Read Hawaii Pidgin 2 Kings 18 Bible Online

2 Kings 18 - Hawaii Pidgin bible

2 Kings 18

¹Wen Hoshea, Elah boy, stay Israel king fo three year, Hezekiah, Ahaz boy, come Judah king.

²He twenny-five year ol wen he come king, an he stay king Jerusalem side fo twenny-nine year. His mudda name, Abijah, an she Zekariah girl.

³Hezekiah, he do wat stay right, da way Yahweh see um. Cuz he do eryting jalike his ancesta guy David wen do.

⁴Hezekiah was da one dat wen take away da sacrifice places on top da hills, smash da big kapu stones fo da odda gods, an cut down da poses fo da wahine god Asherah. He broke in small kine pieces da bronze snake dat Moses wen make, cuz till dat time da Israel peopo wen burn incense fo da bronze snake jalike az was one idol kine god. (Dey call um Nehushtan.)

⁵Yahweh, da God fo da Israel peopo, he da One Hezekiah wen trus. From all da odda Judah kings, befo him o afta him, no mo nobody jalike him.

⁶He stay tight wit Yahweh, an no go follow odda kine stuff. He do eryting jalike Yahweh wen tell Moses dat da peopo gotta do.

⁷Cuz a dat, Yahweh stay tight wit him erytime. Eryting Hezekiah do, God make um come good fo him. Wen da Assyria king try fo take ova da country, Hezekiah no let um. He neva let da Assyria king be da boss ova him.

⁸He bus up da Filisha guys too, all da way to Gaza an da land aroun dea, dea towns wit strong walls an small towns wit only watch towa too.

⁹Wen Hezekiah stay king four year, an Hoshea, Elah boy, stay da Israel king fo seven year, Shalmaneser, da Assyria king, bring his army guys up fo attack Samaria town. He put his army guys all aroun da town so nobody can go inside o come outside.

¹⁰Afta three year, da Assyria army guys take ova Samaria. Az was wen Hezekiah stay Judah king fo six year, an Hoshea stay Israel king fo nine year.

¹¹Da Assyria king wen take out da North Israel peopo an move um Assyria side, an make dem live inside Halah, inside Gozan on da Habor River, an inside da towns wea da Mede peopo live.

¹²All dat happen cuz dey no lissen dea God Yahweh. Dey broke da deal wit him, an no do eryting dat Moses, da guy dat work fo Yahweh, tell um dey gotta do. Dey no lissen wat Yahweh tell, an dey no do um.

¹³Wen Hezekiah stay king fo fourteen year, da Assyria king Sennakerib wen go attack all da big towns wea da Judah peopo make strong wall, an take ova dem.

¹⁴So wen da Assyria king stay Lakish side, da Judah king Hezekiah send um dis letta: “Da time I wen go agains you, az was wrong. So go way from me now, an I goin pay you wateva you tell I gotta pay.” Den da Assyria king make da Judah king Hezekiah pay um mo den eleven ton silva, an bout one ton gold.

¹⁵So Hezekiah give him all da silva dat dey find inside da Temple Fo Yahweh, an inside da rooms inside da king's palace wea dey keep da expensive kine stuffs.

¹⁶Dat time, da Judah king Hezekiah wen pull off all da gold he wen use fo cova da doors an da poses fo da doors inside da Temple Fo Yahweh, an give um to da Assyria king.

¹⁷Den da Assyria king send one a da main general guys, da govmen guy dat stay ova da territorial govna guys, an da territorial govna guy, wit one big army. Dey go from Lakish an go by King Hezekiah inside Jerusalem. Wen dey come Jerusalem town, dey stop by da watta ditch dat take da watta to da Mauka Watta Place, by da road fo da field wea dey put da clotheses inside da watta an step um fo make um come clean.

¹⁸Da Assyria guys call fo King Hezekiah come ova by dem. Eliakim, Hilkiah boy, da guy in charge a da palace kine business, go out fo meet dem. Shebba da secretary, an Joah, Asaf boy, da guy dat write da records, go wit him too.

¹⁹Da territorial govna guy tell Hezekiah guys, “Go tell Hezekiah dis:

²⁰You say you get plan an one strong army fo fight one war, but you ony mout. Who you stay trus now, fo fight agains me?!

²¹Wise up! You stay trus da Egypt king, but no can trus him. Da Egypt guys, jalike one small splinter from one bamboo dat get smash, dat poke yoa hand an make you sore if you lean on top um! Az how plenny Pharaoh, da Egypt king, goin help all you guys dat trus him!

²²‘An if you guys tell me, “We trus oua God Yahweh,” how come Hezekiah wen take away his sacrifice places on top da hills, an his altars?! Cuz Hezekiah stay tell da Judah an Jerusalem peopo, “Dis da ony altar inside Jerusalem, wea you guys can pray!”

²³‘Come now! Bet wit me! I bet you, you no can find nuff guys fo ride 2,000 horse. Cuz if you can chance um, den my boss, da Assyria king, goin give you da 2,000 horse!

²⁴An if you no can do dat, how you tink you goin stand up in front even one small kine officer an his army guys from my boss?! Fo shua, you no can! So, how come you trus da Egypt guys fo send war wagons an horse rida guys?! You all jam up!

²⁵An one mo ting: You tink Yahweh neva tell me fo go afta dis place, an wipe um out?! Was Yahweh da one wen tell me fo march agains dis land, an wipe um out.’-”

²⁶Den Eliakim, Hilkiah boy, an Shebna an Joah tell da territorial govna guy, “We know you da boss, but try talk yoa Aramaic language to us guys, cuz us guys undastand um. No talk oua Hebrew language to us Judea guys, wea da peopo on top da wall can hear um.”

²⁷But da territorial govna guy tell um, “Wen my boss send me ova hea fo tell dis stuff, you guys tink az ony fo yoa boss guys, an fo you guys?! You tink no was fo da guys dat stay sit ova dea on top da wall too?! Bumbye, goin come mo bad, dat dey goin eat dea own kukae an drink dea own shishi, an you guys goin do da same ting too!”

²⁸Den da territorial govna guy stand up an make mo big, an wit da Hebrew language yell: “Lissen wat da Big King, da King fo Assyria, tell!

²⁹Dis wat oua king tell: No let Hezekiah bulai you guys. He no mo powa fo get you guys outa my powa.

³⁰No let Hezekiah make you guys trus Yahweh, wen he tell: ‘Yahweh goin get us outa dis fo shua. Da Assyria king no goin take ova Jerusalem town!’

³¹“No lissen Hezekiah! Cuz dis wat da Assyria king tell: Make good wit me, an come out by me. Den all you guys goin eat fruits from yoa own grape plants an fig trees, an drink from yoa own pukas fo get watta,

³²An goin stay lidis, till I come an move you guys to one diffren land dat stay jalike yoa own land, da kine land wea get wheat an new wine, bread an grape farms, wit olive trees fo make oil, an honey. So, make up yoa mind wat you like! You guys like live, o you guys like mahke? “But no lissen Hezekiah, cuz he like make you guys tink diffren kine, wen he tell, ‘Yahweh goin get us outa dis.’

³³No mo even one peopo, wea dea god get dea land outa da Assyria king's powa!

³⁴Wea was da gods fo da Hamat an Arpad peopos?! Wea was da gods fo da Sefarvaim, Hena, an Ivvah peopos? You tink da Samaria gods wen get da Samaria peopo outa my powa? No way!

³⁵From all da gods fo dose lands, no mo even one god wen get dea land outa my powa! So, how you tink Yahweh goin get Jerusalem town outa my powa?!”

³⁶But da peopo no talk notting. Dey say notting to da Assyria guy, cuz King Hezekiah wen tell dem, “No talk to him.”

³⁷Den Eliakim, Hilkiah boy, da guy in charge a da palace kine business, Shebna da secretary, an Joah, Asaf boy, da guy dat write da records, go by Hezekiah. Dey broke dea clotheses fo show dey sore inside, an tell him wat da territorial govna guy wen tell dem.