Read Hawaii Pidgin Ezra 10 Bible Online

Ezra 10 - Hawaii Pidgin bible

Ezra 10

¹All da time Ezra was praying an telling God dat wat dey wen do was not right, he stay cry an throw himsef down on top da groun in front da Temple Fo God. Uku paila Israel peopo wen come by him, guys an wahines an kids. Dey was crying plenny too.

²Den Shekanaiah Jehiel boy, dat come from da Elam ohana, tell Ezra: “Us guys like tell erybody, ‘Cuz a wat we wen do, oua God no can trus us.’ We go marry wahines from da peopos dat donno God, dat live inside dis land! But now, no matta us do dis, us Israel peopo can stay shua dat God goin make eryting come okay fo us.

³Now, dis wat we betta do: we make one strong promise fo make deal wit oua God, fo send back all oua wifes an dea kids, dat come from da odda peopos. Eh Ezra, you da boss ova hea, an dass wat you stay tell us. An all da oddas dat stay scared an shaking wen dey hear wat oua God say fo do, dey telling us same ting. So, we goin do wat you tell. We goin do like how God's Rules tell.

⁴Eh Ezra! Go make strong. You da one dat can tell us guys wat we gotta do, fo make eryting come right. We goin stick wit you!”

⁵So Ezra stand up. He make da main pries guys, an da Levi ohana guys, an all da Israel peopo make one strong promise to God, dat dey goin do jalike Shekanaiah tell. So dey all make da same strong promise to God.

⁶Den Ezra go way from da Temple Fo God. He go by Jehohanan, Eliashib boy. He sleep dea, dat nite. He no eat bread o drink watta wen he stay dea cuz he still stay sore inside, cuz he no can trus da peopo dat wen come back from Babylon.

⁷Da nex day, da leada guys send one message all ova da Judah land an Jerusalem town. Dey tell all da peopo dat come back from Babylon, fo come togedda Jerusalem town.

⁸Dey tell erybody, “Day afta tomorrow, anybody dat no show up hea, da govmen guys an da older leadas goin take away dea land an eryting dey own, an cut um off from da peopo dat come back from Babylon.”

⁹Two days afta dat, Decemba 19, all da peopo from da Judah an Benjamin land come togedda. Dey all stay sit down inside da open place in front da Temple Fo God. Dey stay shaking, cuz da ting dey goin talk bout, stay real importan, an cuz stay rain plenny same time.

¹⁰Den Ezra da pries guy stand up an tell dem, “You guys wen do bad ting, so God no can trus you. You guys go marry wahines from da odda peopos dat donno God. So now, God stay ready fo punish us Israel guys again!

¹¹So now, tell da God fo yoa ancesta guys, dat you know da tings you wen do was bad, cuz he Yahweh. Den do wateva he like you fo do. Make yoasef diffren from da odda peopos dat donno God dat stay live inside dis land, an send yoa wifes dat come from da odda peopos back.”

¹²All da peopo dat wen come togedda dea, dey talk strong, an dey tell, “Az right, wat you tell us. Us guys gotta do jalike you tell us!

¹³But auwe! Get plenny peopo hea, an stay rain plenny. Us guys no can stay stand outside hea long time. An dis not da kine ting dat need ony one o two days fo do. Cuz get plenny a us guys dat wen go agains God, an az bad.

¹⁴Let oua leada guys take care dis, fo all da peopo. Erybody dat get wife from da peopos dat donno God, dey gotta make time fo come show up in front da older leada guys an da judge guys inside ery town. Dass how we goin do um, till oua God no stay huhu wit all us guys no moa.”

¹⁵Da ony guys dat say dey no like do dat, was Jonatan Asahel boy, an Jahzeiah Tikvah boy. Two guys from da Levi ohana, Meshullam an Shabbetai, dey no like do dat too.

¹⁶So, dass how da peopo dat come back from Babylon side send back dea wifes. Ezra da pries guy, he pick leada guys dat can talk fo ery ohana, an he tell erybody da names a da guys he wen pick. Decemba 29, da leada guys wen sit down fo figga out wat fo do.

¹⁷March 27, dey all pau figga out wat dey gotta do wit da guys dat wen marry wahines from da odda peopos dat donno God.

¹⁸Dis da names a da pries ohana guys dat wen marry wahines from da peopos dat donno God. From da ohana dat start from Jeshua Jozadak boy an his bruddas: Ma`aseiah, Eliezer, Jarib, an Gedalaiah.

¹⁹Dey make strong promise fo send back dea wifes. Fo show dey like God take away da shame fo da ting dey wen do, dey wen kill one boy kine sheep fo make sacrifice fo God.

²⁰From da Immer ohana: Hanani an Zebadaiah.

²¹From da Harim ohana: Ma`aseiah, Elijah, Shemaiah, Jehiel, an Uzziah.

²²From da Pash-hur ohana: Elioenai, one nodda Ma`aseiah, Ishmael, Nethanel, Jozabad, an Elasah.

²³Had helpa guys from da Levi ohana dat wen do da same ting: Jozabad, Shimei, Kelaiah (dey call um Kelita), Petahaiah, Judah, an Eliezer.

²⁴From da music guys: Eliashib. From da guys dat watch da Temple gates: Shallum, Telem, an Uri.

²⁵Had odda Israel guys too dat wen marry wahines from da peopos dat donno God. From da Parosh ohana: Ramaiah, Izzaiah, Malkijah, Mijamin, Eleazar, da odda Malkijah, an Benaiah.

²⁶From da Elam ohana: Matanaiah, Zekaraiah, Jehiel, Abdi, Jeremot, an Elijah.

²⁷From da Zattu ohana: Elioenai, Eliashib, Matanaiah, Jeremot, Zabad, an Aziza.

²⁸From da Bebai ohana: Jehohanan, Hananaiah, Zabbai, an Atlai.

²⁹From da Bani ohana: Meshullam, Malluk, Adaiah, Jashub, Sheal, an Jeremot.

³⁰From da Pahat-Moab ohana: Adna, Kelal, Benaiah, Ma`aseiah, Matanaiah, Bezalel, Binnui, an Manasseh.

³¹From da odda Harim ohana: Eliezer, Ishijah, Malkijah, Shemaiah, Shimeon,

³²Benjamin, Malluk, an Shemaraiah.

³³From da Hashum ohana: Matenai, Matata, Zabad, Elifelet, Jeremai, Manasseh, an Shimei.

³⁴From da odda Bani ohana: Ma`adai, Amram, Uel,

³⁵Benaiah, Bedeiah, Keluhi,

³⁶Vanaiah, Meremot, Eliashib,

³⁷Matanaiah, Matenai, an Jaasu.

³⁸From da Binnui ohana: Shimei,

³⁹Shelemaiah, Nathan, Adaiah,

⁴⁰Maknadebai, Shashai, Sharai,

⁴¹Azarel, Shelemaiah, Shemaraiah,

⁴²Shallum, Amaraiah, an Joseph.

⁴³From da Nebo ohana: Jeiel, Matitaiah, Zabad, Zebina, Jadai, Joel, an Benaiah.

⁴⁴All dese guys wen go marry wahines from da odda peopos dat donno God. Dey wen send da wahines an dea kids back to dea peopo.