Read Hawaii Pidgin 2 Kings 20 Bible Online

2 Kings 20 - Hawaii Pidgin bible

2 Kings 20

¹Dat time, King Hezekiah come sick an almos mahke. Isaiah, Amoz boy dat talk fo God, go by him an tell, “Lissen up. Dis one spesho message from Yahweh: Go make eryting ready, cuz you goin mahke. You no goin come good.”

²Den Hezekiah turn his whole body fo face da wall. He pray to Yahweh lidis:

³“Yahweh! Try no foget, dat all da stuff I do, I no hide um from you. I try erytime fo be da kine guy you can trus, an do eryting I promise fo do. I wen try fo make shua I do ony da kine stuff dat you say, az good.” Den Hezekiah cry real hard.

⁴Befo Isaiah go outside da palace, Yahweh tell him:

⁵“Go back an tell Hezekiah, da leada guy fo my peopo, ‘Dis, anodda message from me, Yahweh, da God fo yoa ancesta guy David. Tell um, I wen hear you pray awready, an see how you stay cry. Now, I da One goin make you come good. Da day afta tomorra, you goin go up by da Temple Fo Yahweh.

⁶I goin give you fifteen mo year fo stay alive. An I goin get you an da peopo inside dis big town outa da powa a da Assyria king. Jalike I goin put one fence aroun dis big town, cuz a who me, an cuz a my worka guy David.’-”

⁷Den Isaiah tell da helpa guys, “Go get some figs, cook um an lomi um all togedda.” Dey do dat, an put um on top Hezekiah boil, an he come good.

⁸Wen da helpa guys stay cook da fig kine stuff, Hezekiah aks Isaiah, “You know wat da sign goin be, fo show me dat Yahweh goin make me come good, an dat I goin go up inside da Temple Fo Yahweh da day afta tomorra?”

⁹Isaiah tell, “Dis goin be da sign from Yahweh, fo show you dat he goin do wat he promise. Look! da shadow go down ten step on top da palace stair awready. You like fo da shadow go back up ten step now?

¹⁰Hezekiah tell, “Az easy fo da shadow go down ten step. So mo betta, make um go back up ten step!”

¹¹Den Isaiah, da talka guy fo God, aks Yahweh fo do dat, an Yahweh make da shadow go back up da ten step afta awready wen go down. Dass was da stair King Ahaz wen build.

¹²Dat time, Merodak-Beladan, Beladan's boy, da Babylon king, send Hezekiah one letta an one gif, cuz he hear dat Hezekiah wen come sick.

¹³An wen Hezekiah hear bout da Babylon messenja guys, he go show dem eryting inside da palace. He show um da expensive kine oil, da silva, da gold, da balsamic oil, da good kine olive oil, da place wea dey keep da tings dey use fo fight -- eryting Hezekiah get inside his storage places. No mo notting inside da palace o inside da whole land dat Hezekiah no show dem.

¹⁴Den Isaiah, da talka fo God, go by King Hezekiah an aks him, “Wat dose guys wen tell, an wea dey come from?” Hezekiah tell, “Dey come from far away, from Babylon.”

¹⁵Den da talka guy aks, “Wat dey wen see inside yoa palace?” Hezekiah tell, “Dey see eryting inside my palace. No mo notting from all my rich kine stuff dat I no show dem.”

¹⁶Den Isaiah tell Hezekiah, “Lissen wat Yahweh tell:

¹⁷Fo shua, one time goin come wen eryting inside yoa palace, an eryting dat yoa ancesta guys wen keep dea, till today, da Babylon guys goin rip um off an take um Babylon side. No mo notting goin stay ova hea. Az wat Yahweh tell.

¹⁸An some a da kids dat goin come from you, dat get yoa blood, dat yoa wahines goin born fo you, dey goin take dem away too. Da Babylon guys goin make so yoa boy kids no can get kids. Dey goin come worka guys fo da Babylon king, inside his palace.”

¹⁹Hezekiah tell, “Az good, dis message from Yahweh you stay tell.” Cuz he tink, “Fo shua, eryting goin stay good, an no mo notting goin change till afta I mahke.”

²⁰All da odda stuff dat Hezekiah do, an how he make da watta place an da tunnel dey use fo bring watta inside da big town, all dat stay inside da Record Book Fo Da Kings Fo Israel.

²¹Hezekiah mahke, an go by his ancesta guys. Manasseh his boy come da nex king.