Read Hawaii Pidgin 2 Kings 1 Bible Online

2 Kings 1 - Hawaii Pidgin bible

2 Kings 1

¹Afta King Ahab mahke, da Moab peopo make war fo throw out da Israel peopo an dea govmen dat stay ova dem.

²Dat time, King Ahaziah stay inside his upstairs room inside da Samaria palace, an he fall down an broke da criss-cross kine sticks ova da window. Dat make um fall down thru da window an hit da groun. He feel real sore. He tell some messenja guys fo go Ekron side an find out from Ba`al-Zebub, da god fo da Ekron peopo, if he goin feel good again, o he goin mahke cuz a da hurt.

³But one angel from Yahweh tell Elijah from Tishbe town, “Go up meet da messenja guys from da Samaria king, an aks dem, ‘Wot?! No mo God inside Israel, o wat?! Az why you gotta go Ekron side fo aks dea god Ba`al-Zebub wat goin happen?!’

⁴Cuz you do dis, dis wat Yahweh tell: ‘King Ahaziah, you no goin stan up again from da pune`e wea you stay lay down. Fo shua, you goin mahke!’-” Elijah go an tell da messenja guys dis.

⁵Wen da messenja guys come back by da king, he aks dem, “How come you guys come back awready?!”

⁶Dey tell him, “One guy come meet us, an he tell us fo go back by you dat wen send us guys, an tell you, ‘Dis wat Yahweh tell: Wot?! No mo God inside Israel, o wat? Az why you guys gotta go Ekron side fo aks dea god Ba`al-Zebub wat goin happen?! Az why you no goin stan up again from da pune`e wea you stay lay down. Fo shua you goin mahke!’-”

⁷Da king aks dem, “Wat kine guy wen come meet you guys an tell you dat?”

⁸Dey tell, “One guy wit plenny hair, wit one leadda belt aroun his middo.” Da king tell, “Az Elijah from Tishbe!”

⁹Den he send one captain wit fifty guys by Elijah. Elijah, he stay sitting da top a one hill. Da captain go up by Elijah, an tell, “Da king tell, ‘You one guy dat stay tight wit God. But dat no matta, da king tell you gotta come down hea!’-”

¹⁰Elijah tell da captain, “If fo real I one guy dat stay tight wit God, I like fire come down from da sky, an burn up you an yoa fifty guys!” Right den an dea, da fire come down from da sky, an burn um all up.

¹¹Den da king send anodda captain an his fifty guys by Elijah. Da captain tell Elijah, “Da king tell, ‘You one guy dat stay tight wit God. But dat no matta, da king tell you gotta come down hea now!’-”

¹²Elijah tell, “If fo real I one guy dat stay tight wit God, I like fire come down from da sky, an burn up you an yoa fifty guys!” Right den an dea, da fire from God come down from da sky an burn up dat captain an his fifty guys too.

¹³Den da king send da captain numba three an his fifty guys. Dis captain go all da way up by Elijah, an go down on top his knees. He beg Elijah fo no hurt him. He tell, “You da guy dat stay tight wit God! Give us chance, me an dese fifty guys hea! Let us live!

¹⁴Look! Da fire wen come down from da sky an burn up da firs two captains an all dea guys. So make jalike my life stay worth someting to you, an no make us mahke!”

¹⁵Den da angel from Yahweh tell Elijah, “No scared dis guy. Go down dea wit him.” So Elijah stand up an go down wit da captain, by da king.

¹⁶Wen Elijah see da king, he tell um, “Dis wat Yahweh tell: You tink no mo God inside Israel fo aks him wat fo do, so you send guys Ekron side fo aks dea god Ba`al-Zebub wat fo do? Cuz you wen make lidat, you no goin get off da pune'e you stay laying on top. Fo shua you goin mahke!”

¹⁷So King Ahaziah mahke, jalike Yahweh wen tell Elijah. An cuz Ahaziah no mo boy, his brudda Joram come da nex Israel king. Dass wat happen, da numba two year wen Jehoram, Jehoshafat boy, stay king Judah side.

¹⁸Had odda stuff wen happen wen Ahaziah stay king. All dat stay inside da Record Book Fo Da Kings Fo Israel.