Read Hawaii Pidgin 2 Kings 21 Bible Online

2 Kings 21 - Hawaii Pidgin bible

2 Kings 21

¹Manasseh stay twelve year ol wen he come king. He stay king inside Jerusalem fifty-five year. His mudda, her name Hefzibah.

²Da way Yahweh see um, Manasseh stay do bad kine stuff. He stay follow da pilau kine stuff dat da odda peopos do fo dea gods. Dose peopos, dey da ones dat befo time Yahweh wen kick um outa da land in front da Israel peopo, so da Israel peopo can take ova dat land.

³Manasseh go back to da odda gods, an build um up again, all da sacrifice places dat his fadda Hezekiah wen wipe out. An he make altars fo da god Ba`al, an make one tiki pos fo da place dey pray to da wahine god Asherah, jalike Ahab da Israel king wen do. He go down in front all da stars an da sun an da moon, cuz he make like dey gods, an pray to um.

⁴Manasseh build altars dea fo da odda gods, inside da Temple Fo Yahweh. Dis da place wea Yahweh wen tell, “Jerusalem goin be da place I set up, so peopo can know wat kine God me.”

⁵Inside da two yards aroun da Temple Fo Yahweh, he go build altars fo all da star kine gods an da sun an da moon.

⁶He kill his own boy in da fire fo make sacrifice. He make da spirits show demself, an he do secret kine stuff fo find out wass goin happen bumbye. He go by da guys dat talk to da mahke peopo, an he lissen to da fortune tella guys. He do all bad kine stuff, da way Yahweh see him. Dass how he make Yahweh come real huhu.

⁷He even take da tiki pos fo da wahine god Asherah dat he wen tell his guys fo make, an put um inside da Temple Fo Yahweh. Dass da place, Yahweh wen tell David an his boy Solomon: “Inside dis temple an inside Jerusalem town, az da place I wen pick from all da Israel ohanas. I goin make dat place, so peopo can know foeva, wat kine God me.

⁸Ony if da Israel peopo take care fo do eryting dat I tell um fo do. If dey stick wit all da rules dat my worka guy Moses wen give dem, den I no goin make dem go all ova da place again, jalike befo time I wen do. If dey stick wit da rules, I no kick um outa da land I wen give to dea ancesta guys.”

⁹But da peopo no lissen, cuz Manasseh wen make um go wrong way. Az why dey go do even mo plenny bad kine stuff den da odda peopos dat Yahweh wen wipe outl, da time da Israel peopo come dea.

¹⁰Yahweh wen tell da guys dat talk fo him an work fo him, fo tell dis:

¹¹“Manasseh, da Judah king, wen do all dis pilau kine stuff. He do mo plenny bad kine stuff den eryting da Amor peopo do, dat stay dea befo he come. An he make da Judah peopo do bad kine stuff too, cuz he tell um fo pray to idol kine gods he give um.

¹²“Az how come me, Yahweh, da God fo da Israel peopo, tell dis: I da One goin make real bad kine stuff happen to da Judah an Jerusalem peopo, so dat erybody goin bum out wen dey hear bout um.

¹³I goin make Jerusalem town, da same way I wen do fo da Samaria town wen I wipe um out. Jalike I goin use da same rope fo measure da two towns. I goin pull da same string fo find out if da Jerusalem peopo stay strait. Dis da same string I wen use da time I wen wipe out da Ahab ohana. But I goin wipe da Jerusalem peopo fo make um clean, jalike somebody wipe one dish an put um upside down fo dry um.

¹⁴I no goin take care da peopo dat suppose to stay mines, da ones dat still yet stay alive. I goin turn um ova to da peopo dat stay agains dem. All da peopo dat stay agains dem, goin steal all dea stuffs.

¹⁵I do dat, cuz my peopo stay do real bad kine stuff da way I see dem, an dey make me come real huhu, from da time dea ancesta guys wen come outa Egypt till today.”

¹⁶Dis happen, cuz Manasseh kill plenny peopo dat no do notting bad. Jalike he fill Jerusalem wit dea blood, from one side to da odda side. An one mo bad ting Manasseh do: he make da Judah peopo do plenny bad kine stuff too, da way Yahweh see um.

¹⁷All da odda stuff dat happen wen Manasseh stay kine, an all da stuff he do, an da real bad ting he do, stay inside da Record Book Fo Da Kings Fo Judah.

¹⁸Manasseh mahke, an da peopo bury him wit his ancesta guys, inside da garden fo his palace, dat dey call Uzza garden. An his boy Amon come da nex king afta him.

¹⁹Amon stay twenny-two year ol wen he come Judah king, an fo two year, he stay king inside Jerusalem. His mudda name, Meshullemet. She Haruz girl, from Jotbah.

²⁰He do bad kine stuff, da way Yahweh see him, jalike his fadda Manasseh wen do.

²¹He follow eryting his fadda wen do. He go down pray to da same idol kine gods jalike his fadda, fo show um respeck.

²²He turn away from Yahweh, da God fo his ancesta guys, an no live how Yahweh tell um fo live.

²³Da palace guys dat work fo King Amon wen make plan fo kill um. Dey kill him inside his palace.

²⁴Den all da odda kine peopo inside da land go kill erybody dat wen make plan fo kill King Amon. Dey make his boy Josiah da nex king.

²⁵All da odda stuff dat Amon wen do, stay inside da Record Book Fo Da Kings Fo Judah.

²⁶Dey put him inside his tomb inside Uzza's garden. An his boy Josiah come da nex king afta him.