Read Hawaii Pidgin 1 Kings 6 Bible Online

1 Kings 6 - Hawaii Pidgin bible

1 Kings 6

¹Den, 480 year afta da Israel peopo leave da Egypt land, an [da] year numba 4 dat Solomon stay king fo da Israel peopo, in April, Solomon an his worka guys start fo build da Temple Fo Yahweh.

²Da Temple dat Solomon [dem] build fo Yahweh, 90 feet long, 30 feet wide, an 45 feet high.

³Da hallway to da door wea da pries guys go inside da Temple, go across an cova da front a da building, 30 feet wide, an stick out 15 feet from da building wall.

⁴Solomon make small kine square light openings [in / aroun da top a] da wall fo da Temple building.

⁶(5-6) Outside da Temple wall, da two side an da back, he make storage rooms. But he no like puka da Temple wall fo put inside da beams fo da rooms, so he make one small wall agains da Temple wall an da wall fo da Mos Spesho Place, fo carry da beams. Da wall fo carry da beams, stay mo thick fo da bottom rooms, so da rooms aroun da bottom ony 7 feet 6 inch from da door to da wall. Da secon floor rooms, 9 feet from da lanai to da wall, an da top rooms, 10 feet 6 inch from da lanai to da wall.

⁷Fo build da Temple, da workas stack big stone block dat da odda worka guys wen cut [awready] fo dem, so [no mo noise / notting you can hear] inside da Temple from hammer, axe o any odda kine iron tool [wen dey working].

⁸Fo go inside da storage rooms, get one door on da sout side a da Temple, den you go up one winding stair dat go aroun to da secon floor, den to da top floor.

⁹Dass how da worka guys fo King Solomon wen pau build da Temple. Dey put cedar wood beams an board fo build da roof.

¹⁰Da small wall fo carry da beams fo da storage rooms, dey wen build um agains da Temple wall, wit ery floor 7 feet 6 inch high, an da cedar wood beams fo da rooms go flush to da Temple wall.

¹¹Had one time, King Solomon wen get one message from Yahweh. An dis da message:

¹²“I like tell you someting bout dis Temple you building: If you stay live da way I tell you fo live, an do eryting da right way, an stay live da way I say you gotta live, den fo you, I goin make happen da ting I wen make promise to yoa fadda David fo do.

¹³Dat mean, I goin make house right in da middo a da Israel peopo. Garans I no goin bag from da Israel peopo.”

¹⁴Afta Solomon pau build da Temple, he make nice da inside.

¹⁵He cova da inside walls wit cedar wood board, dat go from da floor to da ceiling. Same ting fo da floor, he cova dat wit pine wood board.

¹⁶Da back 30 feet, he make one room fo be da Real, Real Spesho Place Fo God. He cova da inside walls dea too wit cedar wood board, dat go from da floor to da ceiling.

¹⁷Da odda 60 feet, outside da Real, Real Spesho Place Fo God, was da main temple room.

¹⁸Had cedar wood all ova inside da Temple building, wit pichas cut on top da wood, gourds an open up flowas, so no can see da stone wall.

¹⁹Solomon make ready da Real, Real Spesho room inside da Temple, fo put da Box Fo Rememba Da Deal Wit Yahweh dea.

²⁰Da inside room was 30 feet long, 30 feet wide, an 30 feet high. Solomon put gold all ova da wood inside da room, an same ting fo da altar outside da room made wit cedar wood.

²¹Solomon put gold all ova da inside a da Temple, da part in front da Real, Real Spesho inside room. He put gold chains in front a da Real, Real Spesho room, dat get gold all ova da inside.

²²Dass how Solomon wen make eryting perfeck -- he put gold all ova da whole building, even da small altar in front da Real, Real Spesho room.

²³Fo da Real, Real Spesho room inside da Temple, Solomon wen make two statues outa olive wood, fo look like da awesome angel watcha guys.

²⁴Da two statues, 15 feet high. Dea wings was 7 feet 6 inch, both side, an dey stick out strait, so come 15 feet wide wit da wings.

²⁵Da two statues da same size, an look da same.

²⁶Da two statues, 15 feet high.

²⁷Solomon put da awesome angel watcha guy statues nex to each odda, inside da Real, Real Spesho room. Dea wings stick out strait to da side, so dey touch da wall wit one wing, an dey touch each odda wit da odda wing.

²⁸Solomon put gold all ova da awesome angel watcha guy statues.

²⁹All da walls inside da Temple, da Real, Real Spesho room an da main room, dey carve da wood fo make pichas -- dey make awesome angel watcha guys, palm trees, an open flowas.

³⁰Inside da temple, da Real, Real Spesho room an da main room, Solomon tell his guys put gold ova da floor too.

³¹Fo go inside da Real, Real Spesho room, Solomon tell his guys [put / hang] two olive wood doors. Da two side poses, get five sides.

³²All ova da olive wood doors dey carve pichas -- awesome angel watcha guys, palm trees, an open flowas. Den he tell his guys pound gold fo go ova all da pichas, [even] da angels an da palm trees.

³³An fo da big door fo go inside da Temple, he make olive wood poses wit four sides.

³⁴Da two double doors, he make dem from pine wood. Da double doors get hinge in da middo so can fold um.

³⁵His guys carve pichas -- awesome angel watcha guys, palm trees, an open flowas. Dey put gold all ova da doors, even da carve part dey put thin sheet gold too.

³⁶He make one wall fo make da yard outside da Temple building. His guys make da wall lidis, afta three course cut stone, get one course cedar beam.

³⁷Da time King Solomon wen start fo put da foundation fo da Temple Fo Yahweh, was April, year numba 4 he was king.

³⁸Seven year lata, Octoba, year numba 11 he was king, dey pau build da Temple. Eryting stay jalike Solomon wen plan um.