Read Hawaii Pidgin 2 Kings 9 Bible Online

2 Kings 9 - Hawaii Pidgin bible

2 Kings 9

¹Elisha, da guy dat talk fo God, call one a da guys dat like come one talka fo God. He tell um, “Get ready fo run. Take dis small bottle olive oil wit you, an go Ramot-Gilead town.

²Wen you get dea, look fo Jehu, Jehoshafat boy an Nimshi grankid. Go by him, an take him inside one empty room inside da house, so da odda officer guys no can hear wat you tell.

³Den take da small bottle olive oil an pour um on top his head. Tell um, ‘Dis wat Yahweh tell: I pick you awready fo come king fo da Israel peopo.’ Den open da door an run! No wait!”

⁴So da young guy dat talk fo God go Ramot-Gilead town.

⁵Wen he get dea, he see da army officer guys stay all sit togedda. He tell, “Who da main officer guy hea? I get someting fo tell you.” Den Jehu aks, “Which one a us guys you like talk to?” Da talka guy tell, “Fo you, sir. You da one in charge, yeah?”

⁶Jehu get up an go inside da house. Den da guy dat talk fo God pour da olive oil on top Jehu head, an tell, “Dis wat Yahweh, da God fo da Israel peopo, tell: ‘I stay pick you fo come da king ova da peopo dat get me, Yahweh, for dea God, dass da Israel peopo.

⁷You goin wipe out da ohana dat come from yoa boss King Ahab. I goin pay um back cuz dey wen kill my helpa guys dat wen talk fo me, Yahweh, an all my odda peopo dat Queen Jezebel wen kill.

⁸All da Ahab ohana, I goin wipe um out. I goin kill ery guy inside da Ahab ohana, no matta dey slave guys o not slave guys.

⁹I goin wipe out da Ahab ohana, jalike I wen wipe out da ohana dat come from Jeroboam, Nebat's boy, an jalike da ohana dat wen come from Ba`asha, Ahijah's boy.

¹⁰An fo Queen Jezebel, da dogs goin eat her mahke body on top da land inside Jezreel town, an nobody goin bury her.” Den da talka guy open da door, an run away.

¹¹Wen Jehu go outa da room an go back by da odda army officer guys dat work fo his boss, one a dem aks, “Eryting stay okay? How come dat guy come hea talk pupule kine to you?” Jehu tell dem, “You guys know wat kine guy dat, an how he talk pupule kine.”

¹²Dey tell, “No bulai us! Tell us strait!” Jehu tell, “Dis wat he tell me: ‘Yahweh da Boss tell me: I stay pick you awready fo come da king fo da Israel peopo!’-”

¹³Right den an dea, ery one a dem take off dea robes an spread dem in front him on top da steps. Den dey blow da sheep horn trumpet an yell, “Jehu, da king!”

¹⁴So Jehu, Jehoshafat boy an Nimshi grankid, make plan wit his frenz fo attack Joram. (Dat time, King Joram an all da Israel guys stay fight so Hazael, da Aram king, no take ova Ramot-Gilead town.

¹⁵But King Joram wen go back Jezreel town fo come good, afta da Aram army guys wen hurt him plenny wen he fight wit Hazael.) Jehu tell his friends, “If az wat you guys tink, no let nobody go outside dis town, fo go tell dis stuff inside Jezreel wat we goin do.”

¹⁶Den Jehu take his war wagon an go Jezreel town, cuz az da place wea Joram stay on top his bed ova dea. Az da same time dat Ahaziah, da Judah king, wen go dea fo see Joram.

¹⁷Wen da guy dat stay on top da Jezreel tower fo watch da roads, see Jehu army guys stay coming, he yell, “Eh, get real plenny army guys I see ova dea!” Joram tell him, “Go get one horse rida guy. Send him fo meet dem, an aks, ‘You guys come fo fight us, o wat?’-”

¹⁸Da horse rida guy ride fo meet Jehu, an tell, “Dis wat da king tell, ‘You guys come fo fight us, o wat?’-” Jehu tell, “Wassup wit you bout no come hea fight, aah? Come wit me, we go fight ova dea!” Den da guy dat stay watch da roads tell, “Da messenja guy reach dem, but he no turn aroun come back.”

¹⁹So King Joram send anodda messenja guy on top one horse. Wen he come by Jehu guys, he tell dem, “Dis wat da king tell, ‘You guys come fo fight us, o wat?’-” Jehu tell, “Wassup wit you bout no fight us, aah? Come wit me, we go fight ova dea!”

²⁰Den da watcha guy tell Joram guys, “Da messenja guy reach dem, but he no turn aroun come back too. An ony get one guy dat drive war wagon any kine lidat. Dat gotta be Jehu, Nimshi grankid!”

²¹Joram tell, “Make ready my war wagon.” An wen stay ready, Joram, da Israel king, an Ahaziah, da Judah king, ride out, inside dea two war wagon fo go fo meet Jehu. Dey meet him on top da land dat Nabot, da guy from Jezreel, wen own befo Ahab take um ova.

²²Wen Joram see Jehu, he aks, “Eh Jehu, you come hea fo fight us guys, o eryting stay okay?” Jehu tell, “How can eryting stay okay, wen all da time yoa mudda Jezebel stay fool aroun wit all da odda gods an stay put kahuna on top plenny peopo?!”

²³Den Joram turn aroun his war wagon an get outa dea fas. He yell to Ahaziah, “Ahaziah, dat bugga wen set us up!”

²⁴Den Jehu take his bow an arrow an shoot Joram in da middle a his back. Da arrow go all da way inside Joram heart, an he go down inside his war wagon.

²⁵Jehu tell Bidkar, da officer dat help drive his war wagon, “Pick up his mahke body, an throw um on top da field dat Nabot, da guy from Jezreel, wen own um befo Ahab take um away. Rememba how me an you wen ride togedda inside two war wagons in back a Ahab, Joram fadda, wen Yahweh give dis word bout Ahab:

²⁶‘Befo time, I wen see you make Nabot an his boys bleed an mahke. An fo shua I goin pay you back fo wat you wen do to Nabot, on top dis same piece land. Dat word come from me, Yahweh.’ So now, go pick up Joram mahke body an throw um down on top dat land, jalike Yahweh wen tell goin happen.”

²⁷Wen Ahaziah, da Judah king, see wat wen happen, he run away up da road to Bet-Haggan. Jehu chase him, an yell, “Kill him too!” Dey shoot him inside his war wagon on da way fo go up to Gur nea Ibleam, but he ony stay hurt, an he run away Megiddo town an mahke ova dea.

²⁸His helpa guys take his mahke body inside one war wagon, to Jerusalem town. Dey bury him dea wit his ancesta guys inside dea ohana tomb inside David's big town.

²⁹(Was da year numba eleven wen Joram, Ahab's boy, stay da Israel king, dat Ahaziah wen come da Judah king.)

³⁰Den Jehu go Jezreel town. Wen Jezebel hear bout dis, she go make nice her eye wit paint, fix her hair nice, an look down from one window.

³¹Wen Jehu go inside da town gate, she aks, “You come hea fo attack us guys, o wat?! Fo shua, you come hea jalike Zimri, da guy dat wen go kill his own boss!”

³²Jehu look up da window, an tell, “Get anybody up dea on my side, o wat?!” Two o three a da palace guys look down at him.

³³Jehu tell dem, “Throw her down hea.” So dey throw her down, an some a her blood go all ova da wall an da horses. Den Jehu make da horses walk all ova her mahke body.

³⁴Jehu go inside an eat an drink, an tell, “Do wateva you gotta do fo dat wahine dat get kahuna on top her. But bury her, cuz her fadda one king.

³⁵But wen dey go outside fo bury her, dey no find notting. Ony her skull, her feets, an da inside part a her two hands.

³⁶Dey go back tell Jehu. An he tell, “Az wat Yahweh wen tell, da time Elijah da Tishbe guy talk fo him: On top da groun Jezreel side, da dogs goin eat Jezebel body.

³⁷Her mahke body goin come dog doodoo on top da groun Jezreel side, so nobody goin know az Jezebel.”