Read Hawaii Pidgin 2 Kings 14 Bible Online

2 Kings 14 - Hawaii Pidgin bible

2 Kings 14

¹Wen Jehoash, Jehoahaz boy, stay Israel king fo two year, Amaziah, Joash boy, come da Judah king.

²Amaziah, he twenny-five year ol wen he come king. He stay king inside Jerusalem twenny-nine year. His mudda name Jehoaddin, an she come from Jerusalem.

³Amaziah do wat stay right da way Yahweh see um, but he no do jalike his ancesta David wen do. He stick wit da way his fadda Joash do bout eryting.

⁴But da sacrifice places fo da idol kine gods still stay on top da hills. Da peopo stay make sacrifice an burn incense ova dea.

⁵Afta Amaziah make shua nobody can take ova him fo be king, he kill da palace guys dat wen kill his fadda da king.

⁶But he no kill da boys a da guys dat wen kill his fadda, jalike da Book wit da Rules dat Moses wen write tell: Yahweh wen make dis rule: “No kill da faddas cuz a wat dea boys do, an no kill da boys cuz a wat dea faddas do. Anybody do bad kine stuff, dey da ony one gotta mahke.”

⁷Amaziah, he da one wen win ova ten tousan Edom guys inside da Salt Valley. An he take ova dea big town Sela dat time. He call da place Jokteel, an dis da name stay lidat today.

⁸Lata, Amaziah send messenja guys by da Israel king Jehoash, Jehoahaz boy an Jehu grankid. He give um dis message, “Come meet me face to face, so we can fight an see who win!”

⁹But Jehoash, da Israel king, tell da messenja guys fo go back tell dis story to Amaziah, da Judah king: “You, you jalike one small thorn bush on top da Lebanon mountains, dat send one message to one big Lebanon cedar tree, ‘Give yoa girl to my boy fo marry!’ Right den an dea, one wild animal from da Lebanon mountains come by dea, an smash down da thorn bush.

¹⁰Fo shua, you wen win ova da Edom guys, an now you get smart wit me! Let yoa peopo respeck you cuz you win, but no come hea ack big! No good you make lidat an lose da war, cuz den you goin mahke, you an da Judah peopo too!”

¹¹But Amaziah no like lissen. So Jehoash, da Israel king, attack. Him an Amaziah, da Judah king, meet each odda Bet Shemesh side inside Judah, an dea army guys fight.

¹²Da Israel guys bus up da Judah guys, an all da Judah guys run away go home.

¹³Jehoash, da Israel king, catch Amaziah, da Judah king, Joash boy an Ahaziah's grankid, Bet Shemesh side. Den Jehoash go Jerusalem broke down da town wall from da Ephraim Gate to da Corner Gate, one part bout six hundred feet long.

¹⁴Jehoash take all da gold an silva, an all da cups an bowls an tings dat he find inside da Temple Fo Yahweh, an inside da king's palace he take all da gold an silva too. An he even take away importan peopo from Jerusalem an tell he goin kill um if da Judah peopo make war one mo time. Den he go back Samaria side.

¹⁵All da odda stuff dat Jehoash wen do, da awesome way he fight, an his war agains Amaziah da Judah king, all dat stay inside da Record Book Fo Da Kings Fo Israel.

¹⁶Jehoash mahke, an da peopo bury him by his ancesta guys inside Samaria, wit da Israel kings. An his boy, dat dey call Jeroboam Numba Two, come king afta him.

¹⁷Da Judah king Amaziah, Joash boy, stay alive fifteen mo year afta Jehoash mahke.

¹⁸An all da odda stuff dat Amaziah wen do, all dat stay inside da Record Book Fo Da Kings Fo Judah.

¹⁹Amaziah run away Lakish town, cuz some guys make plan fo kill um inside Jerusalem town. But dey send guys afta him Lakish side, an kill um ova dea.

²⁰Dey bring his mahke body back on top one horse, an dey bury him inside Jerusalem wit his ancesta guys, inside David's big town.

²¹Den all da Judah peopo take Amaziah boy Azariah, who was sixteen year ol, an dey make him da nex king afta him.

²²Azariah, he da one dat wen build Elat town again, an take um back fo Judah afta Amaziah mahke.

²³Wen Amaziah, Joash boy, stay king inside Judah fo fifteen year, Jeroboam Numba Two, Jehoash boy, come da Israel king inside Samaria town. An he stay king fo forty-one year.

²⁴Jeroboam Numba Two do bad kine stuff da way Yahweh see um, an no turn away notting from da bad kine tings dat Jeroboam Numba One, Nebat's boy, wen do. Jeroboam Numba One, he da one wen start fo make da Israel peopo do all kine bad stuff.

²⁵Jeroboam Numba Two, he da one dat take back da Israel land all da way from Lebo-Hamat nort side to da Arabah Lake dat dey call da Big Salt Lake, sout side, jalike was befo time. Dat happen jalike wat Jonah wen tell. He Amittai's boy from Gat-Hefer, dat wen talk fo Yahweh, da God fo da Israel peopo, befo time. Jonah wen work fo God, an he tell dat Israel goin get back dea land.

²⁶Yahweh wen see how erybody inside Israel stay suffa plenny, no matta dey slave guys o not slave guys. No mo nobody dea fo help dem.

²⁷Yahweh wen tell awready dat he no goin wipe out da Israel peopo so nobody unda da sky goin even rememba who dem. Cuz a dat, he give Jeroboam Numba Two, Jehoash boy, da powa fo get dem outa trouble.

²⁸All da odda stuff dat Jeroboam Numba Two wen do, da awesome way he fight, how he give back Damascus town an Hamat town fo da Judah part a da Israel land, dat was Judah land befo time, all dat stay inside da Record Book Fo Da Kings Fo Israel.

²⁹Jeroboam Numba Two mahke, an dey bury him wit his ancesta guys, da Israel kings. An Zekariah his boy come da nex king afta him.