Read Hawaii Pidgin Ezra 4 Bible Online

Ezra 4 - Hawaii Pidgin bible

Ezra 4

¹Da odda peopo dat not Jews, dat awready stay dea, dey stay agains da Judah an Benjamin peopo. Dose guys find out, da peopo dat come back from Babylon wen start fo build one new Temple Fo Yahweh, da God fo da Israel peopo.

²Cuz a dat, da peopo dat not Jews go by Zerubbabel an da odda leada guys. Dey tell, “Let us work wit you guys fo build da Temple. Cuz us guys pray to yoa God, jalike you guys. From da time King Esarhaddon bring us ova hea from Assyria side, us guys stay make sacrifice to yoa God.”

³But Zerubbabel, Jeshua, an da odda leada guys fo da Israel peopo tell um, “Dis job fo build da temple, az fo us guys, not fo you guys. Ony us guys, da ones dat goin build da Temple Fo Yahweh, da God fo us Israel peopo. Cuz dass how King Cyrus Persia side wen tell us we gotta do.”

⁴From dat time, da odda peopos dat not Jews dat live aroun dea make da Judah peopo lose fight, an try fo make um real scared so dey no go work.

⁵Da odda peopos pay some guys fo teach dem da bestes way fo mess up da work da Judah peopo get plan fo do, an dey make um stop da work. Fo long time dey do all dis kine stuff, from da time Cyrus was da big king Persia side, till afta Darius Numba Two take ova.

⁶(Long time afta dat, same ting wen happen one mo time. Anodda king name Xerxes wen come da big king Persia side. Da peopo dat stay agains da Judah peopo write one nodda letta fo send to King Xerxes, fo poin finga da Judah an Jerusalem peopo.

⁷An lata, wen Artaxerxes come da big king fo da Persia land afta King Xerxes, da peopo dat stay agains da Judah peopo do da same ting one mo time. Dea leadas was Bishlam, Mitredat, an Tabe`el. Dey use da Aram language fo write da letta. Wen da letta get to Persia, da peopo dea wen make um in da Persia language so da big king ova dea can read um.

⁸Dea main govmen guy fo Judah, Rehum, an da secretary fo da court, Shimshai, wen write one letta fo King Artaxerxes, an tell him bout da tings dat stay happen Jerusalem side.

⁹Inside da letta, da peopo dat live aroun Jerusalem send dea aloha to da king an all his friends -- from da main govmen guy Rehum an Shimshai da court secretary, an all da judge guys, da local leada guys, da peopo from Tappel, da Persia peopo, an da peopo from Babylon town, Erech town, an Susa town (dass da main town Elam side).

¹⁰Dey send aloha from all da odda peopo dat da big an importan king Ashurbanipal wen take outa dea land befo time, an make um go live Samaria side, an all ova da Wes Eufrates Side. Dis, da letta dey wen write fo Artaxerxes:

¹¹“Aloha. Dis letta fo King Artaxerxes, from da peopo dat stay stick wit you, an dat live inside da Wes Eufrates Side.

¹²“We like you know dis: Da Jewish peopo dat wen come hea Jerusalem town from Babylon, dey stay building one big town. Dey no like do wat da king tell um, cuz dey real bad peopo. Dey awready put da foundation fo da strong walls aroun da town, an dey almos pau put up da wall.

¹³“But we like you know one nodda ting too: If dey build dis town dat was all bus up, an if dey finish da walls, no goin be good fo you. Da Jewish peopo no goin pay you da tax money, no matta you da King.

¹⁴“Us guys like stick wit you, cuz you oua King. We no like see peopo like da Jewish guys, dat no show respeck fo you. Az why we stay send dis letta, so you goin know wat dey doing.

¹⁵“Good if you look inside da court records dat yoa ancesta guys wen write. You goin find out how da peopo from dis big town wen like throw out da govmen from Babylon side befo time. Az why da Babylon kings wen send dea army guys fo wipe out da town. From long time ago, da Jerusalem peopo make trouble agains all da diffren countries dat wen take um ova, an agains dea king guys.

¹⁶We telling you now, dat if dey pau build dis town one mo time an put up strong walls all aroun, you no goin stay in charge da Wes Eufrates Side.”

¹⁷King Artaxerxes wen write dis letta back to dem: “Aloha. Dis letta fo Govna Rehum, Court Secretary Shimshai, an dea peopo dat stay live Samaria town an all ova da Wes Eufrates Side.

¹⁸“Da letta you guys wen send me, peopo hea wen make um so dey can read um to me, my language.

¹⁹I wen tell my peopo fo look inside da court records. Jalike you tell, befo time Jerusalem town was one place dat from long time make war wit plenny kings. Dey go agains da kings an talk stink bout da govmen an dey do dat all da time!

²⁰Da kings from dat side dat wen live inside Jerusalem an da whole Wes Eufrates Side, dey was strong, and dey get plenny tax money from ova dea dat side.

²¹“So, tell da Jerusalem peopo dat me, da Big King, say dat dey gotta stop working. Wen bumbye I tell um fo build, den dey can! But dass da ony way dey goin build up dat town dat stay all bus up.

²²Tell um dey gotta stop. No good us guys let um take ova an jam up eryting fo me, da King!”

²³Wen dat letta from King Artaxerxes come back to Rehum, Shimshai, an da odda guys, dey go right away to Jerusalem town, an dey make da Jewish peopo stop fo build. Dass wat wen happen all ova again, plenny years afta da Zerubbabel guys wen do dea work.

²⁴Da peopo wit Zerubbabel, dey get plenny presha from da odda peopos dat live aroun dea. Az how dey stop working fo build da Temple Fo God Jerusalem side. So notting happen ova dea from King Cyrus time, till da year numba two afta King Darius come da big king Persia side.