Read Hawaii Pidgin 2 Kings 15 Bible Online

2 Kings 15 - Hawaii Pidgin bible

2 Kings 15

¹Wen Jeroboam Numba Two stay Israel king fo twenny-seven year, Amaziah's boy Azariah, (dat lata take da name Uzziah), come Judah king.

²He sixteen year ol wen he come king, an he stay da king inside Jerusalem fo fifty-two year. His mudda Jecoliah, she from Jerusalem.

³Uzziah do wass right, da way Yahweh see him, jalike his fadda Amaziah wen do.

⁴But da sacrifice places on top da hills still stay dea. Da peopo still stay make sacrifice an burn incense fo odda gods ova dea.

⁵Yahweh make King Uzziah get one kine sick all ova da skin dat odda guys can catch, till he mahke. Cuz a dat, he live inside one house wea nobody can come. Jotam, da king's boy, stay take charge da palace, an was da leada fo da peopo inside da land.

⁶Had odda stuff happen wen Uzziah stay king. All da tings he wen do, stay inside da Record Book Fo Da Kings Fo Judah.

⁷Uzziah (dass Azariah) wen mahke, an dey bury him by his ancesta guys, inside King David's big town. An Jotam, his boy, come da nex king.

⁸Wen Azariah (dass Uzziah) stay Judah king fo thirty-eight year, Zekariah, Jeroboam Numba Two boy, come Israel king. He stay king fo six month inside Samaria town.

⁹Da way Yahweh see Zekariah, he do bad kine stuff jalike his ancesta guys wen do. He no turn away from da bad kine stuff dat Jeroboam Numba One, Nebat's boy, do, wen he wen make da Israel peopo do bad kine stuff.

¹⁰Had one guy Shallum, Jabesh boy, make plan wit some odda guys fo kill Zekariah. Shallum attack Zekariah in front da peopo an kill um. So Shallum come da nex king afta Zekariah.

¹¹Da odda stuff dat Zekariah wen do, stay inside da Record Book Fo Da Kings Fo Israel.

¹²Dis all happen da way Yahweh wen tell Jehu goin happen: “You, yoa boy, yoa grankid, and yoa great grankid, goin sit on top da Israel throne, ony four a dem, den yoa line goin pau.”

¹³Shallum, Jabesh boy, come Israel king wen Uzziah was da Judah king fo thirty-nine year. An Shallum stay da Israel king inside Samaria town fo ony one month.

¹⁴Den Menahem, Gadi's boy, go up from Tirzah to Samaria. He attack Shallum, Jabesh boy, inside Samaria, an kill him. An Menahem come nex king afta him.

¹⁵Da odda stuff dat Shallum wen do, an da plan he make fo kill King Zekariah, all dat stay inside da Record Book Fo Da Kings Fo Judah.

¹⁶Dat time, Menahem start from Tirzah town, an attack Tifsah town, an erybody dat live aroun dea, cuz dey no like open dea gates fo him. He bus up Tifsah an cut open all da hapai wahines dea.

¹⁷Wen Azariah stay Judah king fo thirty-nine year, Menahem, Gadi's boy, come da Israel king. He stay Israel king inside Samaria town fo ten year.

¹⁸He do bad kine stuff, da way Yahweh see um. All da time he stay king, he no turn away from da bad kine stuff dat Jeroboam Numba One, Nebat's boy, wen do, wen he make da Israel peopo do bad kine stuff.

¹⁹Den Tiglat-Pileser, da Assyria king, go attack da peopo inside da Israel land, an Menahem wen give Tiglat-Pileser thirty-seven ton silva fo make Tiglat-Pileser come his side. Cuz a dat, Menahem come mo strong fo stay king.

²⁰Menahem wen make da rich kine Israel peopo give him dea silva. Ery rich guy gotta pay 20 ounce silva fo give um to da Assyria king. So da Assyria king go back home, an no stay inside da land no moa.

²¹All da odda stuff dat Menahem wen do, stay inside da Record Book Fo Da Kings Fo Israel.

²²Menahem mahke an dey bury um wit his ancesta guys. An Pekahiah his boy come da nex king.

²³Wen Azariah stay da Judah king fo fifty year, Pekahiah, Menahem boy, come da Israel king inside Samaria town, an he stay king fo two year.

²⁴Da way Yahweh see him, Pekahiah do bad kine stuff. He no turn away from da bad kine stuff dat Jeroboam Numba One, Nebat's boy, wen do, an dat he make da Israel peopo do too.

²⁵Pekah, Remaliah's boy, he one a da main leada guys fo Pekahiah army. He make plan fo kill Pekahiah. Pekah take fifty guys from Gilead wit him fo go inside da strong wall part a da king's palace inside Samaria town. He kill Pekahiah, Argob, an Aryeh. Dass how Pekah kill Pekahiah, an come da nex king afta him.

²⁶All da odda stuff dat Pekahiah wen do, stay inside da Record Book Fo Da Kings Fo Israel.

²⁷Wen Azariah (dass Uzziah) stay Judah king fo fifty-two years, Pekah, Remaliah's boy, come da Israel king inside Samaria town. He stay king fo twenny year.

²⁸Da way Yahweh see Pekah, he do bad kine stuff too. He no turn away from da bad kine stuff dat Jeroboam Numba One, Nebat's boy, wen do, wen he make da Israel peopo do bad kine stuff.

²⁹Wen Pekah stay king Israel side, da Assyria king Tiglat-Pileser come back attack again. He take ova five town: Ijon, Abel Bet-Ma`akah, Janoah, Kedesh, an Hazor. He take da Gilead an Galilee lands too, an all da Naftali land, an make da peopo dea give up dea land an go Assyria side.

³⁰Den Hoshea, Elah's boy, make plan fo kill Pekah, Remaliah's boy. Hoshea guys attack Pekah an kill um, an den Hoshea come da nex Israel king. Dat happen wen Jotam, Uzziah's boy, stay da Judah king fo twenny year.

³¹All da odda stuff dat Pekah wen do, stay inside da Record Book Fo Da Kings Fo Israel.

³²Befo, wen Pekah, Remaliah's boy, stay da king inside Israel fo two year, Jotam, Uzziah da Judah king boy, come king.

³³Jotam was twenny-five year ol wen he come king, an he stay king inside Jerusalem fo sixteen year. His mudda, her name Jerusha, Zadok's girl.

³⁴Da way Yahweh see um, Jotam do wat stay right, jalike eryting his fadda Uzziah wen do.

³⁵But still get one ting da peopo neva do. Da sacrifice places fo da odda gods still stay on top da hills, an da peopo stay make sacrifice an burn incense fo da idol kine gods ova dea. Jotam build da Mauka Gate fo da Temple Fo Yahweh again.

³⁶All da odda stuff dat Jotam wen do, stay inside da Record Book Fo Da Kings Fo Judah.

³⁷(Dass da same time Yahweh start fo send Rezin, da Aram king, an Pekah, Remaliah's boy, fo attack Judah.)

³⁸Wen Jotam mahke, dey bury him wit his ancesta guys inside his ancesta David's big town. An his boy Ahaz come da nex king afta him.