Read Hawaii Pidgin 2 Kings 16 Bible Online

2 Kings 16 - Hawaii Pidgin bible

2 Kings 16

¹Wen Pekah, Remaliah's boy, stay Israel king fo seventeen year, Ahaz, Jotam's boy, come da Judah king.

²Ahaz was twenny year ol wen he come king, an he stay king inside Jerusalem town fo sixteen year. But da way his God Yahweh see him, he no do da right ting erytime. He no do like his ancesta guy David, cuz David wen do da right ting.

³He make jalike da Israel kings. He even burn up his own boy fo make one sacrifice fo da god Molok, jalike da pilau kine stuff da odda peopos stay do, da ones dat Yahweh wen throw outa da land in front da Israel peopo wen dey come dea from Egypt.

⁴Plenny time, Ahaz go by da local sacrifice places an make sacrifice an burn incense dea fo da idol kine gods. Get plenny sacrifice place on top da hills an unda ery big shade tree.

⁵Den Rezin da Aram king an Pekah, Remaliah's boy, da Israel king, go up fo make war. Dey put army guys all aroun Jerusalem town, so Ahaz peopo no can go outside da town. But da two kings no can make da Ahaz guys come outside an fight dem.

⁶(Da same time, Rezin da Aram king throw out da Judah guys from Eilat town and take um back fo Aram. Den get Edom peopo move house to Eilat, an dey stay ova dea till today.)

⁷Den King Ahaz send messenja guys fo go by da Assyria king Tiglat-Pileser, fo tell, “You, jalike my boss an my fadda, an I stay tight wit you. Come help get me outa trouble from da Aram king an da Israel king, cuz dey stay ready fo attack me.”

⁸King Ahaz take da silva an gold tings dat get inside da Temple Fo Yahweh, an inside his palace too, an send um to da Assyria king so dey no attack him.

⁹Da Assyria king tell Ahaz, “Shua!” Den he go attack Damascus town an take um ova. He kill King Rezin an make all da peopo move house Kir side cuz dey his prisonas.

¹⁰Den King Ahaz go Damascus fo meet Tiglat-Pileser da Assyria king. He see one altar dat get ova dea, an send Uriah da pries guy one picha a da altar, an eryting bout how Uriah can make um.

¹¹So Uriah da pries guy build da altar. He make um jalike eryting King Ahaz tell um from Damascus. He pau build um befo King Ahaz come back from ova dea.

¹²Wen da king come back from Damascus side, he see da altar, an go by um, an go up da steps.

¹³He make burn up kine sacrifice, an wheat kine sacrifice. He pour out his drink sacrifice, an sprinkle blood on top da altar from da sacrifices he make fo show dat eryting stay okay wit him an God.

¹⁴Den he move da ol bronze altar dat wen stay in front Yahweh, wit da new altar one side an da Temple da odda side. He put da ol altar da north side a da new altar.

¹⁵Den King Ahaz tell Uriah da pries guy: “On top da big new altar, make burn up kine sacrifice fo morning time, an da wheat o barley sacrifice fo evening time, an da king's burn up kine sacrifice an wheat o barley sacrifice, an da burn up kine sacrifice fo all da peopo inside da land, an dea wheat o barley sacrifice, an dea drink kine sacrifice. Throw all da blood on top da altar from dose kine sacrifices. But da ol bronze altar, I gotta tink mo bout wat I goin do wit dat.”

¹⁶Uriah da pries do eryting jalike King Ahaz wen tell um fo do.

¹⁷King Ahaz take off da side panels an da watta tubs from da carts dat carry da watta fo wash da sacrifice meat. He move da big roun watta tub from da bronze bulls dat stay unda da tub, an put da big tub on top one stone base.

¹⁸He take off da shade covering fo da Res Day dat dey wen build inside da palace, an da outside door fo da king go inside da Temple Fo Yahweh, so he no lose face wit da Assyria king.

¹⁹All da odda stuff dat Ahaz wen do, stay inside da Record Book Fo Da Kings Fo Judah.

²⁰Wen Ahaz mahke, dey bury him nea his ancesta guys inside David's big town. An his boy Hezekiah come da nex king.