Read Hawaii Pidgin 2 Kings 13 Bible Online

2 Kings 13 - Hawaii Pidgin bible

2 Kings 13

¹Da numba 23 year wen Joash, Ahaziah's boy, stay da Judah king, Jehoahaz, Jehu's boy, come da Israel king inside Samaria town. Jehoahaz stay king fo seventeen year.

²Jehoahaz do bad kine stuff, da way Yahweh see um. He stay do da same bad kine stuff dat Jeroboam, Nebat's boy, wen do. He make da Israel peopo do um too, an he no stop do da bad kine stuff.

³Az why Yahweh come real huhu wit da Israel peopo. Fo long time he give Hazael, da Aram king, an his boy Ben-Hadad powa ova dem.

⁴But den, Jehoahaz try make tings come litto bit mo betta wit Yahweh. Yahweh wen lissen Jehoahaz, cuz he see how plenny presha da Aram king put on top da Israel peopo.

⁵Den Yahweh give da Israel peopo one guy fo get um outa trouble, so da Aram guys no mo powa ova dem. Cuz a dat, all da Israel peopo can go live inside dea own place, jalike befo time.

⁶Still yet, dey no turn away from doing all da bad kine stuff dat Jeroboam an his ohana wen do befo time, an he make da Israel peopo do too. Dey stay go down in front da gold kine idol gods. An da kine pos da peopo put up Samaria town, fo pray to da wahine god Asherah, still stay dea.

⁷Dat time, ony get litto bit army guys stay fo Jehoahaz. Ony get fifty horses an riders, ten war wagons, an ten tousan army guys. Cuz da Aram king wen wipe out all da oddas, an make um jalike da dirt dat fall down wen peopo hemo da junks from da wheat.

⁸All da odda kine stuff dat Jehoahaz wen do wen he stay king, bout how strong him an wat he make, all dat stay inside da Record Book Fo Da Kings Fo Israel.

⁹Jehoahaz mahke, an da peopo bury um wit his ancesta guys inside Samaria town. Jehoash, his boy, come king afta him.

¹⁰Wen Joash stay da Judah king thirty-seven year, Jehoash, Jehoahaz boy, come da Israel king inside Samaria town. He stay king fo sixteen year.

¹¹Jehoash do bad kine stuff, da way Yahweh see um. He no turn away from all da bad kine stuff dat Jeroboam, Nebat's boy, wen do. Jeroboam make da Israel peopo do dat kine bad kine stuff, an Jehoash stay do um too.

¹²All da odda stuff dat Jehoash wen do, an his war agains Amaziah, da Judah king, all dat stay inside da Record Book Fo Da Kings Fo Israel.

¹³Wen Jehoash mahke, da peopo bury um wit his ancesta guys, inside Samaria town wit all da odda Israel kings. Jeroboam Numba Two come da nex king inside Samaria.

¹⁴One time befo Jehoash mahke, Elisha come sick. Dis, da same sick goin make him mahke bumbye. Jehoash, da Israel king, go down see him, an cry ova him. He yell, “My fadda! My fadda! Fo us Israel peopo, you jalike oua war wagons an horse rida guys!”

¹⁵Elisha tell um, “Go get one bow an some arrows.” An Jehoash go get um.

¹⁶Elisha tell da king, “Take da bow inside yoa hand.” Wen Jehoash do dis, Elisha put his hands on top da king hands.

¹⁷Elisha tell Jehoash, “Open da east side window.” An he open um. Elisha tell, “Shoot!” An he shoot. Elisha tell, “Az Yahweh's arrow fo show da winna, fo show you goin be da winna ova da Aram guys! You goin wipe dem out all da way, ova dea Afek town.”

¹⁸Den Elisha tell, “Go take da arrows.” An da king take um. Elisha tell him, “Hit da groun wit um.” Da king hit da groun three time, an den stop.

¹⁹Elisha, da guy dat stay tight wit God, come huhu wit da king, an tell, “How come you neva hit um five o six time, aah?! If you wen do dat, fo shua you goin win ova Aram all da way. But now, you ony goin win ova dem three time.”

²⁰Lata, Elisha mahke, an dey bury him. Ery spring year dat time, da steala gang guys from Moab stay come inside da Israel land.

²¹One time wen some Israel guys stay burying one guy dat wen mahke, right den an dea dey see some a da steala gang guys, so dey throw da guy's body inside Elisha's tomb an go. Wen da body touch Elisha's bones, da guy come back alive one mo time, an he stand up on his feets.

²²All da time Jehoahaz stay king, Hazael da Aram king put presha on top da Israel peopo.

²³But Yahweh get good heart fo da Israel peopo, an pity dem, an give dem chance, cuz a da deal he wen make wit Abraham, Isaac, an Jacob. Even till now Yahweh no like wipe um out o chase um away from wea he stay.

²⁴Was aroun dat time, Hazael da Aram king mahke, an his boy Ben-Hadad come da nex king.

²⁵Den Jehoash, Jehoahaz boy, take back from Ben-Hadad, Hazael's boy, all da towns dat Hazael wen take ova from Jehoash fadda Jehoahaz befo time. Jehoash wen win ova him three time, an so he get back da Israel towns.