Read Hawaii Pidgin Ezra 5 Bible Online

Ezra 5 - Hawaii Pidgin bible

Ezra 5

¹Dat time, had two guys, Haggai an Iddo's boy Zekaraiah, dat stay talk fo da God fo da Israel peopo. Dey talk to da Jewish peopo Judah side an Jerusalem town.

²Cuz a wat dey tell, Shealtiel's boy Zerubbabel an Jehozadak's boy Jeshua start fo build da Temple Fo God inside Jerusalem again. Da two guys dat stay talk fo God, dey stay by Zerubbabel an Jeshua an help dem.

³Az why Tatnai, govna fo da Wes Eufrates Side, an Shetar-boznai, an dea helpa guys wen come Jerusalem. Dey tell Zerubbabel guys, “Eh! Who say you guys can build dis Temple dat was all bus up, an fo finish da place, aah?!”

⁴Da govna guys tell Zerubbabel guys dey gotta give um da names fo all da peopo dat stay work fo build da Temple.

⁵But God, dis how he take care da Jewish leada guys: Da govna guys like tell da Jews dey no can build, but dey neva tell um yet, cuz firs, dey gotta make report fo King Darius Persia side, den, dey gotta wait fo da King write dem back one letta.

⁶Dis, da letta dat Tatnai da govna fo da Wes Eufrates Side wen write, togedda wit Shetar-boznai an da odda govmen guys from da Wes Eufrates Side. Dey send um to King Darius:

⁷“Dis letta fo King Darius. We like eryting go good fo you.

⁸“Us guys like you know, we wen go da place wea dey stay build da Temple Fo Da Big God, Judah side. Dey using cut stone block an big kine beam fo da walls. Erybody stay work hard, an eryting going good.

⁹So we talk to dem, and aks um, ‘Who wen tell you guys can build dis Temple again dat was all bus up, an finish da place?’

¹⁰An we tell da Jewish leadas fo give us guys da names fo all dea leada guys, so we can write down fo you who stay in charge.

¹¹“Dis wat da Jewish leadas wen tell us: ‘Us, we da worka guys fo da God dat stay in charge a da sky an da world. We stay build dis Temple dat wen get all bus up. Long time ago, one big king fo da Israel peopo wen build um.

¹²But our ancesta guys wen do plenny kine stuff dat make da God in da sky come huhu wit us. So God wen let King Nebukadnezza from Babylon take ova dem. Dat king wen tell his guys fo bus up dis Temple an make da peopo move Babylon side.

¹³“Da year King Cyrus come King fo Babylon, he make one govmen paypa dat tell, good fo build dis Temple one mo time.

¹⁴Had plenny gold an silva tings dat King Nebukadnezza wen take outa da Temple Jerusalem side. He wen bring um inside da Babylon temple. King Cyrus wen take all dat stuff outa da temple Babylon side, an turn um ova to one guy name Sheshbazza. Den he make dat guy da territorial govna fo da Judah land.

¹⁵King Cyrus wen tell Sheshbazza, “Go take all dis stuffs, an put um inside da Temple Jerusalem side. Den you guys go build da House Fo God one mo time, same place jalike befo time.”

¹⁶So dis guy Sheshbazza, he come ova hea an make da foundation fo da House Fo God inside Jerusalem. From dat time till now, da peopo stay work, but still not pau yet.’

¹⁷“So den, King Darius, if you tink az good, tell yoa peopo fo look inside da records fo da kings ova dea Babylon side. Tell um fo find out if az right, dat King Cyrus wen make one govmen paypa dat say can build da House Fo God Jerusalem side. So wateva good fo you, tell us guys, cuz you da King.”