fo do good kine stuff fo peopo. So, good us guys put burmbag kine clotheses aroun da waist, an ropes aroun oua head. Den we go da Israel king. Maybe he let you live.”

³²Den Ben-Hadad guys put burmbag kine cloth aroun dea waist an ropes on top dea head. Dey go by da Israel king an tell, “Ben-Hadad tell, now you da boss. He tell, ‘Let me live!’-” Den da Israel king tell, “So! He neva mahke! He my brudda!”

³³Ben-Hadad guys figga, az good how da king talk. So dey make like him, an dey tell, “Fo shua, he yoa brudda, Ben-Hadad!” Da Israel king tell, “Go bring um hea.” Wen Ben-Hadad come outside, Ahab tell Ben-Hadad fo come up inside his war wagon.

³⁴Ben-Hadad tell Ahab, “Da towns my fadda guy wen take away from yoa fadda, I give um back to you. You can put yoa open market places inside Damascus town, jalike my fadda wen put inside Samaria town.” An Ahab tell, “If you make one deal wit me fo do dat, I let you go.” So Ahab make da deal wit Ben-Hadad, den he let um go.

³⁵One a da guys dat hang out wit da talkas fo God tell anodda talka, “God wen give me one spesho message fo you. You gotta wack me.” Da odda guy tell um, “No way! I no goin wack you!”

³⁶Da talka fo God tell, “Cuz you no wack me like how Yahweh tell, wen you go way from hea, one lion goin kill you.” An afta da guy go way litto bit, one lion find da guy an kill um.

³⁷Den da talka fo God find one nodda guy an tell um, “Wack me.” Da guy wack um an da blood come out.

³⁸Den da talka fo God go stand by da road wait fo da king. He put bandage ova his eye, so nobody know who him.

³⁹Wen da king come by dea, da talka fo God yell to him. He tell, “Eh boss! I wen go inside da middo wea dey stay fight. One guy come by me wit one Aram prisna. He tell, ‘Watch dis guy real good! If he run away, you goin pay wit yoa life, o you pay fine 75 pound silva!’

⁴⁰But lata, wen I stay doing some odda stuff, da Aram guy wen bag!” Da Israel king tell um, “You, da one dat tell how I gotta punish you!”

⁴¹Right den an dea, da talka fo God hemo da bandage from his eye. Da Israel king know who him den. He one a da talkas for God.

⁴²He tell King Ahab, “Lissen up. Dis wat Yahweh tell: ‘You let one prisna guy go, no matta I Yahweh say you gotta wipe him out! So den, you goin pay wit yoa life cuz you wen let da Aram king go! An you goin lose yoa own peopo, cuz you let him go back to his peopo!”

⁴³Den da Israel king come real mad an his face hang. He go home Samaria side.