Read Hawaii Pidgin 2 Kings 3 Bible Online

2 Kings 3 - Hawaii Pidgin bible

2 Kings 3

¹Joram, Ahab's boy, come king fo da Israel peopo an live Samaria town, wen Jehoshafat stay king fo da Judah peopo eighteen year. An Joram stay da king inside Israel fo twelve year.

²He do bad kine stuff, da way Yahweh see um, but not real bad den, da way his fadda an mudda wen do. He wen take away da kapu stone fo da Ba`al god dat his fadda wen put.

³But still yet, he stay stick wit da same bad kine stuff dat King Jeroboam, Nebat's boy, wen do. He make da Israel peopo do um too, an he no turn away from all dat.

⁴Befo time, Mesha, da Moab king, know how fo breed da sheeps spesho kine, fo get plenny sheep. Ery year, he gotta pay tax to da Israel king. He gotta give um one hundred tousan bebe sheep, an da wool from one hundred tousan boy kine sheep.

⁵But afta Ahab mahke, Mesha da Moab king make war agains da Israel king, fo throw out da Israel territorial govmen.

⁶So dat time, King Joram go out from Samaria town, an bring togedda all da Israel army guys fo fight agains Moab.

⁷Wen he stay going, he send messenja guys by Jehoshafat, da king fo Judah, fo tell him, “Da Moab king make war agains me, fo throw out da Israel territorial govmen. I like you go wit me fo fight da Moab guys.” Jehoshafat tell, “Shua! Me an you, stay real tight. My peopo an my horses, dey yoas.”

⁸Jehoshafat aks, “Wich way we goin go afta dem?” Joram tell, “Thru da boonies Edom side.”

⁹So da Israel king go out wit da Judah king an da Edom king. Dey march aroun da Big Salt Lake sout, den east, den nort. Afta dey stay march seven days, da army guys an da animals dey get wit dem, no mo watta fo drink.

¹⁰Da Israel king tell, “Wot! Fo shua Yahweh tell us three kings come all da way ova hea, so dat da Moab king can catch us guys!”

¹¹But Jehoshafat aks, “No mo nobody dat talk fo Yahweh ova hea, o wat? so dat us guys can aks Yahweh wat fo do!” One officer fo da Israel king tell, “Elisha, Shafat's boy, stay hea. Befo time, he hang out wit Elijah fo help him.”

¹²Jehoshafat tell, “Fo us know wat Yahweh tell, Elisha can tell us.” So da king fo Israel, an Jehoshafat, an da Edom king go talk to Elisha.

¹³Elisha tell da Israel king, “Mo betta you go by da guys dat talk fo da gods yoa fadda an mudda wen pray to! How come you tink me an you, stay da same side?!” Da Israel king tell um, “No ways! Cuz Yahweh was da one wen call us three kings togedda, an he da one goin let da Moab king catch us guys!”

¹⁴Elisha tell, “I know dis fo shua: Yahweh, he da God Ova All Da Armies. An he stay alive, an I work fo him. If I neva get respeck fo Jehoshafat, da king fo da Judah peopo, I no even goin look at you, King Joram, o see you.

¹⁵But you know what? Bring me one music guy ova hea fo make me ready fo go lissen to Yahweh.” Wen da guy stay play da music, da powa from Yahweh take ova Elisha,

¹⁶An he tell, “Dis wat Yahweh tell: ‘Goin get plenny watta all ova dis dry valley.’

¹⁷Cuz dis wat Yahweh tell: ‘You guys no goin see wind o rain, but dis dry valley goin come full wit watta. An you guys, yoa cows, an yoa odda animals goin drink from um.

¹⁸Dis, az one easy kine ting da way Yahweh see um. Den he goin give you guys da powa fo take ova da Moab peopo.

¹⁹You guys goin bus up all da bestes towns, even if get strong walls. You goin cut down all da good kine trees, make da watta no come outa all da pukas, an put stone all ova da good fields so no can grow food.”

²⁰An da nex morning, wen time fo make da morning sacrifice, get plenny watta running down from Edom side! An dass how da land get plenny watta all ova da place.

²¹All da Moab peopo know da kings stay come fo fight dem. So dey call ery guy dat can fight, da young an makule guys, an dey go wea dea land meet da Edom land, all ready fo fight dea.

²²Da nex day, wen dey get up early morning time, da sun come up shining on top da watta. Da way da Moab peopo see um from dea side, da watta look red, jalike blood.

²³Dey yell, “Az blood! Fo shua, da kings army guys awready wen fight an wipe out each odda! Come on, you Moab guys, us go rip off dea stuffs!”

²⁴But wen da Moab guys reach da Israel army camp fo go rip off dea stuffs, da Israel guys was ready an attack dem till dey run away. Den da Israel army guys go attack da Moab land, an kill da Moab guys.

²⁵Dey bus up all da towns, an ery guy throw one stone on top all da good field till get stone all ova um. Dey make da pukas fo watta so dat da watta no can come out, an cut down all da good trees. Ony Kir Hareset town stay neva get bus up. But da Israel guys put guys wit slings fo throw stone all aroun Kir Hareset, an attack dat place too.

²⁶Da Moab king see dat his army guys stay get bus up. He take seven hundred mo army guys wit swords fo try fo fight da Edom king all togedda so dey can get outa da fighting, but dis neva work.

²⁷Den da Moab king take his numba one boy dat was goin come king afta him, an kill him and burn up da body on top da town wall, fo make sacrifice to his gods. Yahweh come real huhu wit da Israel peopo cuz da Moab king gotta do dat. Da Israel peopo see dis, an figga az wase time fo fight. So dey go back dea own land.