Read Hawaii Pidgin 1 Kings 8 Bible Online

1 Kings 8 - Hawaii Pidgin bible

1 Kings 8

¹Den King Solomon tell da older leada guys fo da Israel peopo, an da main guys fo da twelve big ohanas, all da ohana leadas fo da Israel peopo, fo come togedda by him, Jerusalem town. All dese guys come by Solomon fo help bring da Box Fo Rememba Da Deal Wit Yahweh, from da part dey call King David Town, dass Zion, fo put um inside da Temple.

²Dat time, all da Israel peopo wen stay togedda by King Solomon, cuz dat was da spesho religious time wen erybody live one week inside shacks, da las week in Septemba.

³Wen all da leada guys fo da Israel peopo wen come David Town, da pries guys go pick up da Box.

⁴Den da Levi ohana guys an da prieses bring up da Box Fo Rememba Da Deal Wit Yahweh, an da Tent Fo Come Togedda Wit God, an all da pots an tings spesho fo God fo use inside da Tent.

⁵King Solomon an all da odda Israel peopo dat wen come by him, dey all go wit him in front da Box. Da pries guys stay carry da Box, an da peopo make real plenny sacrifice. No even count how plenny sheeps an goats an cows dey wen kill in front da Box!

⁶Den da pries guys bring da Box Fo Rememba Da Deal Wit Yahweh inside da place Solomon wen build fo um. Dey put um inside da mos inside room, way inside da Temple. Dey set um up inside da Place Dat Stay Real, Real Spesho Fo God, undaneat da wings a da awesome angel watcha guy statues.

⁷Da angel kine statues get wings dat go ova da place fo da Box, so jalike da awesome angel watcha guys make one cova ova da Box an da poles dey use fo carry um.

⁸Da pole, real long, an if you stand inside da main room fo da Temple, right in front da Place Dat Stay Spesho Fo God, you can see da ends a da pole from dea. But if you outside da Temple, you no can see da poles. An da poles stay dea still yet today.

⁹Inside da box, ony had da two flat stone dat Moses wen put inside dea wen da Israel peopo stay Mount Sinai afta dey come outa da Egypt land, wen Yahweh make da deal wit da Israel peopo.

¹⁰Den, wen da pries guys come outa da Place Dat Stay Spesho Fo God, da cloud from God fill up da whole Temple Fo Yahweh.

¹¹Da pries guys no can do dea pries kine work notting, cuz dey no can stand in front da cloud dat fill up da Temple Fo Yahweh, dat show how awesome Yahweh stay.

¹²Den Solomon tell: “Eh Yahweh! You wen tell us awready, Dat you stay live inside real dark place.

¹³But now, I wen build Dis awesome Temple fo you, You can live inside dea, foeva!”

¹⁴Wen all da Israel peopo stay standing dea togedda in front him, King Solomon turn aroun to dem. Den he aks God fo do good kine tings fo all da Israel peopo.

¹⁵He tell da peopo: “You know Yahweh, da God fo us Israel peopo! We like tell, he do good tings fo us! God wen make one promise wit his own mout to my fadda David befo time. An now, God use his powa fo do da ting he wen promise fo do.

¹⁶God wen tell my fadda David dis: ‘From befo time, wen I bring my Israel peopo outa Egypt to dis land, I neva pick one town from da Israel ohana lands fo make my temple. But now, I wen pick dis place fo my temple, so erybody goin know wat kine God me an wea I stay. An I wen pick you, David, fo stay in charge a my peopo, da Israel peopo.’

¹⁷“From befo time, my fadda David wen like build one temple fo Yahweh, so erybody know wat kine God him, da God fo da Israel peopo.

¹⁸Yahweh tell my fadda David, ‘Az real good, wat you wen do, wen you wen tink fo build one temple so erybody know who me!

¹⁹But, you know what? You not da one goin build da Temple. Yoa boy, yoa own blood an bone, goin build da temple fo show how I stay.’

²⁰“An now, Yahweh do wat he wen make promise fo do. Now az my kuleana fo be da king afta my fadda David. I stay sit on top da throne fo da Israel peopo, jalike Yahweh wen promise. An I wen build dis Temple, so erybody know wat kine God Yahweh, da God fo da Israel peopo.

²¹Inside dea, I wen make one spesho place fo put Da Box Fo Rememba Da Deal Wit Yahweh, da same deal Yahweh wen make wit oua ancesta guys, da time he bring um outa da Egypt land.”

²²Den Solomon stand right in front da altar wea dey make sacrifice fo Yahweh. All da Israel peopo dat wen come ova dea stand da odda side. Solomon put up his hands to da sky fo pray.

²³He tell God dis: “Eh Yahweh! You da God fo us Israel peopo! No mo odda God dat stay like you. Not inside da sky up dea, Not on top da eart down hea. You do jalike you wen make deal wit oua peopo fo do. You stay tight wit us guys dat stay work fo you, An dat stay live in front you wit good heart.

²⁴You do jalike you make promise fo do, Fo yoa worka guy, my fadda David. You wen tell David dat wit yoa own mout, An cuz you strong, you do um all awready. Dass how stay today.

²⁵An cuz you Yahweh, da God fo da Israel peopo, An cuz you wen make dat kine promise, I like you fo do bumbye Jalike you wen make promise fo do to my fadda David. You wen tell David, ‘I like yoa kids take care how dey live in front me Da same way you, David, wen live in front me. If dey do all dat, den no goin pau Da kings dat going come from yoa blood, Dat goin get da right fo sit in front me On top da throne fo da Israel peopo.’

²⁶So, you da God fo da Israel peopo, An I like fo da ting you wen say you goin do Come fo real. Dass wat you make promise fo do To my fadda David, Dat wen work plenny fo you.

²⁷“But you know wat, God? How you goin make house Hea on top da eart, aah?! No can! You, mo big den da mos high part a da sky! Fo shua, no way you can live down hea Inside dis temple dat I wen build!

²⁸I yoa worka guy. Yahweh, lissen to dis prayer I stay make to you. Yahweh, you da God fo me. I call to you fo help me. Lissen how I stay pray in front you today!

²⁹I like fo you stay watch dis Temple Day time an nite time. Dis da place, you wen tell, ‘Dass wea peopo goin know Wat kine God me.’ So I like fo you hear wen I pray to you, Looking at dis Temple.

³⁰I yoa worka guy, An I beg you fo lissen, Me an all yoa Israel peopo stay pray togedda An facing dis Temple. From da sky, Lissen to us, An hemo oua shame fo da bad tings us guys wen do!

³¹“Bumbye, jalike wen somebody do Someting bad to some odda guy. An da judge goin tell, Dat da firs guy gotta come In front yoa altar, hea inside dis Temple, An swear to you, God, fo make proof Dat he neva do notting wrong.

³²Den I like you lissen from da sky An judge wat da guy dat swear to you, God, tell, An wat da odda guy tell. Fo da one dat wen do someting bad, Make da bad ting he wen do Come back an hurt him. An fo da one dat do da right ting, Show um dat he get um right wit you, Cuz he do wass right.

³³“An bumbye, yoa Israel peopo Goin go do bad kine stuff An go agains you. Cuz a dat, da peopo dat stay agains dem Goin fight um an win. But wen yoa peopo turn aroun Come back to you, An tell dat dey yoa peopo fo real kine, An dey come dis Temple fo pray to you An beg you fo help dem,

³⁴Den I like you lissen from da sky, An let go yoa Israel peopo Fo da bad tings dey wen do, An hemo dea shame! Bring um back one mo time To da lan you wen give to dea ancesta guys.

³⁵“Bumbye, wen yoa peopo do bad kine stuff An go agains you, You goin shut da sky An no let rain come down. But wen dey tink bout dis place An look dis way an pray, An tell dat dey yoa peopo fo real kine, Den dey goin turn aroun An pau do bad kine stuff Cuz you punish um awready.

³⁶Den I like you lissen from da sky, An let go yoa Israel peopo Fo da bad tings dey wen do, An hemo dea shame! Teach dem da right way fo live, An let da rain come down on top da land, Dat you wen give yoa peopo fo be dea land.

³⁷“Bumbye, no goin get food inside da land, O get real bad kine sick, O da plants come sick, O da mold make da food pilau, O da grasshoppa an da caterpilla Eat up all da food Befo da peopo can cut um, O da peopo dat stay agains yoa peopo Send dea army guys agains yoa towns, O get odda kine sick.

³⁸But anybody dat pray to you, O beg you fo help dem From all da Israel peopo in da land, An all da ones dat stay pray Know dey stay sore inside, An dey put up dea hands An look dis way wea dis Temple stay,

³⁹Den I like you lissen from da sky wea you stay, An let um go fo da bad tings dey wen do, An hemo dea shame, An help um! Ony you know how ery one a dem stay inside, So help ery one a dem, da way dey need help.!

⁴⁰So do wateva you gotta do, Fo make dem feel jalike dey scared Weneva dey come in front you. Do dis fo dem, An fo all da ones dat goin come from dem. Do um fo all da time dey goin stay inside dis land Dat you wen give to oua ancesta guys!

⁴¹“An bumbye, goin get peopo from odda places, Dat not Israel kine peopo. Dey goin come from odda lands far from hea, Cuz dey like know wat kine God you.

⁴²Cuz dey goin hear bout da big name you get, An how strong you stay, An da awesome kine tings you do. So, wen peopo from odda place Come fo look dis Temple an pray dea,

⁴³Den lissen from inside da sky wea you stay, An go do someting fo da guys from odda place Dat aks you fo help um. Wen you do dat, All da diffren peopos all ova da world Goin know wat kine God you. Den dey goin feel jalike dey scared Wen dey come in front you, Same ting jalike yoa own Israel peopo feel. An dey goin know Dat dis Temple I wen build, Get yoa name.

⁴⁴“Bumbye, yoa peopo goin go odda place Cuz dey gotta go fight wit da peopo dat stay agains dem. You goin send um wea dey gotta go fo fight, An dey goin do um jalike you tell. Den dey goin face dis town Jerusalem you wen pick An da Temple I wen build Fo show wat kine God you. From dea, dey goin pray to you, Yahweh,

⁴⁵Den I like you lissen from da sky Wen dey pray an beg you fo help dem, An I like you make shua dey doing da right ting, An help dem fo do um.

⁴⁶“Bumbye, dis peopo Goin go do bad kine stuff An go agains you. Cuz no mo nobody Dat no do bad kine stuff! Den you goin come huhu wit dem, An let da peopo dat stay agains dem Take da peopo An make dem prisnas An take um away to dea land, O maybe nea yoa land, o maybe far way.

⁴⁷But den, yoa peopo goin turn aroun An start fo tink strait, Ova dea inside da land Wea dey stay prisnas. Dey goin change dea mind An beg you fo give um chance, Ova dea inside da land Fo da peopo dat make um prisnas. Dey goin tell you, ‘Us guys wen do bad kine tings An do wrong. We get da blame fo da bad tings we do!’

⁴⁸Ova dea inside dat land Wea da peopo dat make dem prisnas Stay agains my peopo, If my peopo change how dey tink an how dey feel inside, An dey pray to you from ova dea, Facing dis land Dat you wen give to dea ancesta guys, An dis big town you wen pick, An dis Temple dat I wen build Fo show wat kine God you,

⁴⁹Den lissen to dem From inside da sky, wea you live. Lissen how dey pray to you, An da tings dey beg you fo do, An do da right ting fo dem.

⁵⁰Let go all yoa peopo Dat wen do bad kine stuff agains you, An dat wen go agains you. Da peopo dat wen make yoa peopo prisnas, Make dem show pity, An give yoa peopo chance.

⁵¹Cuz dis peopo, Dey da ones you wen take Fo be yoa own peopo foeva. You wen take um outa Egypt, Da time dey feel Jalike dey stay inside one hot place, Nuff hot fo melt da iron ova dea.

⁵²“So den, no foget us guys! Me, I jalike yoa slave guy, An dis Israel peopo, dey yoa peopo too, An me an all yoa peopo stay beg you Fo lissen, Erytime dey call you fo help dem.

⁵³Cuz you da one wen pick dem Fo make um be yoa own peopo, Diffren den all da odda peopos All ova da world. Dass wat you wen tell yoa worka guy Moses fo tell dem, Da time you wen get oua ancesta guys outa Egypt An bring um ova hea. You Yahweh, da Boss!”

⁵⁴Dass how Solomon pray to Yahweh, on his knees, an putting up his hands to da sky an aks um fo help, an looking at da altar fo make sacrifice to Yahweh.

⁵⁵Afta he pau pray, he stand up an bless all da Israel peopo dat come togedda dea. He talk real loud, lidis:

⁵⁶“Az good us guys tell, Yahweh do good tings fo us. All us Israel guys, we his peopo, An us can res now, Jalike he wen make promise befo time. Yahweh wen make dat good promise To his worka guy Moses, An Moses wen tell us we can res too. An eryting Yahweh say he goin do, He do um. Not even one word come poho.

⁵⁷We like oua God Yahweh Stay wit us guys, Jalike he wen stay befo time Wit oua ancesta guys. We no like he no do notting fo us O leave us.

⁵⁸Mo betta God change how we tink, So us can go all out fo do how he like, An live da way he tell us erytime, An do da tings he say we gotta do, An keep his rules, An do wat he tell cuz he da judge, Jalike he wen tell oua ancesta guys fo do.

⁵⁹I wen beg Yahweh Fo give us guys chance. Now, I like fo oua God Yahweh, Rememba da tings I wen pray, Day time an nite time. Erytime get problem, I like Yahweh do wass right Fo me his worka guy, An fo all his peopo, da Israel peopo, Wateva dey need, ery day.

⁶⁰Cuz a dat, all da diffren peopos all ova da world Goin know dat Yahweh, he da God dass fo real, An no mo no odda God jalike him.

⁶¹An you guys, I like you go all out Fo do eryting fo oua God Yahweh. Live da way he tell you fo live, Do eryting he tell you, you gotta do, Jalike you stay doing today.”

⁶²Den da King an all da Israel peopo togedda, wen make plenny sacrifice in front Yahweh.

⁶³Fo show dat eryting stay okay wit him an Yahweh, Solomon an da pries guys wen kill 22,000 cows an 120,000 sheeps an goats, fo make da sacrifice. An dass how da King an all da Israel peopo wen start fo use da Temple Fo Yahweh.

⁶⁴Dat same day, da King wen make da middo part a da yard in front da Temple Fo Yahweh, spesho fo God. Az wea he make da burn up kine sacrifices, an da wheat flour kine sacrifices, an he burn da fat pieces from da sacrifices fo show dat eryting stay okay wit him an Yahweh. He do all dat outside in da yard, cuz da big bronze metal altar dat sit in front da Temple Fo Yahweh, too small fo do dat. Da alta no can hold all da burn up kine sacrifice, an da wheat flour kine sacrifice, an da fat pieces from da sacrifices dat he make fo show dat eryting stay okay wit him an Yahweh.

⁶⁵Dass how, dat time, Solomon wen make da spesho religious time. All da Israel peopo wen come dea togedda fo be wit Solomon, from Lebo-Hamat nort side to da Egypt Border Stream. Dey stay togedda in front oua God Yahweh, seven days, den anodda seven mo days, az fourteen days in all.

⁶⁶Da day afta dey pau, Solomon tell da peopo go home. Dey tell da king “We like God do good tings fo you!” Den dey go home dea own place. Dey stay feel real good inside, an dey dance an sing, cuz a all da good tings dat Yahweh wen do fo his worka guy King David, an fo his peopo, da Israel peopo.